Fálase

Feijóo asegura durante un mitin do PP en Marbella que os gobernos do PP en Andalucía e Galicia son modelos en "compatibilizar a defensa da terra e a lealdade ao Estado". O presidente da Xunta e do PP de Galicia, que acompañou o líder dos populares andaluces e titular da Junta, Juan Manuel Moreno mantén que o seu partido ten "un pacto coa xente, non cos partidos que queren vivir da xente". Moreno goberna Andalucía en coalición con Ciudadanos e a súa investidura foi posible cos votos de PP, Ciudadanos e Vox. (Imaxe: PP)

Choque en dúas frontes da coalición do Goberno de España entre PSOE e Unidas Podemos: a reforma laboral, ao sinalar UP inxerencias da ministra de Economía fronte a Yolanda Díaz, e a retirada do escano ao deputado Alberto Rodríguez (UP) por parte da presidenta do Congreso, Meritxell Batet, a instancias do Supremo. Pola retirada do escano, Podemos afirma que se querelará contra Batet. Na imaxe, Díaz e Pedro Sánchez, o pasado 7 de outubro na Moncloa [©Pool Moncloa/Borja Puig de la Bellacasa]

A Xunta publica no DOG o novo protocolo de medidas pola COVID, o primeiro tras o levantamento da emerxencia sanitaria, que inclúe o incremento ao 100% da ocupación máxima en gran parte das actividades en interiores, o decaemento de boa parte das restricións ás visitas en residencias da terceira idade e a ampliación de horarios e reapertura das barras na hostalería, entre outras medidas.

• +INFO 👉 A Xunta levanta ano e medio despois as restricións de saídas e visitas nas residencias de maiores e amplía horarios da hostalería

Sofía e Mateo volveron ser os nomes máis frecuentes das nenas e nenos que naceron en Galicia durante o ano 2020, segundo a estatística publicada polo IGE. Xa o foran no ano 2019. Pódense consultar os datos nesta ligazón. [Imaxe: CC-BY-SA Xunta]

• DATOS | Sofía e Mateo son cada vez menos: os datos de 2020 e o avance de 2021 apuntan a outro mínimo de nacementos en Galicia

A Xunta reclama que o Estado subvencione as peaxes da AP-53 (Santiago-Dozón) ao xeito da AP-9. A conselleira de Infraestrutura reiterouno acompañada por alcaldes da zona. Trátase da única autoestrada sen descontos e, na etapa de Aznar, o Goberno de España evitou construíla ata que a Xunta de Fraga achegou 60 millóns de euros a fondo perdido.

• HEMEROTECA | O Parlamento pide descontos na AP-53, a única autoestrada sen eles e que o Estado non quería facer ata que a Xunta puxo cartos 

Un estudo de Twitter conclúe que o algoritmo da rede social "amplifica máis" as mensaxes de opcións políticas de dereitas. O traballo foi realizado con tweets de cargos electos de sete Estados, entre eles os membros do Congreso dos Deputados español. Asegura tamén que "establecer por que se producen estes patróns é unha pregunta significativamente máis difícil de responder". [Imaxe: Jeremy Bezanger / Unsplash]

Goberno de España e PP acordan nomeamentos de diversas institucións que permanecían bloqueadas hai anos, tales como os postos pendentes no Tribunal Constitucional, o Defensor del Pueblo -que será o socialista Ángel Gabilondo-, ou o Tribunal de Cuentas. [Imaxe: © TC]

O portavoz do goberno municipal de Vigo, Carlos López Font, está citado polo Xulgado de Instrución número 5 de Vigo para declarar como investigado pola súa etapa como concelleiro de Seguridade xunto a Antonio Vivero Mijares. Ambos, como responsables do decreto municipal que obrigaba aos bombeiros do concello a traballar en días de descanso,  terán que comparecer este venres ás 11.00 horas, segundo informa a CIG, "como investigados por presuntos delitos contra a saúde e os dereitos dos traballadores e prevaricación administrativa".

A central sindical xa conseguira que dito decreto resultase anulado pola xustiza, coa ratificación do TSXG fronte ao recurso presentado polo Concello de Vigo. Delegados da CIG seguiron adiante con este procedemento xudicial ao entender que a decisión dos cargos municipais podía supoñer responsabilidades penais porque ″obrigaba a traballar por decreto os días de descanso, cando realizamos unha actividade moi perigosa na que os descansos entre servizos son moi importantes″. [Foto CC-BY-NC-SA CIG]

Catro curtametraxes galegas foron preseleccionadas para competir na 36 edición dos Premios Goya. No apartado de animación está The Monkey, de Xosé Zapata e Lorenzo Degl’Innocenti. Na categoría de curta documental figuran A comuñón da miña prima Andrea, de Brandán Cerviño e Augas abisais, de Xacio Baño. Xoves de comadres, de Noemí Chantada, foi escollida na categoría de ficción.

As votacións das académicas e académicos decidirán agora as curtas que finalmente compitan na entrega de galardóns que se celebrará o vindeiro 12 de febreiro.

[Imaxe: A actriz Aurora Maestre na curtametraxe Xoves de Comadres CC-BY Islandia Produccións]

Os beneficios de Abanca medran un 46% interanual no terceiro trimestre do ano, ata 210 millóns de euros. Os depósitos que manexa o grupo aumentaron case un 15%, segundo os resultados que vén de facer públicos.