As forzas políticas reciben este venres o plan de cobertura elaborado pola CSAG para o 29N, cun só debate televisivo matinal e noutro na Radio Galega ás oito do serán. RTVE propón tres de ámbito estatal en horario de máxima audiencia
Entre os múltiplos trámites que implica a convocatoria das eleccións xerais para o 29 de novembro está a elaboración, polos medios de comunicación públicos, dos plans de cobertura da campaña dos comicios. Tanto RTVE como a CSAG, a antiga CRTVG, están obrigados a os elaborar seguindo criterios baseados nos votos obtidos nas anteriores eleccións á hora de repartir tempos nos informativos e con máis marxe de manobra á hora de decidir outras cuestións, coma o número de debates que organizan, os seus formatos e horario.
RTVE xa presentou o seu plan de cobertura do 29N ante a Xunta Electoral Central -con prazo de reclamacións ata este venres, día 6- incluíndo tres debates "en horario de máxima audiencia" simultaneamente TVE, RNE e os seus sitios web: un "cara a cara" entre Pedro Sánchez e Alberto Núñez Feijóo, outro coas oito formacións que tiveron grupo propio nesta lexislatura no Congreso e outro a catro bandas cos cabezas de cartel de PSOE, PP, Vox e Fronte Ampla. A CSAG, pola súa banda, presenta este venres ás forzas políticas o seu plan que, segundo puido saber Praza.gal, contempla un só debate televisivo en horario matinal.
Este xornal puido confirmar que, na liña do decidido pola antiga CRTVG en anteriores eleccións xerais, a Televisión de Galicia prevé convidar a un debate ás forzas que obtiveron representación nas anteriores xerais (PP, PSdeG, Fronte Ampla -como forza herdeira de Sumar- e BNG). Emitirase na televisión de Galicia o primeiro luns da campaña, 16 de novembro, ás nove e media da mañá -media hora antes que en anteriores campañas, caso da de 2023- con redifusión ás dez e media da noite na G2 e publicación no web da CSAG. Cada partido debe enviar á persoa que elixa das súas listas ao Congreso ou ao Senado polas circunscricións galegas.
PP, PSdeG, Fronte Ampla e BNG elixirán as quendas de apertura e peche dos catro bloques temáticos dos debates e a súa situación no estudio por orde dos votos obtidos en 2023 e non por sorteo
Xa en anteriores eleccións xerais -non así nas galegas- a dirección dos medios públicos galegos xustificara a emisión de debates electorais en horario matinal e non na franxa de prime time, a de potencial máxima audiencia. O ex-director xeral da corporación, Alfonso Sánchez Izquierdo, defendérase das críticas alegando que programar un debate electoral ás 10 da mañá permitía "comezar o día construíndo a axenda da actualidade e que os galegos e galegas sexan os primeiros en coñecer a opinión dos seus representantes". As 9:30 da mañá tamén será a hora de emisión das entrevistas televisivas con candidatos e candidatas.
No caso da Radio Galega o debate celebrarase unha semana despois, o día 23 e a CSAG prográmao para o serán, de 20:00 a 21:00. En ambos casos, confirman as fontes consultadas por Praza.gal, durarán unha hora e estarán estruturados en catro bloques temáticos sobre vivenda, custo da vida, infraestruturas e servizos públicos e mais situación política xeral e "rexeneración democrática".
En canto ás quendas de intervención, a CSAG non contempla os sorteos -como noutros casos e canles-, senón que prevé que cada partido elixa en que bloque desexa intervir primeiro ou pechar, establecendo como criterio para elixir que o faga primeiro o que máis votos obtivo nas eleccións xerais de 2023 en Galicia (o PP) e a continuación, as demais por orde decrecente. Este criterio tamén será o que valerá para decidir onde se sitúa cada candidato ou candidata no estudio. O minuto final de intervención de peche tampouco se sortea, senón que se realiza por orde inversa de representación (comeza o BNG e remata o PP).
No que atinxe aos bloques electorais dos servizos informativos, durarán seis minutos en cada edición do Telexornal na TVG e dos espazos Galicia por diante, A Crónica 14h e a Crónica 19h da Radio Galega. En transposición das porcentaxes de voto de 2023, o PP disporá de algo máis do 43% do tempo; o PSdeG algo menos do 30%, Fronte Ampla de algo menos do 11% e o BNG, e pouco máis do 4%. As forzas que non obtiveron representación daquela ou non se presentaron aparecerán "puntualmente", como adoito.
