O informe da Fiscalía Superior de Galicia para determinar se houbo "planificación coordinada" na vaga de incendios do pasado mes de outubro está "practicamente concluido" sen atopar "evidencias da existencia de trama ninguna", sinala o fiscal delegado de Medio Ambiente, Álvaro García Ortiz, que xa noutras ocasións foi rotundo a negar a suposta trama, en contra do que unha e outra vez defenden a Xunta ou o Goberno central. Houbo 4 persoas detidas, sen relación entre si.
Galegos e galegas con pensións de Venezuela manifestaranse este martes en Vigo para demandarlle á Xunta e ao Goberno español o acceso a axudas sociais, pois levan dous anos sen recibir dende Caracas estes cartos. O Goberno galego vén negando sistematicamente o pagamento da RISGA e doutras prestacións a pensionistas que carecen de calquera outro ingreso.
Un estudo do Centre d'Estudis Demogràfics da UAB alerta do prexuízo que poden sufrir as persoas nacidas entre 1960 e 1975, que permitiron durante anos soster o sistema de pensións e van atopar unhas prestacións moi inferiores ás actuais. As novas pensións levan catro anos conxeladas en Galicia, e no conxunto de España suman xa dous anos de descensos
Hoxe celébrase o Día Internacional da Muller e a Nena na Ciencia. Lembramos esta Ducia de mulleres científicas galegas que publicamos o ano pasado. De María Wonenburger, Celia Brañas e Ana María Prieto a Ángeles Alvariño, Alicia Estévez, Josefina F. Ling ou Pilar Fernández Otero.
Oriol Junqueras afirmou este sábado, ao facer 100 días en prisión, que "o mellor agasallo que nos podedes facer hoxe é formar goberno en Catalunya". A secretaria xeral de ERC, Marta Rovira, reclamou rigor e non facer "acordos a medias" para acadar unha investidura
Israel bombardea Siria despois de interceptar un dron iraní procedente do país árabe. As defensas antiaéreas sirias derrubaron cando menos un avión israelí.
Concelleiros do BNG de 20 localidades afectadas polo proxecto da megamina de Touro visitan o lugar para protestar contra os prexuízos que a instalación tería para as terras da contorna e tamén para o río Ulla e a Ría de Arousa.
A Consellería de Sanidade abre por lei a contratación de médicos de fóra da UE para paliar o actual déficit de profesionais. Unha emenda do PP introduce esta opción para "dotar de seguridade xurídica" e "evitar problemas legais" á incorporación de extracomunitarios ao cadro de persoal
Os falecementos ligados á gripe ascenden en Galicia a 107 nos meses transcorridos da tempada de vixilancia, que comeza en outubro, segundo os últimos datos do Sergas. Son tres máis que en toda a tempada 2015-16, pero seguen por baixo das mortes rexistradas na 2016-17. O período de vixilancia esténdese ata maio. Os falecementos por esta enfermidade acadaron máximos no que vai de século tras décadas de descensos.
Ciudadanos promove unha lei no Congreso que implicaría que a Xunta poida incorporar persoal que descoñeza o galego. Cóntao eldiario.es. As primeiras actuacións do partido de Rivera en Galicia fora a participacións en accións contra o ensino en galego.
