Ana Pontón lembrou que na pasada lexislatura “un deputado e unha senadora do Bloque coas mans libres conseguiron máis para Galiza que toda a procesión dos caladiños do PP-PSOE”
“Pídolle as galegos e as galegas que pensen en todo o que imos poder facer para mellorar as súas vidas e para defender Galiza en Madrid cun BNG máis forte no Congreso”, recalcou a portavoz nacional, Ana Pontón, tras recordar que na pasada lexislatura “un deputado e unha senadora do Bloque coas mans libres conseguiron máis para Galiza que toda a procesión dos caladiños do PP-PSOE”.
O BNG concorre ás eleccións do 29N cun decálogo de compromisos “para defender Galiza en Madrid, conquistar máis dereitos e mellorar a vida da xente”, tal e como destacou a portavoz nacional, Ana Pontón, que presentou esta “Axenda Galega” xunto ás cabezas de lista pola Coruña, Néstor Rego; Pontevedra, Carme da Silva; Lugo, Olalla Rodil; e Ourense, Noa Presas.
Poñer a vida das persoas no centro, defender unha economía a favor da xente, ter máis capacidade para decidir sobre o noso e traballar por unha Galiza comprometida coa democracia e coa paz son, precisamente, os eixos da Axenda Galega
“Nestas eleccións os galegos e as galegas temos a oportunidade de incrementar o peso político de Galiza no Estado, de facernos valer e facernos respectar, e de non permitir o guión da discriminación que practica sistematicamente o bipartidismo, que fai que Galiza sexa terra de sacrificio”, asegurou Pontón, para destacar que o BNG aspira, co seu decálogo de compromisos, a acadar unha maior representación para seguir dando a batalla por Galiza e pola clase traballadora “con máis forza que nunca” a partir do 29-N.
Con ese obxectivo, pediu concentrar o voto no Bloque porque “se sumamos no BNG o voto de cada persoa que leva Galiza na cabeza e no corazón, seremos unha forza imparable”, dixo, para que a voz dos galegos e galegas “pete na mesa” do Estado, “para defender o País, para conquistar dereitos e para construír un futuro mellor para todos e todas”.
Poñer a vida das persoas no centro, defender unha economía a favor da xente, ter máis capacidade para decidir sobre o noso e traballar por unha Galiza comprometida coa democracia e coa paz son, precisamente, os eixos da Axenda Galega, segundo informaron desde o BNG.
Nun momento “no que medran os discursos de odio, a xenofobia e a intolerancia”, a aposta do BNG é tamén avanzar en dereitos, en igualdade, en feminismo e en inclusión social. “Neste 29N, nin un paso atrás na defensa dos nosos dereitos e liberdades”, apuntou
“Todo o mundo ten dereito a unha vida digna, a ter un salario decente que lle permita chegar a fin de mes, a ter unha casa na que poder desenvolver o seu proxecto de vida”, asegurou Pontón, que salientou tamén, entre os compromisos do BNG, a defensa dos servicios públicos de calidade, na educación na sanidade ou na atención á dependencia. “Unha vida digna debe ser o normal, non un privilexio”, sintetizou.
Nun momento “no que medran os discursos de odio, a xenofobia e a intolerancia”, a aposta do BNG é tamén avanzar en dereitos, en igualdade, en feminismo e en inclusión social. “Neste 29-N, nin un paso atrás na defensa dos nosos dereitos e liberdades”, apuntou.
Entre os compromisos plasmados na Axenda Galega atópase, por outra banda, a defensa dunha economía a favor da maioría, o que significa “poñerlle fin aos privilexios das eléctricas e a ese deseño centralista que fai que a nosa riqueza, como sucede coa enerxía, sirva para desenvolver fundamentalmente o centro do Estado, Madrid, mentres aquí non temos beneficios e si prexuízos”. “Basta de espolio e de que uns poucos fagan negocio co que é de todos e todas”, proclamou.
Pontón defendeu que Galiza, da man do BNG, precisa ter máis forza ante o Estado tamén para “poder decidir sobre o noso” porque “sabemos que cando deciden por nós desde Madrid, en demasiadas ocasións, Galiza perde”. De aí que avanzar no autogoberno, con máis competencias, sexa outro dos eixos no decálogo nacionalista.
A Axenda Galega consiste tamén nunha Galiza comprometida coa democracia e coa paz, nun escenario no que “non chega con dicir non á guerra”. “A coherencia di que si dicimos non á guerra, hai que frear ese desorbitado incremento do gasto militar, que o único que fai é alimentar a morte e a destrución impedindo ademais que eses recursos vaian para vivenda, dependencia ou atención ás persoas maiores”, argumentou.
O cabeza de lista pola Coruña, Néstor Rego, pola súa banda, centrou a súa intervención na parte económica do decálogo e destacou, neste punto, que “a transición ecolóxica xusta na Galiza pasa imperativamente por acabar co espolio dos nosos recursos naturais e deixar de ser zona de sacrificio para nutrir de millóns de euros ás grandes empresas enerxéticas con sede en Madrid” .
Olalla Rodill detallou que o Bloque defenderá en Madrid a xubilación ordinaria aos 65 anos e blindar o sistema público de pensións “fronte as ameazas do Partido Popular e de Vox”
A cabeza de lista por Pontevedra Carme da Silva fixo parte na presentación do decálogo subliñando que é preciso actuar en materia de vivenda “con contundencia, urxencia e valentía”. Afeou ao Estado e á Xunta ter tratado a vivenda exclusivamente como un ben de mercado, deixándoa en mans das grandes promotoras e fondos voitre ou actuando nos minutos de desconto.
Pola súa parte, a cabeza de lista por Ourense, Noa Presas, apelou a todas esas persoas decepcionadas coas promesas incumpridas por parte de PSOE e Sumar: "Uns piden sacrificios e outros que se autodenominan os máis progresistas do mundo non paran de engordar o gasto militar" denunciou Presas, sinalando que o BNG non está "nin para volver atrás coa dereita máis ultra nin para conformarse con que todo siga igual".
A cabeza de cartel por Lugo, Olalla Rodil, explicou que defender “o dereito da xente a vivir dignamente do seu traballo o dunhas pensións xustas” é un dos eixos fundamentais da Axenda Galega do BNG, na que se inclúe, entre outras propostas, o incremento do Salario Mínimo Interprofesional e as s pensións mínimas até o 60% do salario medio. Detallou, así mesmo, que o Bloque defenderá en Madrid a xubilación ordinaria aos 65 anos e blindar o sistema público de pensións “fronte as ameazas do Partido Popular e de Vox”. “Temos o compromiso firme defender as pensión como unha das grandes conquistas das traballadoras e dos traballadores e un dereito para as futuras xeracións tamén”, salientou.
