O alto tribunal avala ao Tribunal Militar da Coruña que o considerou culpable dun delito de abuso de autoridade e o condenou a seis meses de cadea e suspensión de emprego
O Tribunal Supremo vén de facer pública unha sentenza, con data do 20 de xullo, coa que ratifica outra previa do Tribunal Militar da Coruña que condenou a un garda civil de Monforte por enviar mensaxes sexuais a unha subordinada, feitos considerados un abuso de autoridade na súa modalidade de acoso sexual. O axente é así condenado a seis meses de cadea e suspensión militar de emprego durante ese mesmo tempo así como a indemnizar a vítima con 4.170 euros. Ademais, estableceuse a responsabilidade subsidiaria do Estado no pagamento da indemnización por sucederen os feitos en acto de servizo.
Segundo os feitos probados da primeira sentenza, revelada por Praza.gal, en febreiro de 2023, estando condenado e vítima no seu posto de traballo na plana maior da compañía da Garda Civil en Monforte de Lemos, o brigada enviou á axente dúas mensaxes distintas de contido sexual. A primeira, a primeira hora da mañá, dunha "persoa espida sobre outra" a semellanza do coñecido home de Vitrubio de Leonardo da Vinci que o tribunal considera "un meme" para "facer un requirimento de relación sexual" ao que a axente contestou que non lle mandase "guarradas".
Tres horas máis tarde o brigada enviou unha segunda mensaxe cun vídeo no que "aparece unha muller berrando mentres é penetrada violentamente por un home co seu pene". Unha "montaxe de vídeo cunha relación sexual explícita pornográfica" que segundo o tribunal "tivo a aptitude para provocar" na vítima "unha situación obxectiva e gravemente intimidatoria, hostil ou humillante".
Aquela primeira sentenza considerou que "nos atopamos cunha proposición ou insinuación sexual efectuada por un brigada da Garda Civil respecto a unha garda civil, subordinada directa, conduta que se leva a cabo en horario laboral, mentres se atopan desempeñando as súas funcións". Unha "conduta claramente atentatoria á dignidade e liberdade sexual da garda civil" que o tribunal considera delito de abuso de autoridade na modalidade de acoso sexual.
Ante esa sentenza o axente recorreu ao Supremo con diversos argumentos, como que o tribunal fixera unha valoración das probas irracional e arbitraria, que a declaración da vítima debía ser insuficiente para condenalo, ou que se lle aplicara mal o tipo delitivo. Pero o Supremo desbota todos os seus argumentos e ratifica en todos os seus extremos a sentenza do Tribunal Militar da Coruña.
O Supremo di que "o envío das mensaxes" é "un feito incuestionado" e que ademais ante o tribunal da Coruña compareceron 14 testemuñas
A sentenza do Supremo lembra que se tivo en consideración "non só a declaración da denunciante senón tamén a proba documental incorporada", "incuestionada polas partes e que consiste na pericia do vertido do contido do teléfono da denunciante". Así, di que "o envío das mensaxes" é "un feito incuestionado polo recorrente".
Tamén lembra que "no presente caso o tribunal de instancia escoitou durante a vista oral os testemuños de nada menos que catorce testemuñas". E di que "non se aprecia irracionalidade ou arbitrariedade algunha nesta valoración do tribunal de instancia". Por todo iso, o Supremo conclúe desestimando o recurso do axente e ratificando a súa condena por abuso de autoridade na modalidade de acoso sexual.
