Unha ducia de xentes do deporte metidas na política (ou viceversa)
Con varias eleccións convocadas en menos dun mes, haberá que estar en boa forma física. A proposta de Pepu Hernández como candidato do PSOE á alcaldía de Madrid e o nomeamento do tamén adestrador de baloncesto Javier Imbroda como conselleiro en Andalucía permítenos lembrar unha ducia de xentes galegas do deporte metidas na política (ou viceversa).
-
01David Cal
Con cinco medallas olímpicas, David Cal é o deportista galego máis galardoado da historia. Nas municipais de 2011 formou parte da lista que encabezou o popular Telmo Martín como candidato á alcaldía de Pontevedra. Non lograron facerse con ela e tanto Martín como Cal renunciaron a ser concelleiros.
-
02José Ramón Lete Lasa
O máximo responsable autonómico do deporte en Galicia, secretario xeral da Xunta e anteriormente tamén responsable deportivo no Goberno de Rajoy e na Comunidad de Madrid, foi xogador de baloncesto en diversos equipos, entre eles Breogán, Obradoiro e Estudiantes.
-
03Marta Míguez
Cinco veces campioa de España de xavelina e olímpica en Sidney 2000, Míguez ocupou a secretaría xeral para o Deporte mentres Lete Lasa estivo á fronte do Consejo Superior de Deportes estatal.
-
04Germán Castrillón
Seis veces campión de Galicia de rally, Castrillón é alcalde de Cabanas polo PP e agora aspira a selo en Narón
-
05Chus Lago
A alpinista foi 'número 2' na primeira candidatura do socialista Abel Caballero á alcaldía de Vigo e posteriormente concelleira de Medio Ambiente
-
06Leticia Santos
Campioa galega de taekwondo en case todas as categorías, e campioa de España universitaria, Santos é alcaldesa de Moaña polo BNG.
-
07Gustavo Domínguez
Ciclista profesional no extinto equipo Xacobeo Galicia, Domínguez presentouse en 2011 ás municipais polo BNG no Porriño.
-
08Bebeto
Galego de Riazor, Bebeto entrou en política en 2010 como deputado rexional en Brasil do socialdemócrata Partido Democrático Laborista. Nas últimas eleccións brasileiras, no entanto, apostou abertamente polo ultradereitista Bolsonaro.
-
09Rafael Louzán
Ex-presidente da Deputación e do PP de Pontevedra, en decembro de 2010 Louzán fíxose coa presidencia da Federación Galega de Fútbol tras construír previamente desde o ente provincial 70 campos de herba artificial.
-
10Augusto César Lendoiro
Antes que Louzán, tamén Lendoiro foi presidente da Deputación da Coruña polo PP, pero menos tempo que os 25 anos que estivo á fronte do Deportivo.
-
11Horacio Gómez
Tamén presidente de Primeira División e político foi Horacio Gómez, á fronte do Celta entre 1995 e 2006 e 'número 2' do PP en Vigo nas municipais de 1999.
-
12Guadalupe Murillo
Deputada autonómica do PP, Murillo , empresaria conserveira, é presidenta do Pontevedra e secretaria do consello de administración do Obradoiro.