Os especialistas checos Marie Jirásková e Pavel Jirásek ofrecerán un obradoiro de manipulación de monicreques históricos deste país centroeuropeo os días 13 e 14 de agosto destinado tanto a profesionais como a afeccionados deste xénero escénico
Entre o 12 e o 18 de agosto Rianxo acolle unha nova edición deTitiriberia: Festival de títeres tradicionais, que nesta ocasión conta coa República Checa como gran protagonista internacional.
Os especialistas checos Marie Jirásková e Pavel Jirásek ofrecerán un obradoiro de manipulación de monicreques históricos deste país centroeuropeo os días 13 e 14 de agosto destinado tanto a profesionais como a afeccionados deste xénero escénico. Ademais, a colección da familia Jiráskovi ofreceralle ao público de Rianxo unha exposición que percorrerá a historia da tradición checa do teatro de monicreques a través de figuras únicas creadas por mestres artesáns.
Titiriberia está organizado pola asociación Morreu o Demo co apoio do Concello de Rianxo, a Xunta de Galicia e a Deputación da Coruña. Nesta novena edición, o festival trae a Rianxo a tradición histórica dos monicreques checos.
Ademais, a colección da familia Jiráskovi ofreceralle ao público de Rianxo unha exposición que percorrerá a historia da tradición checa do teatro de monicreques a través de figuras únicas creadas por mestres artesáns
A participación de Jirásková e Pavel Jirásek no evento, que incluirá un curso de formación, unha exposición, visitas guiadas, presentacións de libros e unha sesión audiovisual, é posible grazas ao apoio e á colaboración do Ministerio de Cultura da República Checa a través do Plan Nacional de Renovación e os Fondos Next Generation da Unión Europea, da Embaixada da República Checa en España, do Centro Checo en Madrid e da Facultade de Teatro da Academia de Artes Escénicas Leoš Janáček (JAMU), de Brno
A presenza internacional do Festival de Titiriberia deste 2024 incluirá tamén a compañía Marionetas Rui Sousa. Esta formación portuguesa ofreceralle ao público de Rianxo o seu espectáculo Dom Roberto, personaxe equivalente na tradición lusa ao Barriga Verde galego. Ademais, dende fóra de Galicia, chegarán até Rianxo compañías de Murcia (Los Claveles), Andalucía (Títeres desde Abajo), Madrid (La Tartana) ou Euskadi (Ostomila Títeres).
O día 12 inaugurarase no Auditorio de Rianxo a exposición de Títeres históricos checos da Colección de Marie e Pavel Jiráskovi, que se poderá ver até o 18 de agosto. Os dous especialistas ofrecerán dúas visitas guiadas pola mostra nas tardes do luns e do martes ás 19.30 horas. Ese mesmo mércores, ás 17.30 horas, conducirán unha sesión audiovisual sobre a tradición dos monicreques centroeuropeos a través da análise de diferentes documentais e presentarán varios dos seus libros.
A presenza internacional do Festival de Titiriberia incluirá tamén a compañía Marionetas Rui Sousa. Esta formación portuguesa ofreceralle ao público de Rianxo o seu espectáculo Dom Roberto, personaxe equivalente na tradición lusa ao Barriga Verde galego
O curso impartido por ambos os dous especialistas checos celebrarase o martes 13 e o mércores 14 de agosto en horario de 10 a 14 horas no Auditorio de Rianxo. Baixo o título de Manipulación de títeres históricos da República Checa e de construción de teatros de papel, este obradoiro formativo traeranos a tradición checa do teatro familiar, pensada principalmente como xogo doméstico para a cativada que implicaba o deseño de teatros de papel, escenografías e monicreques.
As persoas participantes coñecerán técnicas de creación destes teatriños, aprenderán técnicas de movemento e poderán manipular títeres históricos da colección da familia Jiráskovi. A inscrición está aberta a través de info@barrigaverde.eu ata o 9 de agosto. Está destinada para persoas adultas (mínimo de 16 anos) que desexen achegarase a esta tradición titiriteira, sexan afeccionados ou profesionais.
