As eleccións que marcaron o inicio do ano político en Galicia estiveron marcadas, entre outros aspectos, por un bo feixe de vídeos dos partidos políticos concibidos para a súa difusión a través de internet, quer polas redes sociais, quer mediante mensaxería. Gravacións que ían alén do tradicional anuncio para contar unha pequena historia, aguilloar o electorado propio ou sinalar os defectos alleos mediante a proximidade ou o humor.
Continuaron así unha tendencia dos últimos anos que vén virando en tradición divulgar este tipo de montaxes e que ten no Nadal unha das paradas audiovisuais case obrigatorias. Neste 2024 volveu acontecer, ata agora cando menos por parte das que actualmente son as dúas principais forzas políticas do Parlamento, o PP e o BNG.
No vídeo do PP Rueda dirixe un coro de dirixentes do partido á procura, afirma, dun Nadal que "soe ben para todos"
Os populares presentan este ano un vídeo que segue o ton dos da primeira campaña de Alfonso Rueda como candidato. O presidente da Xunta e do PPdeG vira na montaxe en director dun coro formado por coros do partido para interpretaren dende panxoliñas ao Xuntos de Juan Pardo que recuperaron como himno para o 18F. O ex-presidente Alberto Núñez Feijóo ou Mariano Rajoy son as estrelas convidadas nunha gravación na que mesmo conviven cargos que habitualmente non o fan tanto, caso da secretaria xeral, Paula Prado, co presidente do Parlamento, Miguel Santalices.
Asegura o partido que sustenta o Goberno que con este vídeo pretenden transmitir o que Rueda afirma nel. "Que este Nadal soe ben para todos os galegos e galegas" porque "cando os galegos nos xuntamos, soamos moi ben", di nunha gravación que tamén deixa oco, non obstante, para as mencións en clave de retranca ao denominado caso Koldo ou á crise dos pellets.
A mensaxe de harmonía que, defende o PPdeG, pretende espallar cara ás festas contrasta coa outra parte da estratexia do partido nas redes nos últimos días. Aproveitando precisamente a proximidade do Nadal, os populares desenvolveron varias accións, caso dun calendario de advento no que caricaturizan a Pedro Sánchez para atribuírlle diversas acusacións ou montaxes nas que se mofan de BNG e PSdeG aproveitando o sorteo da Lotaría. Harmonía e un chisquiño de trolls.
A panxoliña de Ana Pontón e 'Mini'
O BNG, pola súa banda, elixiu nesta ocasión felicitar o Nadal nunha panxoliña. Despois de que, en anos anteriores, o histórico músico Xosé Luís Rivas Mini recuperase como deputado do Bloque algún canto tradicional de Nadal dende a tribuna do Parlamento, agora que xa non é membro do lexislativo vólveo facer pero cantando con Ana Pontón, portavoz nacional da formación soberanista, dende a Alameda de Santiago, a panxoliña Falade ben baixo.
Polo momento, o PSdeG non divulgou ningunha gravación específica para felicitar o Nadal. O ton das festas, non obstante, si está presente no último episodio do vídeo blog que o voceiro da súa Executiva Nacional, Julio Torrado, mantén para resumir cada semana o máis destacado da actividade política da formación que encabeza José Ramón Gómez Besteiro.
