O PP mantén no programa para o 10N o recorte ao rango legal das linguas oficiais diferentes do castelán

Mitin do PP en Lalín este 2 de novembro © PP

Hemeroteca

A pasada fin de semana o presidente da Xunta e líder do PPdeG, Alberto Núñez Feijóo afirmaba nunha entrevista concedida ao xornal La Voz de Galicia que "Pablo Casado está más centrado, menos áspero y estridente" na campaña das novas eleccións xerais do 10 de novembro en comparación coa carreira electoral do 28A, cando o PP descendeu ata o seu peor resultado histórico. Entre as ideas forza de Casado nesa anterior campaña estiveran as propostas que o programa do partido agrupaba baixo o epígrafe Comprometidos con el fortalecimiento de la nación e que incluían, entre outras medidas, un recorte ao rango legal das linguas oficiais diferentes do castelán e unha paralización dos traspasos de competencias ás comunidades autónomas.

Do programa do PP desaparece, cando menos de xeito explícito, a paralización de traspasos de competencias autonómicas que prometía en abril, pero permanece a mingua do rango legal de galego, euskera e catalán

Os conservadores veñen de divulgar a súa proposta programática para as novas xerais do 10N, que en boa medida é unha versión resumida do programa de abril, sintetizando en 200 puntos o que antes eran 500 e deixando en algo menos de 60 páxinas as 100 de hai medio ano. Neste novo documento manteñen, aínda que con certos matices, a súa aposta por minguar o rango legal dos idiomas oficiais no Estado que non sexan o castelán. Del desaparece, cando menos de xeito explícito, a paralización de traspasos de competencias, que Feijóo apoiara abertamente en abril.

A proposta máis clara no que atinxe á mingua do rango legal do galego, o euskera e o catalán no programa do PP refírese ao persoal das administracións públicas. Así, por dúas veces (nos puntos 80 e 168) deixa claro que, na liña do promovido por Ciudadanos na pasada lexislatura estatal, abrirían legalmente a porta a poder obter un emprego público en Galicia sen entender o galego. "A única lingua cuxo coñecemento será un requisito indispensable para o acceso a un emprego público será o castelán", di o programa. 

Páxinas dos programas electorais do PP para o 10N (esquerda) e o 28A (dereita) CC-BY-NC-SA Praza Pública

O PP promete que as linguas oficiais diferentes do castelán "nunca" serán "un requisito" para poder acceder a un posto na Administración pública

Nesta liña, como en abril, o programa traza unha distinción entre idiomas oficiais para asegurar que "as linguas cooficiais", condición da que exclúe o castelán malia ser tal, "poderán considerarse un mérito, nunca un requisito excluínte". Neste sentido, agrega que "as Administracións elaborarán plans de formación para que os funcionarios atendan os cidadáns na lingua oficial que elixan", se ben terían oportunidade de aprendela unha vez acadado o posto.

Nun sentido semellante, os de Pablo Casado prometen máis recentralización educativa. "A lingua vehicular ordinaria do ensino en todo o territorio español será o castelán", advirte o programa, que despois agrega que "naquelas comunidades autónomas nas que existan linguas cooficiais", condición legal da que volve excluír o castelán, "estas poderán tamén ser previstas como linguas vehiculares".

Documentos oficiais, só válidos en castelán?

Estas e outras medidas en materia idiomática estarían condensadas, segundo o programa do PP, nunha "lei de linguas". Prométena aprobar, no caso de lograren maioría parlamentaria no Congreso, para "garantir o dereito a usar o español en todo o territorio nacional, en todas as relacións coa Administración e en calquera actividade privada".

O programa para o 10N non explicita a promesa de que só sexan válidos os actos administrativos en castelán pero si mantén a proposta dunha "lei de linguas" que, segundo o programa do 28A, incluiría esa medida

Ao contrario do que sucedía antes do 28A, o PP non especifica desta volta no seu programa cal sería o contido desa lei. No programa de abril -punto 12- si se estendían máis na explicación. Así, advertían de que en virtude desa nova lexislación, "só terán carácter oficial aqueles actos administrativos que se realicen, cando menos, en castelán". Isto é, un documento redactado só en galego, catalán ou euskera non sería válido ante a Administración.

