A alcaldesa coruñesa, Inés Rey, e o ministro de Transformación Dixital, José Luis Escrivá, asinaron este martes un documento que implica a cesión "gratuíta e temporal" da Terraza ao Estado
A finais de 2022 o Goberno de España decidiu que a nova Axencia Española de Supervisión de Intelixencia Artificial (AESIA) tivese a súa sede na Coruña. Elementos como a situación poboacional de Galicia, o transporte, o inmoble, a lingua galega, as empresas do sector instaladas na contorna ou as alianzas coa universidade foron clave para que a candidatura galega se impuxese a unha ducia de competidoras, algunha das cales mesmo chegou a litigar para tentar reverter a decisión.
Tras o aval definitivo do Supremo a finais de 2023 e despois de culminar, a pasada semana, o proceso que elixiu o enxeñeiro informático Ignasi Belda como primeiro director xeral da entidade, Concello da Coruña e Goberno de España rubrican a cesión do espazo que acollerá a AESIA. Será, como xa se avanzara, o emblemático edificio da Terraza, en pleno centro da cidade, ao carón dos xardíns de Méndez Núñez, espazo que actualmente acolle instalacións de RTVE.
Establécese un prazo transitorio de 12 meses, de forma que a Axencia poida ir ocupando os espazos que considere necesarios en coordinación co traslado dos servizos de RTVE do edificio
A alcaldesa coruñesa, Inés Rey, e o ministro de Transformación Dixital, José Luis Escrivá, asinaron este martes un documento que implica a cesión "gratuíta e temporal" da Terraza ao Estado. Ademais, especifica o goberno local, contempla "un prazo transitorio" de ata 12 meses nos que a AESIA "poderá ir ocupando os espazos que consideren necesarios", período durante o cal o Concello "porá á disposición" outras instalacións provisionais. Estes traballos coordinaranse dende unha "oficina municipal de benvida".
"Hoxe formalizamos un paso máis para o desenvolvemento da AESIA, a primeira axencia estatal da IA en España e Europa, consolidando o posicionamento da Coruña como líder en materia TIC e innovación tecnolóxica”, destacou Rey
“Hoxe formalizamos un paso máis para o desenvolvemento da AESIA, a primeira axencia estatal da IA en España e Europa, consolidando o posicionamento da Coruña como líder en materia TIC e innovación tecnolóxica”, destacou a rexedora, que lembrou que un dos requisitos da candidatura era ofrecer un espazo céntrico para albergar a sede. “Desde o Concello pensamos que A Terraza era o mellor espazo para iso por localización, historia, identificación coa identidade modernista da cidade e potencialidades como espazo”, dixo Inés Rey.
A previsión inicial da AESIA contaba cuns 40 postos de traballo
O compromiso municipal coa AESIA implica tamén, na liña do formulado pola candidatura da Coruña, que o Concello "subscriba un convenio nominativo anual" a prol da Axencia que financie "os incentivos dos empregados públicos" que alí traballen. A previsión inicial da AESIA contaba cuns 40 postos de traballo.
“Desde o Concello pensamos que A Terraza era o mellor espazo para iso por localización, historia, identificación coa identidade modernista da cidade e potencialidades como espazo”, dixo a alcaldesa
Rey agradeceulle ao ministro de Transformación Dixital e Función Pública a boa disposición para avanzar no inicio da actividade da sede na Coruña. “Un organismo novo e que por iso esixe dun proceso amplo de procesos e trámites pero que grazas a esa colaboración entre Goberno e Concello fomos quen de avanzar para que sexa unha realidade”, sinalou a alcaldesa
Tamén lle deu a benvida ao director da AESIA, Ignasi Belda, á cidade. “Sei que coa túa formación como enxeñeiro, experiencia en investigación e ampla bagaxe dirixindo equipos desde a empresa privada ou de entidades públicas como o Parc Científic de Barcelona, esta axencia axudaranos a seguir consolidando a posición da Coruña en materia tecnolóxica” engadiu.
