Fálase

A Pobra do Caramiñal e O Grove sairán a partir deste venres do nivel máximo de restricións, desaparecendo polo tanto o peche perimetral que lles afectaba. Vilanova de Arousa, Cualedro e Carballeda de Valdeorras mantéñense neste nivel máximo. Petín, Muíños, Verea, A Merca, Meira, O Grove, Ribadumia, Marín, Meaño, Meis, Ponteareas, Salceda de Caselas, A Pobra do Caramiñal, Ribeira, Cambre e Coristanco situaranse no nivel alto. Mentres, Lobeira, Lobios, Verín, Cartelle, Xinzo de Limia, O Barco de Valdeorras, Trabada, Barreiros, Chantada, Cambados, Sanxenxo, Vilagarcía de Arousa, Poio, Cangas, Gondomar, Vigo, O Porriño, Nigrán, Tui, Rianxo, Mesía, Carnota, Carral, A Laracha, Betanzos, Carballo e Ares estarán no nivel medio. O resto de Galicia quedará no nivel baixo de restricións.

• MAPA INTERACTIVO | Consulta aquí o nivel no que estará cada concello a partir do venres e as restricións aplicadas

Asasinados en Burkina Faso o xornalista navarro David Beriain, que desenvolvera parte da súa carreira como correspondente para La Voz de Galicia, e o fotoxornalista biscaíño Roberto Fraile. Estaban a realizar unha reportaxe sobre a caza furtiva nese país. Na imaxe, Beriain nun documental no que abordou a situación da mafia en Italia (©DMAX)

A ferrolá Tamara Abalde regresa ao baloncesto galego fichando polo Ensino de Lugo. A internacional galega, que procede do Araski vasco, formouse na canteira do Celta, foi olímpica en 2008 e campioa de Europa en 2009. (Imaxe: Durán Maquinaria Ensino)

A UE emprende accións legais contra AstraZeneca por incumprir o contrato para o subministro de vacinas para a COVID-19 nos termos acordados. A comisaria de Saúde, Stella Kyriakides, subliña que a Comisión Europea inicia o preito contra a farmacéutica en representación de todos os Estados membros.

A ministra de Industria, Reyes Maroto, recibe un sobre cunha navalla ensanguentada na sede do Ministerio. Sucede escasos días despois de que o ministro do Interior, Fernando Grande-Marlaska, a directora da Garda Civil, María Gámez, e o candidato de Unidas Podemos en Madrid, Pablo Iglesias, recibisen sobres con textos ameazantes acompañados de balas. "As ameazas e a violencia nunca acalarán a voz da democracia. A liberdade prevalecerá", di a ministra. Horas despois, o autor do envío foi identificado e as primeiras informacións apuntan a que padece unha enfermidade mental.

Abel Caballero acusa a Xunta de "facer caixa coa pandemia". O alcalde de Vigo denuncia que o Goberno de Feijóo queda con gran parte dos cartos que o Estado destina a Galicia e que deberían recaer nos concellos. 

A Associaçom José Afonso en Galicia lembra a figura de Celeste Caeiro, a lisboeta de orixe galega que converteu o caravel no símbolo da revolución do 25 de abril en Portugal. 

A galega Vero Boquete guía o Milan á final da Copa de Italia con dous goles no derbi ante o Inter. A xogadora compostelá loitará polo primeiro título da historia do equipo feminino milanista. Foto: ©ACMilan

O Banco Santander pecha de vez a súa sucursal en Guísamo (Bergondo) entre protestas da veciñanza e do goberno local, e afonda na exclusión financeira en Galicia, onde hai 45 concellos sen oficina e 118 onde só hai unha. Os clientes da entidade terán que desprazarse ao polígono industrial para seren atendidos. 

Virxinia Pereira xa ten a súa avenida en Pontevedra. Operarios do consistorio mudaron este venres as placas da rúa en presenza do alcalde e outros membros do goberno local. O cambio, destaca Miguel Anxo Fernández Lores, responde á decisión de honrar a Pereira como "persoa de Pontevedra, defensora do legado de Castelao" e mais de "visibilizar a potencia das mulleres da cidade". "Esta rúa era merecente de cambiar o nome porque a persoa que o representaba, o rei emérito Juan Carlos I, non era merecente" e, coida Lores, "cada vez é máis obvia esta percepción". "É o momento de cambialo por unha persoa que si merece recoñecemento", conclúe. (Imaxe: Concello de Pontevedra). 

• HEMEROTECA | As cartas de Virxinia Pereira amosan o seu compromiso ideolóxico e a defensa do legado de Castelao