Un mes despois de fixar no DOG que tamén os empregos a tempo parcial se poderían beneficiar de axudas para transformar contratos temporais en indefinidos a Consellería de Emprego mudou os requisitos cunha "simple nota aclaratoria" á que o TSXG nega validez
O Tribunal Superior de Xustiza de Galicia (TSXG) vén emitindo desde hai anos sentenzas que poñen en cuestión o xeito en que a Xunta tramita diversos tipos de axudas ao emprego. Agora o tribunal vén de facer pública unha na que censura que a Consellería de Emprego mudase, cunha "simple nota aclaratoria", as bases dunha liña de subvencións xa publicadas no Diario Oficial de Galicia (DOG) desde máis dun mes antes. Unha modificación a posteriori que para o tribunal non é válida coa que o Goberno galego deixou sen axudas a cando menos catro contratos temporais a tempo parcial que pretendían converterse en contratos indefinidos a tempo parcial.
![](https://praza.gal/storage/uploads/emprego-0e0f576.jpeg)
A sentenza agora feita pública polo TSXG dá a razón a unha empresa á que a Consellería de Emprego denegou unha axuda para que catro persoas mozas contratadas temporalmente a tempo parcial pasasen a ser indefinidas co mesmo horario a tempo parcial. A Xunta argumentou para denegar a axuda que estas só se podían dar cando a contratación pasase a ser a tempo completo. Pero iso non era o que puñan as bases da convocatoria publicadas no DOG o 26 de xullo de 2021.
Como recolle o TSXG, no DOG establecíase que para poderen ser subvencionados os contratos temporais a tempo completo se tiñan que transformar en contratos indefinidos a tempo completo. Pero tamén se contemplaba a posibilidade de que se beneficiasen igualmente das subvencións os contratos temporais a tempo parcial que se transformasen en contratos indefinidos a tempo parcial. O único requisito que se fixaba para eses casos era que "a xornada do novo contrato indefinido deberá ser, como mínimo, igual á do contrato que se transforma".
![](https://praza.gal/storage/uploads/dog-3b6e72d.jpeg)
O TSXG di que "de ningunha maneira" unha "simple nota" emitida pola consellería para "interpretar" as bases das axudas pode "restrinxir os requisitos de acceso"
"Parece evidente que o que a Orde [publicada no DOG coas bases da convocatoria] trata de preservar non é só a calidade do emprego senón tamén a cantidade de horas traballadas", di o TSXG. Porén, a Xunta denegou a axuda amparándose nunha "nota aclaratoria" que emitiu o 3 de setembro de 2021, algo máis dun mes despois de publicar no DOG as bases das subvencións. Pero para o TSXG "de ningunha maneira" esa "simple nota" pode "restrinxir os requisitos de acceso á subvención da convocatoria".
Para o TSXG esa "nota aclaratoria" emitida pola Xunta coa convocatoria xa en marcha "de ningunha maneira vincula a este tribunal, porque non innova o ordenamento xurídico" ao non ser unha modificación oficial das bases. De feito, engade o tribunal, na seguinte convocatoria, en abril de 2022, a Xunta xa si mudou as condicións nas bases, "aquí si, con rango regulamentario".
Así que o tribunal condena a Xunta a "recoñecer o dereito" da empresa recorrente "a obter a subvención" así como a asumir as custas xudiciais ata 1.200 euros.
![](https://praza.gal/storage/uploads/sentenza-f6c6277.jpeg)
“Arbitrariedade”, “falta de transparencia” ou “extremado rigor formalista” son algunhas das expresións que os tribunais veñen dirixindo ao Goberno galego no eido do emprego autónomo "que tanto pregoa"
A sentenza agora coñecida é unha máis das diversas que veñen condenando o Goberno galego por denegar ou restrinxir subvencións ligadas co emprego a persoas ou empresas que tiñan dereito a elas. “Arbitrariedade”, “falta de transparencia” ou “extremado rigor formalista” son algunhas das expresións coas que veñen cualificando as actuacións do Goberno galego uns tribunais que mesmo chegaron a poñer “en cuestión” o fomento do emprego autónomo “que tanto pregoa” a Xunta.
Un xeito de xestionar co que o Goberno galego deixou por exemplo sen axuda a mulleres paradas que querían emprender no rural por non revisar as súas solicitudes, a un autónomo porque fixo un ingreso nun banco e non unha transferencia ou denegou unha subvención a unha autónoma que xa tiña outra sen deixarlle elixir entre as dúas.