Feijóo quéixase de que as manifestacións se achegan máis a el que a membros do Goberno de España

Protesta da Mesa ante a illa da Toxa, á que as forzas de seguridade non permitiron acceder CC-BY-SA A Mesa pola Normalización Lingüística

Hemeroteca

“Sorpréndeme a facilidade para determinadas manifestacións e a dificultade para outras, e soe coincidir con se hai representantes estatais ou non os hai”, di o presidente preguntado polos obstáculos ás protestas de varios colectivos ante o foro que se celebra na Toxa

“Cando veñen ministros normalmente as manifestacións están afastadas de onde están as autoridades” mentres que “co presidente da Xunta, están máis próximas”. Esa foi a resposta que deu este xoves o presidente Feijóo, na rolda de prensa posterior á reunión semanal do seu Goberno, cando se lle preguntou pola súa valoración sobre as dificultades atopadas por colectivos como o persoal de Ence ou a Mesa pola Normalización Lingüística para manifestarse ante as diversas autoridades públicas e empresarios asistentes ao Foro La Toja que se celebra na illa da Toxa.

O presidente dixo non poder valorar o ocorrido concretamente nas protestas da Toxa xa que, asegurou, el mesmo non chegou a ver ás persoas que protestaban pola distancia existente. 

Imaxe divulgada polos traballadores auxiliares de Ence concentrados fronte á ponte de acceso á illa da Toxa, á que non puideron acceder © @CeaPontevedra

Pero Feijóo si quixo reflesionar sobre as, ao seu ver, diferenzas de distancias de seguridade que se permiten nalgunhas manifestacións sen concretar se as atribúe aos responsables políticos do Goberno de España ou a decisións técnicas dos propios corpos e forzas de seguridade. “Se iso obedece a algunha causalidade, o descoñezo”, engadiu, para insistir en que el pode “testificar que ás veces me sorprende a facilidade para determinadas manifestacións e a dificultade para outras, e soe coincidir con se hai representantes estatais ou non os hai”. 

Despece

  • O TSXG avala a prohibición da manifestación da CIG na contorna do 'Foro La Toja'

    CC-BY-SA David Cabezón / Xunta

    D.L.

    A sección primeira da Sala do Contencioso-Administrativo do Tribunal Superior de Xustiza de Galicia vén de rexeitar o recurso interposto pola CIG contra a prohibición ditada pola Subdelegación do Goberno de España en Galicia para a manifestación que a central sindical prevía desenvolver este 1 de outubro na illa da Toxa. Cadrando coa celebración do denominado Foro La Toja, que impulsa o grupo hoteleiro HOTUSA, o sindicato convocara unha protesta para "denunciar as nefastas políticas económicas e enerxéticas" e a "submisión dos gobernos ás grandes empresas".

    O Tribunal sinala que a CIG non aceptou un itinerario alternativo para a mobilización para así garantir o paso á illa. O sindicato mantén que é "falso", xa que "non se nos deu a oportunidade de cambiar o itinerario"

    Considera o TSXG que o itinerario previsto pola mobilización ía producir "con toda certeza, alteración da orde pública" con "perigo para as persoas ou bens". Segundo a sentenza, tras valorar informes da Garda Civil e da Policía Local do Grove, a Sala conclúe que a manifestación "entre as glorietas que flanquean a ponte da illa da Toxa", a "única vía de acceso á illa, con dous carrís de circulación e beirarrúas moi estreitas", implicaría un corte de tráfico demasiado prolongado que "imposibilitaría a prestación de servizos esenciais".

    Alén de "impedir o itinerario" das "distintas autoridades" que asisten ao evento, agrega, tampouco sería posible o eventual paso de servizos de emerxencia. O Tribunal agrega que a CIG non "aceptou modificar o itinerario" segundo a proposta da Policía grovense. 

    O sindicato, pola súa banda, coida que a sentenza está "baseada nun dato falso", xa que "en ningún momento se nos deu a oportunidade de cambiar o itinerario". O secretario xeral da CIG, Paulo Carril, ve claro que está a producirse unha "vulneración de dereitos fundamentais" mesmo coa Fiscalía na contra, xa que o Ministerio Público  "indicou que en lugar de prohibir a manifestación" deberían fixarse "medidas restritivas que permitan a compatibilidade do dereito de manifestación coa seguridade e a orde".”

  • David Reinero

    David Reinero

    Xornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza