O groso da fin do desconfinamento será competencia da Xunta grazas aos pactos do Goberno central co PNV e ERC

Pedro Sánchez, durante unha das videoconferencias coas presidencias autonómicas © JM Cuadrado / Goberno de España

Hemeroteca

O presidente do Goberno central, Pedro Sánchez, confirmou este domingo ás comunidades autónomas a súa previsión de que a sexta prórroga do estado de alarma polo coronavirus, ata o 21 de xuño, será tamén a derradeira. Ao contrario que en anteriores videoconferencias coas presidencias autonómicas, Sánchez chegou ao encontro deste domingo, o duodécimo, despois de que o seu Executivo atase os apoios para sacar adiante a seguinte prórroga mediante senllos pactos co Partido Nacionalista Vasco e Esquerra Republicana de Catalunya que terán repercusión directa tamén para Galicia. O remate do desconfinamento, a fase 3, será esencialmente competencia da Xunta.

Sánchez confirma que a sexta prórroga do estado de alarma será a derradeira e na nova redacción do decreto, as presidencias autonómicas terán a consideración de autoridade competente delegada ao mesmo nivel que o ministro de Sanidade

Tanto o PNV como ERC confirmaban o pasado sábado os trazos xerais dos acordos que pasan, como anteriores pactos, por introducir emendas ao real decreto do estado de alarma. Así, detalla a formación vasca, o novo texto indicará que neste novo período as "autoridades competentes delgadas" serán "o ministro de sanidade, baixo a superior dirección do presidente do Goberno", Pedro Sánchez, e "quen ostente a presidencia da comunidade autónoma". Esta parte do acordo é practicamente idéntica a unha das emendas formulada a pasada semana polo BNG no Congreso.

Pero o acordo co PNV vai máis alá. Segundo o difundido polos jeltzales, a clave do pacto é o traspaso de competencias ás comunidades autónomas para a práctica totalidade de medidas da fase 3 do desconfinamento, que a Xunta di pretender pedir a partir do 8 de xuño. Así, indica a nova redacción, "a autoridade competente delegada para a adopción, supresión, modulación e execución das medidas correspondentes á fase 3" do plan de desconfinamento "será, no exercicio das súas competencias, exclusivamente quen ostente a presidencia da comunidade autónoma". 

Aitor Esteban e Gabriel Rufián, voceiros de PNV e ERC no Congreso © Congreso dos Deputados

A única excepción a esa nova autoridade para as presidencias autonómicas serán "as medidas vinculadas á liberdade de circulación que excedan o ámbito da unidade territorial determinada para cada comunidade autónoma aos efectos do proceso de desconfinamento". Deste xeito, interpreta o PNV, a cambio do seu voto a prol da nova prórroga, no interior de Euskadi a restrición ou ampliación de movementos para a cidadanía será competencia do lehendakari porque todo o territorio vasco será considerado unha única unidade, adiantou El Confidencial.

A excepción serán "as medidas vinculadas á liberdade de circulación que excedan o ámbito da unidade territorial determinada" no desconfinamento, clave para a mobilidade entre provincias

No caso galego, daquela, segue sobre a mesa a cuestión do movemento alén das lindes provinciais. O groso das medidas do desconfinamento pasarán a ser competencia da Xunta a través do seu presidente, Alberto Núñez Feijóo, que polemiza dende hai semanas co Goberno central sobre este e outros aspectos da aplicación do estado de alarma. Pero coa redacción pactada, cabe agardar que o Ministerio siga tendo a última palabra sobre esta cuestión.

Que esta sexa a última prórroga do estado de alarma, como confirmou Sánchez ás autonomías, figura no pactado con Esquerra, que deixará o "non" para retornar á abstención. Ese acordo contempla tamén o devandito retorno de competencias autonómicas "na toma de decisión do proceso final de desconfinamento a partir de que as rexións sanitarias [unidade do desconfinamento, no caso catalán] entren na fase 3" e ademais, a participación autonómica "na xestión dos fondos europeos para a reconstrución", que nestas semanas se negocian no seo da Unión Europea.

