Ante o rexeitamento expresado pola Xunta da súa Facultade de Medicina, o Consello de Goberno da USC decidiu non votar o acordo ao que chegaron as tres universidades e a Xunta e adiou a votación prevista para hoxe, necesaria para que o proceso poida continuar, sen fixar un prazo para ela
O pasado 6 de novembro os reitores das tres universidades públicas galegas e os representantes das consellerías de Educación e Sanidade chegaron a un acordo para a descentralización da docencia do Grao de Medicina, un pacto que foi ratificado uns días despois. Semellaba o remate do conflito aberto entre a Universidade de Santiago por unha banda e a Universidade da Coruña e a Universidade de Vigo para a organización destes estudos en Galicia.
Porén, o rexeitamento ao acordo expresado este luns pola Xunta da Facultade de Medicina da Universidade de Santiago auguraba xa crecentes dificultades para unha saída de consenso. E este venres o acordo semella máis lonxe.
Primeiro, o Consello de Goberno da USC rexeitou votar o acordo, aprobado xa polo Consello de Goberno da UDC, e decidiu adiar a votación sen fixar un prazo para ela, necesaria para que o proceso poida continuar. Na decisión pesou de maneira fundamental o rexeitamento da Xunta da súa Facultade de Medician. En resposta, a UDC anunciou esta tarde retomar "os traballos para impulsar unha nova titulación de Medicina na Coruña".
En resposta, a UDC anunciou esta tarde que retoma "os traballos para impulsar unha nova titulación de Medicina na Coruña", engadindo que "desde o inicio consideramos como a mellor opción para dar resposta á demanda existente e avanzar nun novo modelo formativo"
Nun comunicado feita público pola USC, a universidade Compostelá sinala que o Consello de Goberno "valorou positivamente o acordo" e informa de que "decidiu ademais abrir un diálogo coa Facultade de Medicina e Odontoloxía para tratar de acadar un punto de consenso que permita a súa incorporación ao acordo proposto traballando no marco da Comisión de Seguimento".
O obxectivo, indica, é tratar de "asegurar os obxectivos que figuran no marco do actual convenio ao tempo que se abre a posibilidade de, conforme avance a definición das cuestións técnicas do mesmo, se atendan e incorporen asuntos que a Facultade sinala esenciais que requiren de consenso coas outras partes asinantes do acordo".
Horas despois chegaba a reacción da Universidade da Coruña, que a través dun breve comunicado, lamentaba "a situación producida hoxe, na que unha das partes non deu por bo o acordo ao que se chegou no Consello de Coordinación da Docencia Clínica a pasada semana". Unha decisión, engade a UDC, que "supón deixar sen validez moitas horas de traballo empregadas para procurar un texto dialogado e consensuado que permitise aplicar a descentralización de Medicina aproveitando todos os recursos do sistema sanitario e universitario galego".
A Universidade da Coruña, que destaca que actuou "en todo momento con lealdade ao Sistema Universitario de Galicia", informa finalmente da recuperación do seu plan inicial para contar cunha titulación propia de Medicina, engadindo que se trata dunha fórmula que "desde o inicio consideramos como a mellor opción para dar resposta á demanda existente e avanzar nun novo modelo formativo".
