Fálase

O paro sobe en 2.062 persoas en agosto en Galicia e sitúase nas 141.912 persoas inscritas nos servizos de demanda de emprego. No conxunto do Estado o desemprego aumentou en 40.428 persoas. O número de traballadores e traballadoras afiliadas á Seguridade Social descendeu en 2.862 persoas. Toda a información, esta mañá en Praza.gal

O incendio declarado na tarde do xoves na parroquia de Parada, en Lobeira, e que afecta ao Parque Natural Baixa Limia-Serra do Xurés, quedou "estabilizado", despois de queimar 40 hectáreas. Outro incendio, en Ribadavia, está a afectar a 30 hectáreas de terreo e aínda permanece activo. En Cenlle, permanece "controlado" o incendio iniciado hai dous días e que arrasou 62 hectáreas.

Cristina Fernández de Kirchner sofre un intento de asasinato ante a súa vivenda. Un home, confundido entre a multitude que se manifestaba en apoio da vicepresidenta arxentina, apuntou un arma cargada contra a súa cabeza e chegou a apertar o gatillo, pero a pistola non se disparou. O agresor, de nacionalidade brasileira, foi detido e o presidente Alberto Fernández decretou que este venres, no que están previstas manifestacións de repulsa, será festivo nacional.

Un incendio declarado na tarde deste xoves na parroquia de Parada, en Lobelle, afecta o Parque Natural Baixa Limia-Serra do Xurés. Segundo as últimas estimacións de Medio Rural, van 35 hectáreas ardidas e o lume “evoluciona favorablemente cara á súa estabilización”. [Imaxe do incendio en Lobelle, de ATBRIF]

• DATOS | O peor verán dos últimos quince anos: os incendios queiman máis de 43.000 hectáreas en mes e medio 

Un furacán formado no Atlántico ameaza Galicia e alerta os meteorólogos. O Centro Nacional de Furacáns dos EUA vén de confirmar a formación deste anómalo ciclón tropical que, segundo a súa traxectoria, podería afectar a Galicia a mediados de setembro ou virar máis cara ao norte. Estao contando GCiencia. 

Os incendios que nos últimos días afectaron a Oímbra e Melón quedaron extinguidos esta noite, despois de queimar 96 e 76 hectáreas, respectivamente. Tamén quedou controlado o incendio que arrasou unhas 62 hectáreas en Cenlle

• O peor verán dos últimos quince anos: os incendios queiman máis de 43.000 hectáreas en mes e medio

A Secretaría Xeral de Política Lingüística confirma que a nova serie baseada nas novelas de Tolkien, ‘O Señor dos Aneis: os aneis do poder’, poderá verse dobrada ao galego e subtitulada na nosa lingua. A serie estréase este venres, 2 de setembro, na plataforma Amazon Prime.

A candidatura do Cabo Ortegal como Xeoparque Mundial da Unesco, impulsada polos concellos de Cariño, Cedeira, Cerdido, Moeche, Ortigueira, San Sadurniño e Valdoviño –que integran a Asociación para a xestión do Xeoparque do Cabo Ortegal–, recibe o “total respaldo” do Goberno do Estado. Así o trasladou o delegado do Goberno en Galicia, José Miñones, este martes na zona, onde sinalou que “Cabo Ortegal conta con todas as características necesarias para acadar o recoñecemento internacional”, diante dos avaliadores internacionais do proxecto. “Ortegal merece o recoñecemento da Unesco e vai contar co apoio deste Goberno para seguir facendo deste recanto de Galicia un referente do turismo verde e sostible que busca impulsar o Goberno en España, en liña cos Obxectivos de Desenvolvemento Sostible da Axenda 2030 da Unesco”, incidiu Miñones sobre un proxecto que puxo como “exemplo de colaboración institucional”. 

O Consello de Ministros aproba a nova Lei do Aborto, que inicia agora a súa tramitación parlamentaria. A nova norma mellora a xestión pública da interrupción voluntaria do embarazo, fortalece o dereito a facelo das mozas de 16 e 17 anos sen que sexa necesario contar coa autorización dos seus pais e introduce a posibilidade de acceder a baixas laborais por menstruacións dolorosas. Tamén inclúe a gratuidade dos anticonceptivos hormonais, incluída a pílula do día despois e o permiso remunerado antes do parto, dende a semana 36 do embarazo.

Morre en Compostela un bombeiro que formaba parte do dispositivo de extinción do incendio nun autobús urbano sen pasaxe en Aríns. O mozo, que estaba en prácticas e que non participaba na intervención, foi alcanzado polo vehículo.