Dependentas de Inditex na Coruña, á folga do 'black friday' coa CIG alén do pacto de UGT e CCOO coa empresa

Manifestación de dependentas de Inditex, o pasado 6 de novembro na Coruña CC-BY-NC-SA CIG

No ano 2017, traballadoras de Bershka na provincia de Pontevedra foron á folga en demanda de diversas medidas sociais e, sobre todo, da equiparación salarial coas súas compañeiras da provincia da Coruña. A intensidade da mobilización, que chegara ás portas da sede central da multinacional téxtil, permitira que a reivindicación laboral abandeirada pola CIG chegara a bo porto.

Media década despois, neste 2022 foron precisamente as compañeiras desas traballadoras na provincia coruñesa as que se botaron á rúa. O conflito laboral atinxe a todo o persoal de tenda das diversas marcas da compañía: Zara, Stradivarius, Bershka, Pull&Bear, Massimo Dutti, Lefties... O centro das demandas é neste caso a esixencia de "salarios dignos" e incrementos para a equiparación con outros profesionais do grupo. A falta de acordo derivou o pasado xoves no anuncio de folga para o 25 de novembro, o black friday, xornada de intensa actividade comercial.

Traballadoras de tendas de Inditex, manifestándose en demanda de melloras salariais o pasado 6 de novembro na Coruña CC-BY-NC-SA CIG

Outra volta da man da CIG, sindicato maioritario entre este persoal na Coruña, as traballadoras veñen exemplificando os desequilibrios salariais explicando, por exemplo, que o persoal de almacén conta con 2.011 euros de "salario base" mentres que unha traballadora de tenda parte de 1.058 euros. Nos últimos días, a central sindical reprochara que "o único que fixo empresa" fora "ofrecer un incremento de 20 euros máis no primeiro ano, pero sen variar a cantidade final" dunha suba de 182,93 en tres anos, o cal é observado como "totalmente insuficiente" tras "tres anos de retribucións case conxeladas".

Horas despois de que as negociacións en Galicia seguisen sen frutificar, CCOO e UGT anunciaban dende Madrid este venres o peche dun acordo con Inditex que cualifican de "histórico" e que, afirman, responde á "reclamación de medidas no conxunto do grupo que compensen o impacto da inflación" e "revertan" no persoal "parte dos beneficios". Entre elas, destacan, inclúense incrementos dos incentivos (1.000 euros na nómina de febreiro para quen cumpran a partir do 80% dos obxectivos de vendas) e  figuran "medidas específicas na Coruña" cunha revisión do denominado "plus sede", que pasa a 180 euros brutos ao mes dende este novembro de 2022, 200 en 2023 e 240 no 2024.

"Asinan a nivel estatal o que non lles asinamos aquí"

A CIG, sindicato maioritario na provincia da Coruña, advirte de que "non estamos dispostas a que as cúpulas desas centrais sindicais nos vendan sen sequera falar connosco" e calculan que o pactado horas despois do anuncio da folga apenas supón "60 euros máis do que nos ofrecían"

Entre o persoal respresentado pola CIG -que, lembran, ten unha representatividade "próxima ao 70%"-, o acontecido este venres é "surrealista", en verbas de Carmiña Naveiro, dependenta en Zara e presidenta do comité desta empresa na provincia da Coruña. "A empresa debe estar nerviosa e chamou os seus colegas a nivel estatal para que lle asinen o que non asinamos aquí", afirma en declaracións a Praza.gal.

Nesta liña, as representantes do persoal das tendas de Inditex a través da CIG viñeron advertindo no últimos días que a compañía vén aplicando un "cambio na política de relacións laborais" e, "especialmente dende a pandemia", está "tentando afastar a negociación colectiva dos centros de traballo para trasladala a Madrid". "Nesta estratexia de centralización da negociación colectiva habería que encadrar a creación da nova patronal téxtil na que se integrou Inditex co obxectivo de negociar un convenio estatal do comercio téxtil", advirten.

Manifestación de traballadoras de Inditex, na Coruña o pasado 6 de novembro CC-BY-NC-SA CIG

Pero "non estamos dispostas a permitir que as cúpulas desas centrais sindicais que non saben nin o que é traballar nunha tenda nos vendan sen sequera falar connosco", engade Naveiro. O resultado final do acordado en Madrid, asegura apenas supón "60 euros máis do que nos ofrecían onte", en referencia ás negociacións mantidas o pasado xoves. "Mantemos a folga", confirma, porque "non cumpren en absoluto as expectativas das traballadoras nas tendas" e o pacto máis ben semella un intento de "desmobilizar". "Pero pode conseguir o efecto contrario", advirten

As traballadoras ven marxe para a negociación pero advirten: "esixiamos 500 euros, baixamos a 440 e non imos baixar máis"

Neste sentido, Carmiña Naveiro destaca que se os responsables de Inditex "queren sentar antes do día 25 e chegar a un acordo", hai  marxe para facelo, pero sempre partindo da base de que "esiximos 500 euros, baixamos a 440 e non imos baixar máis" mentres "hai compañeiros doutras empresas" do grupo que, "con categoría laboral inferior, cobran o dobre" que as dependentas". "Se non queren sentar e chegar a un acordo", destaca, o black friday haberá folga e posteriormente, en asembleas co persoal, "decidiremos se se fan máis xornadas de folga no mes de decembro ou mesmo nas rebaixas"

"Na provincia onde está a sede de Inditex e onde vive o home máis rico do Estado", viñan sinalando as delegadas da CIG en referencia a Amancio Ortega, fundador do grupo e pai da súa actual presidenta, Marta Ortega, "as traballadoras das tendas non chegamos a fin de mes". Por iso "o único que pedimos é ter un salario e condicións dignas como as que xa teñen noutras empresas" do grupo, resaltan. Consultados por Praza.gal, Inditex declinou realizar valoracións sobre as reivindicacións da CIG e convocatoria de folga.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.