Salvamento Marítimo sinala que rexistrou unha vía de auga a 64 millas de Irlanda
O pesqueiro Piedras, con base en Marín e que operaba no Gran Sol, quedou á deriva nas últimas horas a 64 millas de Irlanda tras rexistrar unha vía de auga e un incendio a bordo. Salvamento Marítimo informa de que os seus 11 tripulantes foron “rescatados en bo estado” por outro pesqueiro, o Armaven Uno.
Segundo Salvamento Marítimo, a operación de rescate foi coordinada polos centros de salvamento de Falmouth, no Reino Unido, e Valentia, en Irlanda, e seguida polo servizo de salvamento español. O buque presenta unha forte escora e quedou á deriva. Entre os tripulantes rescatados hai españois, marroquíes e ghaneses.
O novo accidente chega tres meses e medio despois do afundimento doutro pesqueiro de Marín, o Villa de Pitanxo, en Terranova, cando faleceron ou desapareceron 21 dos seus 24 tripulantes.