O candidato popular presenta as e os cabezas de lista do PP ás xerais sobre un mapa de España como xa fixera en 2011 sobre un mapa de Galicia coas candidaturas populares ás municipais daquel ano
En 2011 Alberto Núñez Feijóo, actuando como presidente do PPdeG, presentou as candidaturas da súa formación ás eleccións municipais daquel ano sobre un gran mapa de Galicia disposto na entrada o pavillón de deportes Fontes do Sar de Santiago. Este martes, agora como presidente do PP estatal, o mesmo Feijóo presentou as candidaturas ás eleccións xerais do vindeiro 23 de xullo sobre un gran mapa de España disposto fronte ao Pazo Real de Aranjuez. O acto supón un novo exemplo da estratexia do equipo de asesores do ex-presidente da Xunta de reeditar a nivel estatal o manual político que aplicou en Galicia na oposición ao Goberno de PSdeG e BNG e tras a súa chegada á Xunta.
Non é a primeira vez desde que chegaron a Madrid que Feijóo e o seu equipo recorren a un mapa para presentar sobre el as súas candidaturas. Xa o fixeron en xaneiro para presentar a candidatos e candidatas ás alcaldías das capitais de provincia nas pasadas eleccións municipais. Daquela, igualmente sobre un mapa de España, a presentación realizouse na Praza de España de Madrid.
Feijóo vén replicando na súa carreira para facerse co Goberno de España imaxes e discursos similares aos empregados no seu momento para gañar a Xunta
Feijóo tamén vén replicando desde a súa chegada á presidencia do PP estatal outras imaxes icónicas das súas campañas políticas en Galicia. Como a sinatura o pasado xaneiro dun compromiso de "calidade institucional" a semellanza do "contrato con Galicia" que asinara en 2009 pouco antes das eleccións galegas daquel ano que acabou gañando. E no eido do discurso político, a súa estratexia tamén é similar desde hai un ano á despregada en 2009. [Feijóo executa contra PSOE e Podemos o manual de asedio que estreou fronte á coalición de esquerda na Xunta].
