Xabaril, perdiz, arcea e pomba rexistraron a maior cifra de exemplares abatidos da última década malia a caída progresiva de licenzas

A tempada de caza 2022-23 deixou un total de 221.816 animais mortos en Galicia, a maior cifra da serie histórica, un 23,7% máis que a tempada anterior e un 8,6% máis que os 204.000 animais mortos na tempada 2018-19, previa á pandemia da COVID-19. Así se reflicte no último Anuario de Estatística Forestal que vén de facer público o Ministerio para a Transición Ecolóxica con cifras facilitadas polas comunidades autónomas pero que en Galicia a Xunta evita divulgar. 

Xabaril, arcea, perdiz e pomba rexistraron nesa última tempada con datos agora dispoñibles a maior cifra de exemplares abatidos da última década malia a caída progresiva de licenzas que se vén rexistrando en Galicia, onde a Xunta activou a renovación automática e de balde dos permisos para as persoas maiores de 65 anos, o que pode facer que en próximos anos se sigan contabilizando como cazadores a persoas que realmente xa se retiraron da actividade pero ás que o Goberno galego renovou igualmente a autorización.

A caza menor de aves dispárase de 79.000 a 110.000 exemplares mortos

Segundo os datos agora revelados polo Estado, é sobre todo a caza menor de aves a que empurra á alza as cifras de animais mortos, con 110.000 exemplares abatidos na tempada 2022-23 fronte aos preto de 79.000 do ano anterior ou os 99.000 do pico anterior acadado en 2018-19. Pero tamén a caza menor de mamíferos logra a súa cifra máxima, con 89.000 exemplares, 4.000 máis que en 2018-19. 

Pola contra, a caza maior mantense estable en algo máis de 21.000 exemplares abatidos, entre os que seguen destacando con moita distancia os xabarís. Os 18.463 exemplares desa especie abatidos na tempada 2022-23 marcan un novo máximo, tras varios anos de progresivas liberalizacións da súa caza aprobadas pola Xunta para tentar combater así os seus danos a plantacións agrícolas.

A caza maior segue tendo no xabaril o principal obxectivo, con 18.400 exemplares mortos, pero tamén caeron corzos, cervos e mesmo cabra montés e muflón

Se en 2019 se autorizou a caza sen límite de xabaril a través da figura da  emerxencia cinexética en 4 das 53 comarcas de Galicia, en 2021 foron 29 comarcas, o pasado ano 37 e este ano son 40 comarcas. 

Unhas medidas que desde as organizacións ecoloxistas contrapoñen co feito de que o Goberno galego queira poder cazar tamén lobos, depredadores dos xabarís e cuxa poboación axudarían tamén a conter.

A caza maior mantense estable porque o lixeiro aumento da caza de xabarís compensa a lixeira redución rexistrada na caza doutras especies como o corzo, que pasou de 3.003 a 2.784 exemplares, ou o cervo, que pasou de 237 a 233 abatidos. Segundo os datos agora revelados polo ministerio, a tempada 2022-23 tamén supuxo retomar a caza de cabra montés e muflón, sen constancia de novos abatementos desde hai anos dunhas especies só presentes no parque do Xurés.

Na caza menor de mamíferos caeron 77.800 coellos e 6.000 raposos

No que respecta á caza menor, os datos agora revelado da tempada 2022-23 reflicten un aumento significativo das mortes de perdiz (pasa de 12.000 a 36.000 abatidas) e arcea e pomba (as dúas especies aumentan de 16.000 a 22.000 exemplares abatidos). Pero a principal especie de caza menor segue ser, con diferenza, o coello, con 77.800 exemplares mortos, cifra próxima ao pico de 79.500 acadado na tempada 2018-19.

As novas cifras reflicten igualmente un significativo incremento da caza do raposo, que pasa dos 2.000 exemplares mortos nas dúas anteriores tempadas a 6.000 na 2022-23 agora desvelada polo ministerio.