ERC e PNV advirten de que non atrancarán a investidura de Sánchez se hai pacto do PSOE con Podemos

As delegacións de ERC e PSOE, ao inicio da súa xuntanza no Congreso este 4 de setembro © PSOE

Hemeroteca

ERC e PNV elevan a presión sobre Unidas Podemos para que permita a investidura de Pedro Sánchez e impida a convocatoria automática dunhas novas eleccións xerais o 10 de novembro por falta de acordo. Ambas as formacións advirten de que non serán un problema para que o socialista siga na Moncloa a condición de que haxa un acordo cos de Pablo Iglesias, cuxos votos afirmativos son imprescindibles para que saia adiante.

Aitor Esteban: "O PNV está a facer todo o posible para que haxa unha investidura e un Goberno; non vai ser un obstáculo"

Entre os ecos do documento programático presentado por Pedro Sánchez nun acto público o pasado martes, o mesmo que PSOE e UP terán sobre a mesa o xoves, os socialistas citáronse este mércores coas formacións soberanistas catalá e vasca. "Por ERC non será", expresou Gabriel Rufián tras reunirse coa vicesecretaria xeral do PSOE, Adriana Lastra, e o secretario de Organización, José Luis Ábalos. 

Aínda que o voceiro de ERC evitou dar por sentado que repetirá a abstención de hai dous meses, sinalou esa posición ao asegurar que o seu grupo non será o que provoque unhas novas eleccións nas que ve posible que a suma de PP, Ciudadanos e Vox mellore os seus resultados. "Por ERC non será" é a mesma expresión que utilizou en xullo, cando o seu grupo deu en absterse, aínda que recoñeceu que o mes de setembro "complica a vida" pola celebración da Diada e pola inminencia da sentenza do procés.

Pedro Sánchez e Pablo Iglesias, nunha das súas xuntanzas previa á investidura fracasada en xullo Dominio Público @ahorapodemos

O PNV pronunciouse en termos similares antes da súa xuntanza co PSOE. "O PNV está a facer todo o posible para que haxa unha investidura e un Goberno. Non vai ser o PNV un obstáculo para que haxa goberno", afirmou o portavoz parlamentario, Aitor Esteban, tras a reunión da Xunta de Portavoces na que se aprobou o calendario de plenos do Congreso para os próximos meses

Críticas de Esquerra a Podemos

Rufián foi especialmente crítico con Pablo Iglesias por pór como condición indispensable que Unidas Podemos forme parte do Consello de Ministros para chegar a un entendemento co PSOE. A "pregunta" para Rufián é "por que" Podemos non "aposta" polo "diálogo", a "política" e a "palabra" mentres Esquerra si que o fai.

Gabriel Rufián: "Iglesias fala de que o humillan. É curioso. Formamos parte dun partido que ten o seu presidente no cárcere (...) e a Iglesias humíllano porque non ten un ministerio"

"Iglesias fala de que o humillan. É curioso. Formamos parte dun partido que ten ao seu presidente no cárcere, á súa secretaria xeral no exilio... A Iglesias humíllano porque non ten un ministerio", afeou: "Que vaian a Lledoners e llo digan a Junqueras", expresou tras lembrar que o líder de ERC apostou polo diálogo estando xa en prisión polo procés.

Tamén lembrou que Unidas Podemos dixo hai uns meses que lograra un acordo co PSOE para os "Orzamentos Xerais do Estado máis sociais da historia". "Conseguírono desde fóra, por que é necesario que entren no Goberno? Por que o custo de entraren no Goberno é xogarmos á ruleta rusa?", preguntouse o deputado catalán, que lembrou que o seu partido chegou a entendementos con forzas políticas afastadas ideoloxicamente. Así, sostivo que as "diferenzas" de Sánchez e Iglesias "son moito maiores" que as da cidadanía que votou ao PSOE ou a Unidas Podemos e falou mesmo de "fobias persoais".

O PNV utilizou un ton máis conciliador e non quixo valorar as posicións duns e outros. O que si salientou Esteban é que o seu partido non ten obxeccións a unha coalición, é dicir, a que Unidas Podemos forme parte do Executivo. Os socialistas aduciron tras as eleccións que esa fórmula levantaba suspicacias nalgúns dos aliados necesarios e sinalaron aos nacionalistas vascos: "Ao PNV dálle igual que sexa un goberno de coalición ou un acordo programático entre eles", subliña.

Despece

  • Gonzalo Caballero censura que Feijóo "saia defender" a Aguirre e Cifuentes e o PPdeG retruca co alcalde de Cerceda

    Gonzalo Caballero conversa con Pedro Sánchez en presenza da ministra Reyes Maroto, na presentación do documento programática do PSOE CC-BY-NC-SA PSdeG

    D.L.

    O presidente da Xunta, Alberto Núñez Feijóo, respondeu ás citacións como investigadas -antiga imputación- no caso Púnica das ex-presidentas madrileñas Esperanza Aguirre e Cristina Cifuentes amosándose "convencido" de que ambas dirixentes "non levaron un euro á súa casa". "Estou seguro", reafirmou.

    Estas declaracións son lidas dende o PSdeG como unha "defensa" de ambas ex-mandatarias, as "madriñas políticas de Pablo Casado", en verbas do secretario xeral socialista. Para Gonzalo Caballero, Galicia "merece un presidente que se poña do lado da limpeza e da exemplaridade" e non un "acostumado a vivir nun PP inundado de corrupción", acusacións que o PPdeG respondeu instando o tamén candidato do PSdeG á Xunta a dar explicacións pola recente condena ao alcalde socialista de Cerceda, inhabilitado por iniciar unha obra do Concello antes de que fose adxudicada.

    Aguirre e Feijóo, nun acto público en 2010 © Comunidad de Madrid

    O PPdeG cre que, no canto de pronunciarse sobre Aguirre e Cifuentes, Caballero debera facelo sobre o rexedor socialista de Cerceda, inhabilitado por iniciar unha obra do Concello antes de que fose adxudicada

    A xuízo de Caballero, Feijóo "sae defender" a Aguirre e Cifuentes por mor dese "costume" a "vivir nun PP" que "non asumiu ningún tipo de responsabilidade" polos casos de corrupción que o atinxen. E segue a facelo, acrecenta, aínda que haxa "sospeitas de que se desviaron tres millóns de euros da sanidade pública cara á caixa b do PP". "Os xuíces -subliña o líder socialista- outorgan a Aguirre un papel decisivo e fundamental no financiamento ilegal do PP".

    Mentres o líder do PSdeG, que no novo curso político debutará nos debates parlamentarios con Feijóo, esixe ao presidente da Xunta que "rectifique" a súa posición sobre a trama Púnica, o PPdeG responde instando o propio Caballero a pronunciarse sobre a devandita condena ao rexedor de Cerceda. Na súa intervención sobre Aguirre e Cifuentes o socialista "perdeu unha boa oportunidade de preocuparse por un tema de limpeza e exemplaridade que ten bastante máis preto e do que aínda non dixo nada", sinalou a conta oficial do PPdeG nas redes sociais en referencia a José García Liñares, a quen a oposición municipal (PP e BNG) reclamou este mesmo mércores a celebración dun pleno extraordinario para abordar o seu cesamento tras a súa condena.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza