A proposición de Lei Lingua Vital, que se presentará en setembro, incluirá a derrogación do decreto de plurilingüismo, o recoñecemento do galego como lingua vehicular e de acollida en todos os niveis e o aproveitamento da lusofonía
Queremos Galego impulsará unha Iniciativa Lexislativa Popular que buscará "reverter as normas contra o galego" e a reverter a "emerxencia lingüística" e, igualmente, "blindar os acordos" a favor do galego e garantir os dereitos lingüísticos. A plataforma deuno a coñecer este xoves nunha rolda de prensa na que anunciou a primeira acción colectiva nacida do Protocolo Lingua Vital.
A plataforma de defensa da lingua dará a coñecer o texto da ILP en setembro, xunto coas persoas e colectivos sociais que forman parte da comisión promotora. Porén na rolda de prensa xa se anticipou que a Iniciativa Lexislativa Popular incluirá a derrogación do denominado decreto de plurilingüismo (decreto 79/2010), o recoñecemento do galego como lingua vehicular e de acollida en todos os niveis e o aproveitamento da lusofonía.
Queremos Galego chama así mesmo a "blindar a oferta positiva na administración, xustiza e sanidade. Tamén exixirá a reversión da lei de medios públicos, "recoñecendo o papel do galego como lingua exclusiva da CSAG"
Queremos Galego chama así mesmo a "blindar a oferta positiva na administración, xustiza e sanidade"; incide igualmente en "asegurar a presenza do galego nos programas informáticos e introducir cláusulas lingüísticas nos contratos públicos". As entidades sociais do Protocolo Lingua Vital exixen, así mesmo, o fortalecemento dos servizos de normalización lingüística e a sistematización de programas específicos para as persoas inmigrantes que chegan ao noso país.
A ILP tamén exixirá a reversión da lei de medios públicos, "recoñecendo o papel do galego como lingua exclusiva da CSAG" e emendando a lei de IA. Igualmente, demandará máis investimento público en oferta cultural en galego, cotas de dobraxe, lexendaxe e financiamento antecipado, exhibición de filmes en galego nas salas e protección da lingua nas actividades deportivas.
Marcos Maceira, voceiro da plataforma, denunciou que "existe unha distorsión entre o que din os plans e a realidade legal da nosa lingua”. “Incumprir o Plan de Normalización non ten custes. Incumprir a lei, si”, subliñou
Marcos Maceira, voceiro da plataforma, subliñou a necesidade de aprobar esta iniciativa lexislativa. “Existe unha distorsión entre o que din os plans e a realidade legal da nosa lingua”, criticou Maceira, “e precisamos que a lei ampare e asegure o cumprimento dos acordos estabelecidos a favor do galego”. “Incumprir o Plan de Normalización non ten custes. Incumprir a lei, si”, subliñou.
Maceira dennciou que "desde 2004 e desde 2024 vese a falta de palabra e de interese do goberno do PP en actuar a favor do galego”. “A acción da Xunta foi contraria a calquera obxectivo normalizador fixado nos acordos nacionais e internacionais”, dixo, engadindo que “incumpriron ata os seus propios documentos e prazos, incluíndo a revisión do PXNLG que ía estar lista a finais do pasado ano”.
Segundo o portavoz de Queremos Galego, “se algo está a demostrar Rueda é que non é de fiar" e denunciou "a súa capacidade de pór a súa fobia ao galego, mostrada naquela infame manifestación de febreiro do 2009, por diante dos intereses de Galiza".
Na presentación participou unha representación das entidades apoiantes do Protocolo Lingua Vital: Lucía Veciño Souto (Fundació Galiza Sempre), Paulo Carrril (CIG) Claudio Pan Carollo (CCOO), Antuán Rivas (Artistas da Dobraxe ADA), Olga Patiño (AS-PG) Rocío Núñez (Movemento Sumar), Mercedes Tobío (BNG), Xandre Garrido (Avante LGTB+), Iria Nande (Galiza Nova), María Maroño (Erguer) e Marcos Maceira (A Mesa pola Normalización Lingüistica).
