A deputada do BNG Noa Presas asegura na Cámara que a derruba acontecida o pasado 29 de marzo na área de Pediatría do hospital Materno Infantil de Ourense "non é un accidente, é unha neglixencia"
"Canto tempo estiveron prestándose en Ourense os servicios de Xinecoloxía, Obstetricia e Pediatría nun edificio que non era seguro?", interpelou este martes a deputada do BNG Noa Presas no pleno do Parlamento, en relación coa información publicada en Praza.gal sobre o coñecemento do risco de derrubamentos no Hospital Materno Infantil por parte da Xunta.
Noa Presas asegurou na Cámara que a derruba acontecida o pasado 29 de marzo na área de Pediatría "non é un accidente, é unha neglixencia". "Esta é a imaxe da vergoña, pero é tamén a gota que colma o vaso da situación de deterioro absoluto na que está este edificio e, por extensión, a área sanitaria de Ourense, Verín e Valdeorras", incidiu a deputada nacionalista cunha fotografía do falso teito do hospital destrozado na man.
A deputada do BNG aseverou que o acontecido no hospital ourensán "é de extrema gravidade e require de máxima transparencia, a transparencia que non tivo a Xunta até o de agora, e a celeridade que tampouco tivo a esperada decisión de desaloxar o edificio". Presas critiou que as accións da Consellería de Sanidade chegaron "tarde" porque "tardaron máis de 48 horas" en recoñecer o risco presente no edificio do Materno Infantil e non o fixeron "ata que houbo presión social ás portas do hospital". Ademais, o desaloxo total non se completará ata o verán, segundo avanzou o propio conselleiro de Sanidade.
A Comisión de Centro do CHUO denuncia a toma de decisións "unilaterais, sen acordo nin comunicación aos órganos de representación dos traballadores e traballadoras" da dirección de Enfermería
A deputada do PSdeG Carmen Rodríguez Dacosta falou da súa experiencia en primeira persoa, tras dar a luz á súa filla o pasado xaneiro neste hospital. "Os sons do taladro e o martelo que repicaban no cuarto de enfronte foron un dos primeiros sons que atravesaron os seus oídos na súa primeira mañá de vida, nunhas instalacións precarias, obsoletas, decadentes e o máis afastado do que pensas que queres que sexa o primeiro que vexa o teu fillo cando vén a este mundo", sostivo.
A Comisión de Centro do CHUO denunciou esta semana a "falta de diálogo constante" coa dirección de Enfermería, así como a "habitualidade" de toma de decisións "unilaterais, sen acordo nin comunicación aos órganos de representación dos traballadores e traballadoras e pretendendo, ademais, impoñer as mesmas á marxe dos acordos firmados coa Comisión de Centro". As e os profesionais reclaman "información veraz" á xerencia da área sanitaria para saber das unidades a mobilizar, o número de camas afectadas, a actividade realizada e a relación de profesionais por planta e quenda".
Ante as denuncias da Comisión de Centro do CHUO, desde o BNG propuxeron a creación dunha "mesa de traballo" contando cos e coas traballadoras para "definir as actuacións a tomar e tamén os usos e condicións do futuro edificio".
"Canto tempo levamos 300.000 persoas en Ourense soportando esta situación? E canto tempo hai que os técnicos da Xunta recomendaban que este edificio tiña que ser demolido?", incidiu Noa Presas, quen tamén reclamou que se saiba "con luz e taquígrafos" o que sucedeu porque "afortunadamente non houbo danos persoais, pero iso non exime de responsabilidades políticas a Xunta".
Tanto Noa Presas como Carmen Rodríguez Dacosta instaron a Xunta a "desbloquear a parálise das obras" e a aplicar a "transparencia" nas súas accións nesta área sanitaria
Pola súa banda, a deputada do PP Encarna Amigo respondeu salientando que os investimentos no Complexo Hospitalario Universitario de Ourense (CHUO) "superan os 80 millóns de euros desde o ano 2020" por parte da Xunta. Amigo centrouse nas obras do novo hospital, paralizadas desde hai seis meses, como veñen denunciando BNG e PSdeG. A parlamentaria popular insistiu en referirse ao "proceso de modernización e renovación" do centro hospitalario ourensán na súa intervención. "Esta obra vai permitir a construción dun novo hospital Materno Infantil que vai substituír ao actual para garantir un maior rendemento do investimento, unha maior vida útil e unha mellor atención ás familias ourensás", afirmou.
Tanto Noa Presas como Carmen Rodríguez Dacosta instaron a Xunta a "desbloquear a parálise das obras" e a aplicar a "transparencia" nas súas accións nesta área sanitaria. A nacionalista lembrou que demoler o Materno para levalo a un novo edificio non foi o primeiro plan da Xunta, que a idea inicial de Feijóo foi reformalo e construír un novo edificio só de hospitalización, un plan que "debería estar rematado en 2025". Porén, "hoxe o Materno non está remodelado e está caendo a cachos, e hoxe o novo edificio non está nin construíndose", evidenciou. "Ademais, en meras palabras quedou tamén o anuncio, feito este verán, de que finalmente o edificio do Materno sería demolido para construírse un novo", agregou Presas.
