Nigrán homenaxea ás dúas veciñas de Chandebrito que morreron nos incendios do 15 de outubro. A veciñanza descobre unha placa nunha fonte á que acudían no marco da recuperación de varios elementos etnográficos da parroquia.
Fálase
-
As obras en Rande reduciron a circulación esta pasada noite a un só carril por sentido malia o anuncio de Fomento de que quedarían dous dispoñibles. Pecháronse os novos carrís da ampliación e todo o tráfico tivo que empregar un dos dous vellos taboleiros centrais. O ministro tamén prometera que os traballos pendentes realizaríanse pola noite pero están a afectar á circulación tamén durante o día.
O Tribunal Superior de Xustiza de Galicia avala o decreto de pisos turísticos da Xunta fronte ao recurso que presentara a Comisión da Competencia. O xuíz asume todas as alegacións formuladas polo Goberno galego fronte ás consideracións de Competencia, que consideraba a norma “contraria á competencia e aos principios de regulación económica eficiente”. En todo caso, as dúbidas de Competencia xa obrigaran ao Goberno galego a corrixir o seu texto inicial cunha "instrución interpretativa", figura que a Xunta só empregou tres veces na súa historia.
Os falecementos ligados á gripe ascenden en Galicia a 130 nos meses transcorridos da tempada de vixilancia, que comeza en outubro, segundo os últimos datos do Sergas. Son seis menos que en toda a tempada anterior, a 2016-17, pechada en maio do pasado ano con 136 mortes. Os falecementos por esta enfermidade acadaron máximos no que vai de século tras décadas de descensos.
O líder do PP en Santiago declárase "satisfeito" polo acto no que recolleu lixo das beiras do Sar e o guindou ao río para denunciar "contaminación". "Grazas a ese traballo de divulgación, o problema é coñecido en toda Galicia e en moitos sitios de España", afirma o ex-conselleiro de Medio Ambiente, Agustín Hernández. Nós TV recolle as súas declaracións.
O Goberno de Rajoy leva aos tribunais a Cifuentes pola suba salarial para os traballadores da Xustiza en Madrid, un acordo dun incremento retributivo de 120 euros mensuais para os funcionarios. O recurso a este pacto chega en medio da folga do persoal xudicial en Galicia, que reclama, entre outras cousas, o aumento do complemento autonómico.
A Xunta convoca os sindicatos a unha nova xuntanza o luns para intentar deter a folga do persoal de Xustiza, que hoxe cumpre a súa oitava xornada de paro indefinido. Neste xoves, Feijóo lanzou a poboación parada e precaria contra os funcionarios.
A falta de apoio na Eurocámara a Luis de Guindos para vicepresidir o Banco Central Europeo desconcerta o Goberno de España. Cóntao eldiario.es. Antes de ser ministro De Guindos ostentou un alto cargo en Lehman Brothers e foi clave en procesos como o rescate bancario ou a venda de Novagalicia Banco.
O Goberno central estuda usar o 155 para ir contra o modelo de inmersión lingüística catalán e impulsar o castelán a través da opción do idioma para os pais no sobre de matrícula para os pais.
Xunta e Ministerio do Interior acordan agora que a Garda Civil forme parte do centro de atención de emerxencias do 112 autonómico, no que aínda non están integrados bombeiros, Policía Nacional, Policía Autonómica nin Grupos de Emerxencia Supramunicipal (GES). Hai ano e medio, no incendio da conserveira Fandicosta, os axentes queixábanse do “caos” e da falta de coordinación. Na vaga de incendios de outubro os brigadistas volveron criticar o colapso do 112, ao que o propio Feijóo recomendara dirixir todas as chamadas.
