Un paro que son moitos e unha sensación de excepcionalidade e bloqueo que vai a máis. O xermolo do actual paro -que non folga- no sector do transporte está na Plataforma para la Defensa del Sector de Transporte de Mercancías por Carretera Nacional e Internacional. Trátase dunha entidade con sede social nunha área de servizo do concello lucense de Baamonde existente dende hai máis dunha década, pero practicamente descoñecida para a opinión pública ata os últimos meses, cando comezou a advertir da súa intención de convocar un paro xa baixo unha denominación acurtada: Plataforma Nacional.
A organización convocante ten a súa sede social nunha área de servizo de Baamonde e existe dende hai máis dunha década, pero foi case descoñecida para a opinión pública ata hai semanas, agora baixo a denominación Plataforma Nacional
A táboa reivindicativa desta organización combina esixencias máis ou menos xerais, como "prohibir por lei" que os "pequenos transportistas" poidan traballar a perdas, o "pago por lei" nun máximo de 30 días ou a xubilación aos 60 anos con outras, máis recentes, centradas nas protestas pola suba de prezos dos combustibles. Dende que comezou a ameazar cun paro indefinido, o Goberno de España veu advertindo do seu carácter minoritario e non representativo ao non ter asento no Comité Nacional de Transporte por Estrada, foro de interlocución das empresas do sector co Ministerio de Transportes.
Ao non ser parte dese Comité, a denominada Plataforma Nacional asegura non sentirse vinculada polos acordos acadados polo Goberno de España nese mesmo foro co sector o pasado decembro, cando as organizacións que si son consideradas representativas accederon a desconvocar o paro que ultimaban. Aquel pacto incluía diversas medidas, dende a prohibición de que condutores e condutoras tivesen que realizar a carga e descarga de mercadorías ata o mantemento das bonificacións ao gasóleo profesional ou o acondicionamento de novas áreas de servizo e descanso para transportistas profesionais.
Co paso dos días, a mobilización reborda os marcos da plataforma convocante no contexto de alza xeral dos prezos e, ao tempo, o seu impacto multiplícase co bloqueo de diversos sectores económicos
Con este pano de fondo, o pasado 14 de marzo comezaba o que esta plataforma convocou como "paro nacional", o Goberno de España sinalou a proximidade política dalgúns dos seus líderes coa extrema dereita. Sendo certo o apoio aberto de Vox ao paro nos seus primeiros momentos -e en Galicia, tamén de diversos cargos do PP-, non o é menos que co paso dos días a mobilización rebordou os marcos da propia plataforma.
Así, comezou a virar nunha protesta máis ou menos xeral polas subas do combustible ou a carestía da vida, en ocasións combinada con esixencias de dimisión do Goberno de España do PSOE e Unidas Podemos como as escoitadas este martes na Coruña. Pero noutras ocasións, tamén apoiada por formacións da esquerda a título individual ou colectivo.
Nesta liña, nos últimos días foron varias as cidades galegas nas que se desenvolveron marchas de camións e outros vehículos profesionais, algunhas delas secundadas tamén por tractoristas. Así sucedeu o luns en Santiago ou Vigo e así volveu acontecer este martes na Coruña ou en Lugo, onde á caravana de camións tamén se uniron taxistas.
Diversos sectores advirten dun bloqueo crecente e Transportes ofrece 500 millóns en axudas directas para os combustibles dos camións
Ao tempo, son diversos os sectores económicos que advirten dun bloqueo crecente: o peixe acumúlase nas lonxas e o leite reborda nunhas granxas xa abafadas economicamente e que agora ven como non lles dá chegado o penso para os animais. Ao tempo, nalgúns supermercados comezan a verse andeis baleiros con determinados produtos pola combinación dun subministro escaso e de acaparamentos de bens de primeira necesidade por parte dun sector da clientela.
Mentres todo isto sucede, o Ministerio de Transportes reitera que continúa negociando coas organizacións ás que si considera representativas. Nesta liña, o pasado luns anunciaba unha inxección de 500 millóns de euros en axudas directas para os combustibles do sector do transporte e mentres, en Galicia, a delegación gobernamental aseguraba que redobrará os esforzos das escoltas policiais dos transportistas que non se adhiren ao paro e desexan seguir traballando. Ao non tratarse dunha folga, non existen os servizos mínimos. A mobilización tampouco se encadra nos supostos recollidos pola lei para os peches patronais.
