Fálase

O Supremo ratifica a sentenza do condenado polo caso Campeón que non chegara a un acordo coa Fiscalía como o resto de acusados. Hai ano e medio 11 dos 12 implicados, entre eles tres cargos públicos do PP aos que a Xunta evitou acusar, aceptaron ser condenados por corrupción a cambio de ver rebaixadas as súas penas pero un deles, Javier Rodríguez, da empresa Proitec, optou por ir a xuízo e agora o alto tribunal ratifica a súa condena como cómplice nun delito de fraude de subvencións. O líder da trama, Jorge Dorribo, morreu hai dous meses. 

O alcalde e o arcebispo de Santiago, partidarios de que o Papa Francisco visite a capital galega no Xacobeo 2021. "Agradaríanos moito, imos tentalo", afirmou Julián Barrio tras recibir a Xosé Sánchez Bugallo no Arcebispado. Ambos ocupaban estes mesmos cargos en 2010, cando o Papa emérito, Bieito XVI, viaxou a Compostela.

Ciudadanos rexistra un escrito no Parlamento galego para pedir "unha declaración institucional da Xunta" para "condenar os ataques sufridos por representantes" deste partido "na manifestación do Orgullo" en Madrid. Fano porque "o que pasou foi moi grave", di o seu secretario de organización, Laureano Bermejo. As mobilizacións do Orgullo en Galicia desenvolvéronse o propio 28 de xuño.

Un Goberno "do PSOE e Unidas Podemos" é a opción máis apoiada polo electorado (26,4%) seguida dun "Goberno do PSOE en solitario" (20,2%), segundo o barómetro postelectoral que vén de publicar o CIS e que está a debullar eldiario.es.

Persoal de Coren maniféstase en Ourense contra a "represión sindical" que, denuncia a CIG, sufriu un traballador "despedido por formar parte da candidatura" deste sindicato. A central e o propio afectado aseguran ser vítimas de "prácticas mafiosas" por parte da empresa, que declinou pronunciarse ao respecto.

De Verín a Lisboa pola antiga estrada Nacional 2 de Portugal. En Vinte, un roteiro alternativo aos habituais para coñecer un chisco do país veciño este verán.

O líder laborista británico, Jeremy Corbyn, aposta por un novo referendo a respecto do "acordo ou a ausencia del" sobre o Brexit. Nese caso, advirte, o Partido Laborista defenderá ficar na UE se non hai acordo ou se os Conservadores chegan a un pacto que "non protexa a economía e o emprego" no Reino Unido.

Publicada a orde de subvencións da Xunta para mercar coches anunciada a pasada semana por Feijóo. Ten un orzamento de 1,1 millóns e a achega da Xunta é de 500 ou 700 euros. O Goberno galego, así e todo, fala dun investimento de "40 millóns" ao sumar os fondos que se "mobilizarán" para mercar estes automóbiles.

Movementos feministas de diversas localidades galegas sumáronse este luns ás mobilizacións en apoio á vítima dunha violación múltiple na localidade catalá de Manresa. Os feitos están a ser xulgados nestes días. (Imaxe: PFG)

As intensas treboadas provocaron este luns asolagamentos e múltiples incidentes en varias localidades da provincia de Ourense, especialmente en parroquias como Infesta, Albarellos e Vilaza, no Concello de Monterrei. (Imaxe: Protección Civil de Verín)