Os ingresos totais do ex-presidente caeron a respecto do ano anterior, no que vendera a casa que tiña en Moaña, pero no último exercicio aumentou un 60% a súa participación en Inditex, con 133.200 euros, e vén de mercar unha vivenda na Coruña
Pode que non consiga ser presidente do Goberno, polo menos a curto prazo, pero de momento a aterraxe na política estatal foi economicamente vantaxosa para Alberto Núñez Feijóo, ex-presidente da Xunta. A actualización da súa declaración de bens e rendas do Senado revela que o político galego conseguiu aumentar en 2022 as súas rendas de traballo un 73,7%, e iso que durante os primeiros catro meses do ano unicamente ingresou o seu antigo soldo como presidente da Xunta.
Feijóo revisou, por fin, os seus datos na Cámara Alta o pasado 18 de agosto, ao día seguinte de ocupar por primeira vez o seu novo escano como deputado no Congreso. Levaba semanas negándose a facelo, desatendendo incluso unha petición por escrito do ata hai pouco presidente do Senado, o socialista Ander Gil.
Segue, con todo, sen cumprir a Lei de Transparencia, que no seu artigo 8.1.f establece que os partidos políticos están obrigados a facer públicas “as retribucións percibidas anualmente” polos seus “altos cargos e máximos responsables”. E engade: “Igualmente, faranse públicas as indemnizacións percibidas, no seu caso, con ocasión do abandono do cargo”.
Esta información, segundo a mesma norma, non só debe poñerse ao dispor dos cidadáns a través de Internet senón que ten que ofrecerse “dunha maneira clara, estruturada e entendible para os interesados e, preferiblemente, en formatos reutilizables. Estableceranse os mecanismos adecuados para facilitar a accesibilidade, a interoperabilidade, a calidade e a reutilización da información publicada así como a súa identificación e localización” (artigo 5 da lei 19/2013, do 9 de decembro, de transparencia, acceso á información pública e bo goberno).
Incremento de rendas
O pasado ano Feijóo cobrou de cinco empregos distintos: presidente da Xunta, deputado autonómico, presidente do PP, presidente do grupo do PP no Senado e senador por Galicia
A declaración íntegra, á que tivo a acceso infoLibre, pon negro sobre branco o moito que creceron os seus ingresos por traballo. Se en 2021 Feijóo gañou 85.601,86 euros en calidade de presidente da Xunta, o ano pasado sumou rendas por valor de 148.731,23 euros procedentes de cinco empregos distintos: presidente da Xunta, deputado autonómico, presidente do PP, presidente do grupo do PP no Senado e senador por Galicia.
A cifra máis avultada obtívoa como parlamentario do Senado: 54.164,43 euros por oito meses de traballo, dos que 18.000 ingresounos en calidade de senador de representación autonómica, unha suma á que non tiña dereito porque desde o primeiro momento fixou a súa residencia en Madrid.
O partido pagoulle ademais, por nove meses como máximo responsable da organización, 39.260 euros en concepto de “gastos de representación”. Polo mesmo traballo, o grupo parlamentario do PP no Senado abonoulle ademais outros 31.850 euros.
A este diñeiro hai que sumar os 21.686,55 euros que lle abonou a Xunta polo seu últimos catro meses na presidencia de Galicia e 1.770,25 euros que o propio Feijóo reclamou ao Parlamento de Galicia polos dez días que tardou en ser elixido senador de representación autonómica.
Esta información revela os ingresos e a situación patrimonial do líder do PP o ano pasado, pero non o seu estado actual, que acaba de cambiar. A partir de agora cobrará o seu soldo do Congreso dos Deputados e, con toda probabilidade, unha suma diferente de diñeiro como presidente do grupo parlamentario do PP na Cámara Baixa, ademais do que recibe do partido. Esa información, con todo, non ten obriga de revelala ata o ano próximo, segundo o regulamento do Congreso.
Feijóo ingresou máis polo seu traballo, pero gañou menos que en 2021, segundo os datos que comunicou ao Senado. A culpa é das elevadas ganancias patrimoniais que obtivo hai dous anos (183.861,65 euros) e que, segundo fontes do PP, tiñan a súa orixe na venda dunha casa Moaña. Como consecuencia diso, en 2022 pagou menos a Facenda (64.872,64 euros) que en 2021 (69.291,43 euros).
Polo demais, o detalle dos seus ingresos mostra que segue recibindo rendas máis ben modestas por bens inmobles da súa propiedade (5.584,4 euros en 2022), un epígrafe que fai referencia ao que ingresa por leiras ou vivendas que ten en alugueiro. E reflicte un incremento substancial de dividendos por accións: 2.112,58 euros en 2022, fronte a 705,29 en 2021.
Accións en Inditex e fondo en Abanca
O seu fondo de investimento en Abanca baixou de 481.500 a 403.400 euros mentres o fondo de pensións ascende a 195.100 euros
Na Bolsa está, precisamente, outra das novidades da declaración de Feijóo: aumentou un 60% a súa participación no accionariado de Inditex, a empresa matriz de Zara, onde xa ten participacións por valor de 133.200 euros.
Feijóo incrementou ademais as súas propiedades. Á leira rústica que ten en Ames desde 1992, á vivenda e a praza de garaxe que posúe en Vigo desde febreiro de 2001 e ao piso que comprou en Madrid en decembro de 2001 (e no que non vive, porque preferiu alugar unha vivenda en El Viso, unha das zonas máis caras da capital), acaba de sumar outra vivenda e unha praza de garaxe na Coruña, adquiridas hai apenas dúas semanas.
Esa compra é, con toda probabilidade, a razón pola que o patrimonio económico de Feijóo se reduciu. En 2021 declarou 930.972 euros entre contas correntes, depósitos a prazo, fondos de investimento e de pensións e accións en empresas. Agora os mesmos conceptos suman 769.779,09 euros (161.192,91 menos).
A súa conta corrente é a que máis sufriu (pasou de 156.613 a 37.627,24 euros). Liquidou un depósito a prazo de 50.807 euros e rebaixou o seu fondo de investimento en Abanca de 481.500 a 403.425,29 euros. O seu fondo de pensións, en cambio, segue crecendo: xa ascende a 195.163,16 euros.
