Audasa foi en 2017, por sexto ano consecutivo, a concesionaria de autoestradas que recibiu máis queixas en España, triplicando as da seguinte empresa. Atascos, problemas coas tarxetas e sinalización ou cos sistemas de peaxe foron os principais motivos.
Persoal de Alcoa maniféstase ante a Delegación do Goberno na Coruña para esixirlle ao Executivo central un marco estable electrointensivo logo do preacordo do ERE acordado coa empresa, que apoiou o 90% dos traballadores, e á espera dunha alternativa industrial. Foto: Anova.
Feijóo reclama que Pedro Sánchez "recoñeza inequivocamente" o presidente da Asemblea Nacional de Venezuela para que "tutele" unhas "eleccións limpas" nese país. Preguntado tras o Consello da Xunta situación do país americano, onde Juan Guaidó se autoproclamou presidente "interino" da república, o titular do Goberno galego asegurou tamén querer saber, no marco dunha crítica a Podemos, "se os alcaldes galegos están a favor de Maduro".
O alcalde franquista de Beade advirte de que a vila seguirá tendo unha rúa dedicada ao ditador malia ao informe xurídico que evidencia que está a incumprir a lei. Senén Pousa (PP) é rexedor da vila ourensá dende 1974. Recólleo Faro de Vigo
O líder opositor Juan Guaidó autoproclámase presidente interino de Venezuela e Donald Trump recoñéceo como lexítimo, segundo adianta a CNN.
O sindicato CSIF denunciará xudicialmente á Xunta se non modifica o acordo de carreira profesional dos funcionarios que asinou con CCOO e UGT e incorpora tamén a el ao persoal laboral ou interino. Esgrime unha recente sentenza do Supremo que rexeita que se discrimine aos traballadores públicos temporais á hora de contabilizar a súa carreira profesional por considerar que así o esixe unha directiva europea.
Soy una tumba, segunda curtametraxe do cangués Khris Cembe, pode levar premio á mellor curta de animación nos Goya. Contámolo en VINTE.
Ferrolterra terá o novo curso un novo centro de inmersión lingüística en Primaria. O colectivo Semente acada nunha campaña de micromecenado os 60.000 euros necesarios para iniciar o proxecto, que se une a outras iniciativas sociais polo ensino en galego.
A derrota parlamentaria co decreto dos alugueiros de vivenda tensa as alianzas do Goberno de Pedro Sánchez en plena negociación dos Orzamentos Xerais para 2019. O pleno do Congreso, no entanto, si convalidou decretos como o da suba das pensións. Cóntao eldiario.es. Na imaxe (Congreso), o ministro Ábalos defendendo o decreto.
O Seprona investiga a morte a golpes de catro eguas que vivían ceibas nun monte de Oia.
