O Comité Intercentros da CRTVG convoca para o 11 de marzo unha folga de 24 horas e volverá concentrarse diante da Cámara galega para mostrar o seu rexeitamento a este texto legal que, apunta, "destruirá definitivamente" a TVG e a Radio Galega
O pleno do Parlamento do vindeiro 11 de marzo aprobará –previsiblemente, coa maioría absoluta do PP– a nova lei de medios públicos, que as representantes do persoal da Corporación de Radio e Televisión de Galicia (CRTVG) consideran que "destruirá definitivamente" a TVG e a Radio Galega para poñelas "ao servizo exclusivo dos intereses do partido que goberna na Xunta".
O Comité Intercentros da CRTVG convoca para ese martes unha folga de 24 horas e volverá concentrarse diante da Cámara galega para mostrar o seu rexeitamento a este texto legal, que iniciou a súa andadura en pleno verán e pasou a súa tramitación parlamentaria sen practicamente atención ás emendas presentadas polos grupos da oposición do BNG e o PSdeG. Baixo o lema Destruídes o que construímos, chama o persoal que secunde a folga e a todos os colectivos organizados en defensa dos medios públicos que promoveron a iniciativa lexislativa popular Liberemos a Galega! a participar na concentración a partir das 9.30h.
O ambiente laboral é de "máxima conflitividade" nos medios públicos desde que en setembro comezou a que foi a primeira folga indefinida na Corporación, en contra da externalización da programación –en concreto a que depende da sección de informativos– e moi centrada na desaparición do programa das mañás da TVG A Revista, substituído polo magazine externalizado O Termómetro, con idénticas características e que continúa en antena a pesar das protestas, que continuaron ata o pasado 14 de decembro con máis de trinta días de paros que afectaron á programación da televisión pública.
A representación das traballadoras do ente público insiste en reclamar á dirección que repoña "o auténtico diálogo social"
Coincidindo co venres negro número 354 do colectivo Defende a Galega, o Comité Intercentros rexistra o preaviso para esta nova convocatoria de folga debido a que "o malestar do persoal agrávase ante a inminente entrada en vigor desta nova Lei de servizos dos medios públicos de comunicación audiovisual de Galicia que, entre outros retrocesos, elimina a prohibición de cesión a terceiros dos servizos informativos".
A representación das traballadoras do ente público insiste en reclamar á dirección que repoña "o auténtico diálogo social". "Reclamamos que se escoite, informe, dialogue e negocie de boa fe –como establecen a lexislación e o sentido común– coas representantes legais das traballadoras e traballadores calquera cambio substancial que se pretenda implementar na CRTVG, para poder tamén contribuir, desde a bancada social, ao seu éxito", inciden no preaviso de folga.
O persoal mobilizado dos medios públicos solicita a "suspensión" da aprobación desta nova lei para os medios de comunicación e propón a apertura dunha mesa de negociación para tomar en consideración as "deficiencias" da lei de medios, "especialmente aquelas con afectación ao servizo público e dereitos sociolaborais do cadro de persoal".
Así mesmo, na convocatoria de folga tamén fan referencia a cuestións relativas ao "dereito de acceso á xubilación parcial anticipada conforme establece o convenio colectivo" e ao "cumprimento dos mandatos legais en materia de prevención de riscos psicosociais e formación para o persoal" das delegacións territoriais.
