Compostela recibiu este venres o peregrino 200.000 do que vai de ano, cifra que se acada 12 días antes que en 2018 e tres semanas antes que en 2017. Hai uns días Feijóo apelou a unha “era xacobea” cun “Xacobeo de 5.000 días” na presentación dun plan estratéxico que reflicte a masificación como principal aspecto negativo.
Esta fin de semana celébrase en Barreiros o XXXVIII Festival Folclórico Internacional do Emigrante, festa de interese turístico galego con grupos este ano de Rusia, Tahití e Canarias.
O ciclo Atardecer no Gaiás da Cidade da Cultura conta esta noitiña, ás 21 horas, con Malraio, cos que VINTE vén de almorzar no seu local de ensaio no polígono do Tambre
Falece o alcalde do Irixo, Manuel Penedo (PP). Penedo gobernaba este concello ourensán dende 1987, primeiro con Coalición Progresista, despois con Centristas de Galicia e dende 1995, co PP. O pasado 26M o PP logrou a maioría absoluta neste municipio, con 6 dos 9 edís da corporación. (Na imaxe, Penedo en 2012).
As inscricións nas oficinas de emprego reducíronse en 4.328 en Galicia durante o mes de xullo, ata as 150.921; son 12.491 menos que hai un ano. No mesmo mes as afiliacións á Seguridade Social aumentaron en Galicia en 12.290; son 15.937 persoas máis de media cotizando que un ano antes e a cifra total queda en 1,04 millóns. Máis información, hoxe en Praza.gal.
O Banco de España vén de concluír que os prezos do alugueiro de vivendas subiron na contorna do 50% en media década. Ao centrarse só en capitais de provincia o estudo ten un alcance limitado para Galicia, se ben as principais cifras van na mesma dirección que as do Observatorio da Vivenda de Galicia, que detecta subas especialmente intensas en Vigo e A Coruña.
O pregón da escritora Nieves Abarca abriu no serán do xoves as festas de María Pita da Coruña. Na, imaxe, a alcaldesa da cidade, Inés Rey, coa pregoeira e as voceiras municipais de Marea Atlántica, PP e C's no balcón da casa do Concello.
A tradutora Antía Veres Gesto gaña a XVIII edición do Premio Plácido Castro de Tradución polo seu traballo coa novela A Lost Lady (Unha muller perdida), de Willa Cather. O xurado destaca "a capacidade de recreación da autora así como o acerto do uso dun galego extremadamente natural e próximo, empregando unha fraseoloxía propia sen alterar a atmosfera orixinal da novela".
A Xunta remite ao Parlamento o proxecto de lei de aproveitamento lúdico de augas termais, unha das once leis que non foi quen de aprobar en 2018 como prometera. Feijóo presentou o paso dado este xoves como unha mostra de que se está “acelerando nos últimos meses o calendario lexislativo do goberno”.
A selección feminina de fútbol gaélico cae nas semifinais dos Xogos Mundiais ante New York, actuais campioas.