Esa promesa, que non se inclúe de xeito explícito no programa do PP para o 10N porque só se refire xenericamente a esa "lei de linguas", contradí varias leis aprobadas baixo gobernos do PP tanto en Galicia como en España. Así, por exemplo, a vixente lei de procedemento administrativo común, aprobada en 2015 con Rajoy no Goberno, fixa entre os "dereitos das persoas nas súas relacións coas Administracións públicas" o de "utilizar as linguas oficiais no territorio da súa comunidade autónoma" segundo a lexislación vixente.

Despece

  • O PPdeG esfórzase en facer ver que Feijóo non cre que Galicia sexa unha nación

    D.L.

    Formacións de extrema dereita, así como colectivos contrarios ás medidas de normalización da lingua galega que noutrora apoiaran o PP galego fronte ao Goberno de coalición de PSdeG, atacan periodicamente a Alberto Núñez Feijóo cualificándoo de "nacionalista galego". Utilizan como presuntas probas desa acusación intervencións do presidente da Xunta pronunciadas en galego ou mensaxes da Xunta por datas sinaladas como o Día das Letras. 

    Tamén adoitan botar man dunha intervención de Feijóo nunha conferencia pronunciada en novembro de 2014 en Barcelona na que foi cuestionado polo carácter nacional de Galicia. Estas organizacións fan rexurdir nas redes sociais de cando en vez uns poucos segundos daquela conferencia, encadrada nun ciclo do Cercle d'Economía e moderada polo catedrático galego Antón Costas, que presidiu esa institución. Volvérono facer en plena campaña das eleccións xerais do 10N e o PPdeG esforzouse en facer ver que, en realidade, Feijóo non considera que Galicia sexa unha nación.

    Naquela conferencia de novembro de 2014 Feijóo di que "historicamente, temos moitos elementos para considerarnos (...) nación sen Estado" e agrega que se negou a que Galicia fose definida como tal na fracasada reforma do Estatuto

    Naquela intervención pública o titular da Xunta reflexionara a respecto de que "se vostede colle a historia de Galicia e a historia de Cataluña, con todos os exempos e matices que se poden poñer", ao seu xuízo "historicamente, temos moitos elementos para considerarnos o que na terminoloxía se di nación sen Estado". Este é o punto no que adoita concluír a gravación cando é utilizada polas devanditas organizacións de extrema dereita.

    Non obstante, a intervención continúa. "Eu fun convocado ás xuntanzas para a reforma do Estatuto de Galicia e a formulación era dicir que Galicia era unha nación", evoca Feijóo a respecto do encontro con Emilio Pérez Touriño e Anxo Quintana o 17 de xaneiro de 2007 na residencia oficial de Monte Pío, onde a proposta de incluír no preámbulo o carácter nacional galego foi unha das razóns esgrimidas polos populares para rachar a negociación. "Eu puiden dicir que si, pero preferín seguir na oposición", afirma, "porque non lle ía achegar nada a Galicia, nin sequera ao Estado".

    O PPdeG enfatiza que nesa intervención Feijóo non afirmaba que Galicia fose unha nación, senón "exactamente o contrario"

    No que semella ser unha resposta a un mitin de Vox ao que acudiu un centenar de persoas en Ourense este luns, as redes sociais do PPdeG divulgaron este vídeo este 4 de novembro. Ese partido, di o PPdeG, "fai circular" o vídeo "manipulado" para "acusar" a Feijóo "do que non é". Segundo os populares, o seu líder "di exactamente o contrario" a que Galicia sexa unha nación e naquel proceso de reforma do Estatuto "negouse" a que fose definida como tal. "Leccións de combater ao nacionalismo non lles aceptamos nin unha", proclaman. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza