O goberno de Lugo apura a presentación de proxectos en marcha ás portas da censura

O alcalde de Lugo, con Besteiro, o delegado do Goberno de España e outros cargos, visitando as obras da intermodal o 4 de maio de 2026 © Concello de Lugo

Hemeroteca

O equipo encabezado polo socialista Miguel Fernández e o nacionalista Rubén Arroxo investiu os últimos días en amosar obras e iniciativas rematadas, a piques de facelo ou que en condicións normais despregarían no ano restante atas as eleccións

Agás sorpresa maiúscula, o goberno de PSdeG e BNG no Concello de Lugo vive as súas últimas horas neste mandato. As que restan ata que o pleno municipal vote, no mediodía deste xoves 7 de maio, a moción de censura asinada polo PP local canda a tránsfuga ex-socialista María Reigosa, que na véspera da xornada clave deu en aclarar eventuais dúbidas ratificando que votará "si" porque "confía" no que pode facer como alcaldesa quen tras as eleccións municipais de 2023 non logrou maioría para ser investida como tal, a popular Elena Candia.

Dadas as circunstancias, o goberno encabezado polo socialista Miguel Fernández e o nacionalista Rubén Arroxo investiu estes últimos días, mesmo as últimas horas, en apurar a presentación de proxectos en marcha. Obras a piques de rematar e decisións administrativas xa culminadas, pero tamén balances e primeiros pasos de iniciativas previstas ata a vindeira cita coas urnas e que, consideran, pasan a estar en risco coa chegada do PP a un goberno que o voto veciñal non lle outorga dende o mandato 1995-99.

Rubén Arroxo, co concelleiro Alexandre Penas e o enxeñeiro municipal Pablo Fuentes, presentando os proxectos de rotondas que o seu departamento ten ultimados © Concello de Lugo

Entre as presentacións máis significativas, por dimensión, destaca a da estación intermodal. A terminal, de competencia estatal -a parte ferroviaria- e autonómica -a de autobuses- ten previsto o seu remate para o vindeiro xuño. O pasado luns, acompañado polo delegado do Goberno de España, Pedro Blanco, e mais polo secretario xeral do PSdeG, José Ramón Gómez Besteiro, o alcalde fixo fincapé na alianza co propio Concello para unhas obras que os gobernos de Rajoy deixaran arrombadas e que "son a proba de que Lugo está en marcha".

Os pasos finais da estación intermodal e de varias obras viarias, a programación cultural ligada ao Arde Lucus ou os patrocinios do Breogán foron presentados polo gabinete de PSdeG e BNG antes da inminente chegada de Candia grazas ao voto da edil tránsfuga

Neste contexto, Fernández avanzou a inminente sinatura dun convenio co Adif para "conectar a nova infraestrutura coa zona alta da cidade a través dun sistema de ramplas e ascensores", unha das grandes cuestións pendentes. "Lugo sabe quen cumpriu coa intermodal e quen a bloqueou durante anos, iso nas urnas non se esquecerá", agregaba Besteiro.

Tamén da man do Estado, neste caso da Confederación Hidrográfica Miño-Sil, o alcalde presentaba o remate das obras que uniron o paseo do río Rato co do Miño, cinto verde situado no que noutrora era unha área degradada. E xunto á presidenta da Deputación, a tamén socialista Carmela López, comprobou o avance dos traballos de reforma da avenida Adolfo Suárez e da rúa Filharmónica Lucense, na contorna do Pazo dos Deportes.

O alcalde de Lugo, Miguel Fernández, co plantel e directivos do Breogán, presentando a camisola conmemorativa do equipo polo Arde Lucus e os patrocinios aprobados polo Concello, este 6 de maio © Concello de Lugo

Diversas obras foron tamén as presentadas dende a área municipal de Infraestruturas, dependente da Tenencia de Alcaldía. Así, por exemplo, a área de Rubén Arroxo lanzou o contrato da pasarela peonil sobre a Rolda da República Arxentina, entre os parques de Rosalía e Marcos Cela ou expuxo á veciñanza o proxecto de humanización das rúas Otero Pedrayo e Río Sil. Tamén presentou os proxectos de oito rotondas en diversos puntos da cidade que o seu departamento tiña ultimados. "Non sabemos como van quedar estes proxectos e é algo que nos preocupa", reflexiona o nacionalista.

"Non sabemos como van quedar estes proxectos e é algo que nos preocupa"

Alén das obras, o aínda goberno de Lugo optou por presentar antes da chegada de Candia ao goberno grazas á concelleira tránsfuga outras accións que, en condicións normais, amosaría en vindeiras semanas. É o caso da programación cultural ligada ao Arde Lucus, festa creada durante os gobernos progresistas e que neste 2026 celebra o seu primeiro cuarto de século. Tamén da programación completa do Caudal Fest, que se celebra a finais do verán.

O mesmo sucedeu coa aprobación dos patrocinios para o Club Baloncesto Breogán neste ano 2026 e mais para os dous seguintes. Xa recibiron o visto e prace do goberno local e foron presentados este mesmo mércores, na véspera da censura, polo alcalde canda o conxunto de baloncesto lucense.

Vídeo divulgado polo Concello de Lugo sobre transformacións urbanas financiadas con fondos europeos solicitados polos gobernos progresistas na cidade

Ao tempo, o goberno lucense adiantou a publicación dun vídeo encadrado no Día de Europa, que se celebra o día 9. Ao fío do cuadraxésimo aniversario da adhesión de España á UE, destaca diversas transformacións urbanas financiadas con fondos europeos nos últimos anos na cidade baixo unha elocuente pregunta: "Recordas como era a nosa cidade hai unhas décadas?".

Despece

  • Pontón, a Rueda: "Lugo non paga traidores e vaillo demostrar nas próximas municipais"

    Ana Pontón e Rubén Arroxo, este 6 de maio ante a Casa do Concello de Lugo CC-BY-NC-SA BNG

    Na véspera da votación da moción de censura o aínda tenente da alcaldía, Rubén Arroxo, recibiu en Lugo a portavoz nacional do BNG, que leu a operación en marcha en clave galega, dado o aval de Alfonso Rueda que recibiu Elena Candia para acceder á alcaldía mediante o voto da concelleira tránsfuga. "Lugo non paga traidores e vaillo demostrar nas próximas eleccións municipais", augura Ana Pontón.

    Arroxo lamenta a "inestabilidade" que, coida, traerá consigo o goberno do PP apoiado na edil tránsfuga e lamenta que "moitos proxectos queden nun limbo", se ben augura que "quedan doce meses para devolver a dignidade a Lugo"

    Para Pontón, esta "antidemocrática, indecente e ilexítima" moción de censura é a mostra de "como o PP está disposto a todo para facerse co poder", nunha "deriva antidemocrática que non ten límites" e que os leva a "amañar" esta operación "sobre a morte de tres persoas". Pero a veciñanza lucense, mantén, na seguinte cita coas urnas " vailles demostrar que non vale todo, que non vale a compra de vontades con recursos públicos" nin "poñer a ambición do PP por diante da cidade".

    Pontón ve "moi claro" que a motivación desta censura a un ano dos seguintes comicios está en que "o PP viu que non lle daban as contas" aínda que isto implique pasar mesmo por riba dos estatutos dos propios populares, que tipifican como moi grave acceder aos gobernos apoiados no transfuguismo. "Lugo non merece esta indigna moción de censura", cre a líder do Bloque, e tampouco que "tente atacar a cidadanía que libremente expresa a súa indignación"

    Ana Pontón, este 6 de maio na Praza Maior de Lugo

    Neste contexto, Arroxo tamén advirte de que a preocupación se estende á "inestabilidade" que, coida, traerá o goberno do PP apoiado na edil tránsfuga. "Moitos proxectos planificados quedan nun limbo nun "momento de inestabilidade" que, así e todo, cre, tamén é "de esperanza". "Quedan doce meses para devolver a dignidade a Lugo e traballaremos para conseguilo", afirma.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza