Fálase

A Fiscalía pide cinco anos de cárcere para o ex-edil lucense Francisco Fernández Liñares por branquear 300.000 euros de subornos. Nunha das pezas separadas do caso Pokémon, a fiscal, nun escrito de xuño divulgado agora por varios medios e ao que tivo acceso Praza.gal, pide tamén para o ex-concelleiro socialista e ex-presidente da Confederación Miño-Sil unha multa do dobre do branqueado e 15 anos de inhabilitación. A fiscal pide penas similares para Miguel García-Gesto, o empresario amigo que o axudou a branquear.

O consello do Banco Sabadell reúnese esta tarde para aprobar o cambio de enderezo social da entidade. A mudanza podería realizarse nas vindeiras horas e antes do pleno do luns do Parlament. 

A Audiencia de Madrid ordena reabrir a investigación por branqueo contra Rodrigo Rato

Continúan as protestas pola supresión de áreas sanitarias que pretende a Xunta coa reforma da Lei de Saúde. Este xoves está convocada unha manifestación en Burela contra a supresión da área da Mariña. 

A folga das auxiliares de Navantia paraliza os dous estaleiros en Ferrol. Centos de traballadores formaron grandes piquetes ás portas dos centros de traballo no paro convocado pola CIG. Reclaman o pagamento dos acordos salariais do ano 2001. Máis información, hoxe en Praza.gal.

Os dous candidatos á secretaría xeral do PSdeG, Gonzalo Caballero e Juan Díaz Villoslada, debaten publicamente esta tarde, a tres días da votación do vindeiro domingo. O debate estará dividido en modelo económico, modelo social e modelo de partido e poderá ser seguido por streaming na web das primarias.

Medio Rural dá por controlado o incendio que afectou ao parque do Xurés. Arderon unhas 20 hectáras, di a Consellería.

A Valedora do Pobo pide ao Concello de Gondomar que rotule en castelán os sinais de tráfico, conta Faro de Vigo. Faino despois de que a Garda Civil denunciase agora sinais en galego de hai unha década.

Convocadas cazoladas nas sete cidades galegas en solidariedade co pobo catalán e de repulsa ás ameazas de Felipe VI. A plataforma Galiza con Catalunya chama a saír á rúa nesta tardiña. 

Urkullu ofrécese a Juncker para lograr unha "mediación europea" no conflito catalán. Pide que "a cirse catlá se inclúa na axenda do próximo Consello Europeo para propiciar unha solución dialogada".