Como tras a moción de censura que precipitou a saída de Mariano Rajoy da presidencia do Goberno de España e do liderado do PP, cando diversas olladas internas se pousaron en Alberto Núñez Feijóo como posible remuda ata que renunciou a dar o paso definitivo. O enfrontamento aberto que vive a formación conservadora volve facer medrar os ruxerruxes e mesmo as peticións -por parte, por exemplo, dalgúns medios de comunicación- de que o presidente da Xunta e do PP en Galicia dea un paso á fronte, agora para substituír a Pablo Casado.
Con este pano de fondo, hai xa tempo que as forzas da oposición galega evitan argumentar sobre unha posible marcha de Feijóo a Madrid. Pero, nesta ocasión, tanto o BNG como o PSdeG si poñen o foco no xeito en que o titular da Xunta deu en intervir na crise interna do seu partido: non para pedir explicacións sobre posibles irregularidades que atinxan á presidenta da Comunidad de Madrid, Isabel Díaz Ayuso, senón para reclamar discreción sobre o propio enfrontamento, resumen.
Pontón: "Feijóo, en vez de reclamar que a Fiscalía investigue, pide que os trapos sucios se laven na casa. E aínda haberá quen pense que é capaz de rexenerar o PP"
Despois de que, dende o atril do Consello da Xunta, Feijóo reclamase á dirección de Casado que "non provoque ningún incendio" no partido aínda que dubide da honestidade de Ayuso, para a portavoz nacional do BNG, Ana Pontón, ve "evidente" que o PP "non persegue a corrupción, senón que a usa nas súas loitas internas de poder" e "nese espectáculo vemos a Feijóo, en vez de reclamando que a Fiscalía investigue, pide que os trapos sucios se laven na casa, que corran un tupido veo e que arranxen as diferenzas de portas cara a dentro". "E aínda hai quen pensa que é a persoa capaz de rexenerar o PP", ironizou na súa intervención ante o Consello Nacional da formación soberanista.
Neste contexto, Pontón lamenta que, mentres Feijóo "dá consellos de como apagar o incendio" interno do seu partido para evitar que a formación "saia calcinada polo lume da corrupción e das loitas internas", os "problemas en Galza non deixan de medrar" en eidos como a crise demográfica e industrial ou as subas de prezos. Neste sentido, e coa vista posta nas eleccións municipais do ano vindeiro, a nacionalista di ver "evidente" que "nin Feijóo nin o PP son a solución, senón parte esencial do problema" mentres "a alternativa está nun BNG que non se desvía nun milímetro" da liña de "traballo serio e propostas en positivo a prol de Galiza".
Formoso: "Isto non é a política"
Pola banda do PSdeG, o seu secretario xeral, Valentín González Formoso, declárase "sorprendido" pos que as "aclaracións" que Feijóo "solicita" se limiten a pedir saber se houbo "unha investigación interna entre compañeiros do PP". "O grave non é que se investigue un compañeiro do PP", coida o socialista, senón que "se asuma o método do todo vale e de destruír o adversario" e, ao tempo, o líder dos populares galegos obvie "o fondo da cuestión".
![](https://praza.gal/storage/uploads/3k3w8273-1-08d9747.jpeg)
Formoso declárase sorprendido por que as "aclaracións" que pide Feijóo sexan para saber se "houbo unha investigación entre compañeiros do PP"
Ese "fondo", subliña o socialista, non é outro que "un irmán" de Díaz Ayuso, "en plena pandemia" obtivo, segundo a dirección do propio PP, comisións pola "venda de máscaras cando non as había e a poboación estaba queixosa polos prezos especulativos" destes produtos. Con independencia da legalidade do acontecido, matiza, "falamos de ética, de honestidade", por "moi legal que sexa", se é o caso. "Nunca me entrometín na vida orgánica de ningún partido e non o vou facer agora, pero estamos ante un asunto extremadamente grave que afecta á imaxe de España no mundo, isto non é a política", conclúe Formoso.