O Obradoiro volve á senda dos triunfos ante Bilbao Basket cunha vitoria por 84-74. Na LEB Ouro o Breogán segue líder nunha xornada con pleno de vitorias galegas: o equipo de Lugo impúxose 96-74 ao Valladolid, o Ourense superou ao Clavijo por 59-69 e o Básquet Coruña gañou 80-99 ao Araberri.
O Celta imponse á Real Sociedad por 1-2 e o Deportivo sofre unha dura derrota ante o Real Madrid (7-1)
A galega Blanca Millán, elixida mellor xogadora da Conferencia Leste da liga universitaria de baloncesto dos Estados Unidos. A compostelá xoga nas Black Bears de Maine.
Ana Miranda volverá tomar posesión como eurodeputada do BNG o vindeiro 28 de febreiro. A voceira do Bloque en Bruxelas substituirá a Josu Juaristi no marco do acordo 'Os pobos deciden' e manterá o escano ata o remate da lexislatura en 2019. Dende 2014 veu desenvolvendo actividade no marco desta coalición, con xestións como a do conflito do xeito ou a publicación do informe sobre o accidente de Angrois.
O gol do porteiro do Club Deportivo Lugo, Juan Carlos, dende a súa propia área durante o partido fronte ao Sporting de Xixón (3-1 para os lucenses) marca a xornada futbolística e acada repercusión internacional. O vídeo da xogada está dispoñible na canle de YouTube da Liga
Continúan os traballos de construción da ampliación da ponte de Rande vinte días despois da súa inauguración. Faro de Vigo dá conta de que decenas de obreiros seguen os seus traballos na ponte, onde Audasa acelerou o remate da parte nova para poder aplicar antes a suba de peaxes. Apenas dez días despois do acto protagonizado por Rajoy a ampliación xa foi recortada por mor das obras pendentes en Chapela, que roldarán os 11 millóns de euros.
A curtametraxe galega Matria, de Álvaro Gago, competirá na sección oficial internacional do Festival de Sundance, que se celebra do 18 ao 28 de xaneiro en Park City, nos Estados Unidos. O filme xa foi galardoado noutros certames como a Seminci, Alcine e Cartagena. O autor apostou no traballo por "dar voz ás mulleres silenciadas que soportan e calan"
Veciñanza de Guitiriz viaxa en tren ata Lugo para reivindicar que Fomento "non deixe morrer" as conexións ferroviarias na contorna. "O PP foi recortando trens, facendo precaria a conexión con Lugo e ata privándonos da parada do Alvia diurno a Madrid, que pasa polo Concello pero
non para", di a alcaldesa, Regina Polín.
O PP provincial da Coruña dá cargos ao ex-deputado que denunciou "irregularidades" na elección de Beatriz Mato como presidenta local do partido, Javier Escribano, e mais a militantes afíns a el. A incorporación prodúcese despois da retirada da demanda contra a devandita elección. Recólleo Europa Press na súa web.
En 2014 a daquela ministra de Fomento, Ana Pastor, prometeu que o rescate das autoestradas ía custar “cero euros”, lembra Maldita Hemeroteca. O Goberno asume agora perdas de 2.000 millóns.
