2,7 toneladas de cocaína intervidas nunha operación antidroga na Ría de Arousa, segundo conta Pontevedra Viva. Tras unha persecución de dúas planadoras, unha quedou encallada preto de Cambados e outra foi trasladada ao porto do Grove. [Imaxe: M.González]
Fálase
A Universidade de Santiago remata a fabricación dos primeiros 1.000 botes de xel desinfectante contra o coronavirus está a fabricar para a sanidade pública. A USC está a producir 9.000 litros deste produto por encargo do Sergas.
A Ribeira Sacra será candidata á distinción como Patrimonio Mundial da Unesco en 2021. A institución vén de confirmar que esta é unha das candidaturas que serán defendidas ante a 45ª sesión do Comité do Patrimonio Mundial.
Morre Dositeo Rodríguez, conselleiro con Manuel Fraga, tras ser diagnosticado de coronavirus. Nacido en 1935, foi titular da Consellería de Presidencia entre 1990 e 1999, vicepresidente da Deputación da Coruña, membro do Consello de Contas e patrón da Fundación Cela, posto ese último no que hai uns meses foi absolto de malversación.
Luar Na Lubre publica ‘Benvido’, primeiro sinxelo do seu novo disco e no que colabora Miguel Ríos.
Abanca merca as accións de Banco Sabadell e Caixabank en Nueva Pescanova e disponse a "tomar o control" da compañía cun 80,46% da propiedade. O banco asegura que prevé procurar "un socio industrial" que "permita construír un proxecto a longo prazo" e manter, en calquera caso, unha parte "importante" do accionariado. A entidade 'herdeira' das desaparecidas grandes caixas galegas leva acumulados uns beneficios duns 3.000 millóns de euros.
O primeiro ministro portugués ve "repugnante" que Holanda suxira investigar a España e Italia por non teren capacidade económica de seu para afrontar os efectos do coronavirus. "Esse é um discurso é repugnante no quadro da União Europeia. Não foi a Espanha que criou o vírus, o vírus atingiu-nos a todos por igual", afirma António Costa en declaracións que recolle Rádio TSF.
A TVG anuncia a reposición de 'Pratos combinados' dende a vindeira semana e cada martes dentro da súa programación especial para "pasar mellor o confinamento" polo coronavirus.
A Radio Comunitaria da Coruña, CUAC FM (103.4), celebra este venres o seu 24 aniversario. En pleno período de confinamento, CUAC continúa emitindo as 24 horas do día e de luns a venres de 18 a 20 horas locutoras e locutores de diversos espazos realizan o programa colectivo Radio Pat(i)o. Pódese escoitar en directo nesta ligazón
O Goberno central devolveu 9.000 test do coronavirus mercados na China mediante un provedor español e dirixidos á Comunidade de Madrid. A devolución produciuse tras detectar persoal técnico que apenas detectaban un 30% de positivos. O Ministerio de Sanidade aclara que son dunha partida diferente á dos 5,5 millóns de test cuxa compra anunciara nos últimos días.