O TSXG fai pública unha nova sentenza que volve reflectir o uso de vehículos máis antigos e distintos dos comprometidos
O Tribunal Superior de Xustiza de Galicia (TSXG) vén de facer pública unha nova sentenza que avala penalizacións a empresas de transporte escolar por incumprir os seus contratos, desta volta a unha unión temporal de empresas que presta servizo a varios centros educativos da zona de Carballo. Entre os incumprimentos, xunto con outros xa sancionados pola xustiza noutras zonas e empresas como empregar vehículos máis antigos ou distintos dos comprometidos, figura desta volta "realizar transbordos non autorizados do alumnado entre varios vehículos".
A sentenza ratifica catro penalidades impostas pola Xunta por importe total de 9.000 euros. A máis importante, de 5.000 euros, por un "incumprimento moi grave", penaliza "irregularidades detectadas no servizo de transporte escolar os días 1 e 5 de febreiro de 2024 ao IES Alfredo Brañas e ao IES Monte Neme consistente en realizar transbordos non autorizados do alumnado entre varios vehículos na para da A Milagrosa", situada no centro de Carballo.
A unión de empresas penalizada tentou argumentar no proceso xudicial que os transbordos non están prohibidos expresamente no prego de condicións do contrato, pero o tribunal di que "iso non significa que estean permitidos" e que a súa obriga é realizar "as paradas previstas para os cometidos establecidos no contrato (subida e baixada de alumnos), non para transbordos, que conlevan que usuarios de curta idade teñan que apearse do autobús para subir a outro".
A sentenza tamén avala outras tres penalidades: de 3.000 euros por un incumprimento grave ao empregar tres vehículos cunha antigüidade superior á ofertada pola empresa, de 500 euros por incumprimento leve por empregar un vehículo distinto dos comunicados á Xunta, e outra de 500 euros por outro incumprimento leve por empregar tres vehículos "que non dispoñen de cartel indicador do servizo ou con escasa visibilidade".
Hai tempo que a xustiza vén emitindo sentenzas que deixan constancia de eivas no transporte escolar, pero hai dous anos a Xunta prorrogou todos os seus contratos e aínda agora está a desenvolver un novo concurso para renovalos
Hai tempo que o TSXG vén emitindo sentenzas como esta que deixan constancia de eivas no transporte escolar como buses sen cintos de seguridade homologados, con alumnado de pé ou mollado e "de tres en tres", con buses máis antigos e contaminantes do comprometido polas empresas, e mesmo con estas tomando a "decisión consciente de incumprir o contrato".
Malia estes incumprimentos, hai dous anos a Xunta prorrogou todos os seus contratos de transporte escolar e aínda agora está a desenvolver un novo concurso público para renovalos.
