Feijóo presenta a declaración de tres festas de interese turístico que se celebran en inverno como exemplo da aposta do seu Goberno pola “desestacionalización do turismo”. O Consello da Xunta outorgou este mércores ese recoñecemento ás festas do butelo da Fonsagrada, do caldo galego de Mourente e da Semana Santa de Santiago.
Pablo Crespo, ex-número tres do PPdeG, suma 13 anos de condena a prisión na primeira sentenza firme do caso Gürtel, que vén de ditar o Supremo confirmando a condena sentenciada polo Tribunal Superior de Valencia en 2017. Debúllaa a edición valenciana de eldiario.es
Trump ratifica que racha o acordo nuclear con Irán, que o resto de asinantes tentarán manter malia á retirada dos EUA. Dende a Unión Europea a máxima responsable da política exterior, Federica Mogherini, aposta pola continuidade do acordo.
Arxentina pedirá o rescate ao FMI, segundo anunciou o presidente Macri, que culpa os gobernos anteriores do deterioro económico do país.
A entidade que reparte as bandeiras azuis das praias asigna 109 a Galicia, 4 menos que o pasado ano. A organización que as concede admite que espazos naturais fráxiles poden verse prexudicados por esta distinción, que a Xunta financia cuns 40.000 euros anuais.
O CIS mantén o PP como primeira forza en intención de voto cun 24%, pero apenas dous puntos por diante de Ciudadanos e o PSOE, aos que ubica nun empate técnico na contorna do 22%. A cuarta forza sería Unidos Podemos e as súas confluencias, con algo menos do 20%. Eldiario.es debulla as principais cifras do inquérito.
Julia Torregrosa toma posesión como nova deputada de En Marea en substitución de Juan Merlo. Torregrosa foi a número 7 das candidaturas da formación e, como Merlo, é membro de Podemos. (Imaxe: En Marea)
O expresidente da Deputación de Pontevedra e actual presidente da Federación Galega de Fútbol, Rafael Louzán, terá que ir finalmente a xuízo polo caso dos alugueiros, tras desestimar o tribunal o recurso presentado polos seus avogados. Louzán está acusado dun delito continuado de suborno impropio e a Fiscalía pide un ano de prisión para el e nove meses para a súa dona
Activo un incendio en Guntín que queimou xa 5 hectáreas e segue sen controlar tras iniciarse a primeira hora da tarde. Foto @BMarroxo
Liberdade sen cargos para os bombeiros andaluces acusados por rescatar refuxiados en Grecia.
