Pasar a barreira dos cen mil habitantes é un dos obxectivos aos que historicamente viña aspirando o goberno local de Lugo. Non tanto por lograr que esa cantidade de persoas resida ou faga vida no concello, o cal as autoridades lucenses calculan que xa foi logrado con anterioridade, senón por conseguir atravesar o limiar das 100.000 inscricións no padrón municipal. E iso vén de suceder.
A capital lucense chega a 100.060 habitantes, superando en algo máis de 1.800 o dato oficial de 2023
A alcaldesa da cidade, Paula Alvarellos (PSdeG), e o primeiro tenente da alcaldía, Rubén Arroxo (BNG), ratificaron este 25 de xuño que os datos máis recentes do padrón municipal cos que conta o goberno local acreditan a consecución do obxectivo. Unha vez depurados segundo o procedemento legal rexistran un incremento superior ás 1.800 inscricións a respecto do último dato oficial publicado, o do 1 de xaneiro de 2023, pasando de 98.214 a 100.060 persoas.
Para a rexedora, superar os cen mil habitantes é "histórico", un "fito" que vai alén do estritamente demográfico. Porque, a xuízo da rexedora socialista, acredita un "claro éxito das nosas políticas", toda vez que "as forzas progresistas que formamos o goberno local levamos anos traballando" por chegar a esa cifra. E fixérono, agrega, cunha "aposta clara por construír unha cidade de oportunidades" na que a xente poida "desenvolver un proxecto persoal e profesional" nunha "cidade viva". "Lugo -agrega Alvarellos- é a día de hoxe un destino atractivo para vivir".
A alcaldesa Alvarellos aplaude un "fito" que ve alén do estritamente demográfico e identifica cun "éxito das políticas" das "forzas progresistas que formamos o goberno local". Arroxo, tenente da Alcaldía, encádrao no obxectivo de "facer de Lugo un lugar mellor para vivir"
Neste sentido, Alvarellos defende que o labor municipal en eidos coma o "urbanístico, medioambiental, económico, social, dotacional e administrativo" non só "melloran a calidade de vida" da veciñanza. Tamén "fixeron de Lugo un destino atractivo para novos residentes e investidores", mantén.
Arroxo, pola súa banda, congratúlase de pasar da "meta" das 100.000 persoas e encádraa no obxectivo de "facer de Lugo un lugar mellor para vivir". As áreas do goberno dirixidas polo Bloque, agrega, concrétano ao "transformar os espazos públicos e a mobilidade". Agora, agrega, "toca seguir traballando para continuar a mellorar o concello, seguir crecendo e mellorando a cidade".
Repercusións de ser máis de cen mil
Que Lugo chegue a ser a cuarta cidade galega con máis de cen mil persoas empadroadas tras Vigo, A Coruña e Ourense implica, alén do fito simbólico, diversas consecuencias prácticas. Entre as máis relevantes, subliña Arroxo, "poder optar a fondos pechados a cidades" que superan ese limiar poboacional dentro das achegas do Estado. Mais tamén "aumenta o interese empresarial", toda vez que "moitas empresas só se instalan en cidades cuxo padrón supera esta cifra", mantén.