Control policial na Coruña para evitar desprazamentos non permitidos durante o confinamento © Policía Local A Coruña

Asegura ademais Esquerra que o Goberno central se "compromete a impulsar os cambios lexislativos" para "evitar a implantación do estado de alarma nos vindeiros meses" no caso de rebrotes puntuais da covid-19 e "desvincular as medidas sociais e económica" da pandemia "alén deste". "Analizaranse posibles cambios" na lei de 1981 que regula os estados de alarma, sitio e excepción e "das leis sanitarias como a lei de saúde pública". Nas últimas semanas, Feijóo esixira que eses potenciais cambios fosen aprobados xa, dentro do propio estado de alarma.

Despece

  • Pedro Sánchez: "A máxima responsabilidade trasládase ás comunidades autónomas na fase 3"

    Pedro Sánchez, durante a duodécima conferencia coas presidencias autonómicas, este 31 de maio © Borja Puig de la Bellacasa / Goberno de España

    O presidente do Goberno de España, Pedro Sánchez, confirmou este domingo ao remate da duodécima videoconferencia coas presidencias das comunidades autónomas que a "última e definitiva" prórroga do estado de alarma polo coronavirus, a sexta, terá un carácter "moi distinto, moito máis livián". E tamén moito máis descentralizado.

    Na fase 3, en caso de rebrote dependería da Xunta volver atrás e se todo segue indo ben, tamén estaría nas mans do Goberno galego o levantamento das restricións

    Cando comece esa sexta prórroga, o 8 de xuño, Sánchez prevé que boa parte do Estado estea xa en fase 3. Previsiblemente, ese será o caso de Galicia, dada a baixada da incidencia de novos casos da covid-19 reportada polo Ministerio de Sanidade -o Servizo Galego de Saúde non fai público ese dato-. Nesa terceira fase cara ao que o titular do Executivo central denomina "nova normalidade", a "máxima responsabilidade trasládase definitivamente ás comunidades autónomas", confirmou.

    Na liña do acordado co PNV e ERC, a "autoridade para o desconfinamento será o presidente" de cada autonomía. Deste xeito, no caso galego será a Xunta "quen decidirá como xestionar os ritmos, as modalidades de volta á nova normalidade" e mesmo "o paso de fase e a súa duración". Isto é, en caso de rebrote dependería da Xunta volver atrás e se todo segue indo ben, tamén estaría nas mans do Goberno galego o levantamento das restricións.

    Feijóo, durante a videoconferencia con Pedro Sánchez e o resto de presidencias autonómicas, este 31 de maio CC-BY-SA Ana Varela / Xunta

    "O único que quedará" nas mans do Goberno central ata o remate da última prórroga deste estado de alarma será "a regulación da mobilidade". Non obstante, Sánchez tamén prevé que, "se non hai desviacións na evolución da epidemia, o 1 de xuño todo o territorio recupere a mobilidade".

    Tras a conferencia con Sánchez e o resto de autonomías, Feijóo dixo ignorar ata onde chegarán as competencias da Xunta na fase 3 e reiterou a petición de mobilidade interprovincial, que aplicará se pasa a ser potestade autonómica

    Á espera de coñecer a redacción concreta da prórroga, que será aprobada polo Consello de Ministros o vindeiro martes, o que xa queda claro é que a mobilidade entre comunidades autónomas seguirá nas mans do Goberno central, pero non o está tanto no referido á mobilidade interior entre as "unidades" do desconfinamento, que no caso galego son as provincias. 

    Neste escenario, nunha comparecencia celebrada ao mesmo tempo que a de Sánchez, Alberto Núñez Feijóo evidenciou que a cuestión da mobilidade seguirá sendo elemento de fricción do seu gabinete co central. Tras a conferencia, Feijóo di ignorar "en que consisten" as competencias autonómicas en materia de mobilidade e se quedará ou non nas súas mans a potestade de permitir circular entre todas as provincias galegas se, como todo apunta, entrarán ao mesmo tempo na fase 3. 

    "Se a Xunta asume o mando no estado de alarma", avanzou, "miraremos cales son as nosas competencias e actuaremos". Dende o inicio do desconfinamento, Feijóo dixo ser partidario da mobilidade interprovincial alegando a baixa incidencia da covid-19 na maioría dos concellos galegos, dato que a Xunta non fai público.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza