Os catamaráns da Deputación de Lugo pechan tempada ofrecendo a oportunidade de contemplar a paisaxe outonal da Ribeira Sacra a rentes da auga
Última oportunidade do ano para contemplar a Ribeira Sacra dende unha perspectiva única: a rentes da auga. A ponte de decembro, que neste 2025 ten o venres 5 como pórtico do sábado festivo polo Día da Constitución e da fin de semana longa co día da Inmaculada o luns, 8, servirá como peche da tempada das rutas fluviais en catamarán que a Deputación de Lugo ofrece polos canóns do Sil e mais do Miño.
Estes percorridos veñen sendo moi atractivos no verán. Mais tamén no outono, cando as cores mudan e a particular climatoloxía da contorna permite navegar devagar.
No caso dos canóns do Sil, a ollada nas rutas fluviais amosa unha perspectiva singular das súas paredes verticais de granito. No Miño podemos contemplar os cultivos das ladeiras, os bosques e tamén pequenas aldeas.
As paredes graníticas do Sil ou os bancais da viticultura heroica son algúns dos atractivos destas rutas fluviais, acompañadas de explicacións para "comprender a relevancia histórica, ambiental e produtiva da Ribeira Sacra"
Tanto no Miño como no Sil as viaxes en catamarán sono tamén pola viticultura heroica, "unha das manifestacións máis singulares da relación entre a actividade humana e o territorio nesta comarca". Non en van, explican dende a Deputación de Lugo, van acompañadas de explicacións para "comprender a relevancia histórica, ambiental e produtiva da Ribeira Sacra, así como o seu potencial turístico sostido no tempo".
A plataforma oficial de reservas mantén aberta a venda de billetes para a ponte tanto dende o embarcadoiro de Belesar como no da Ponte do Sil. O propio web ofrece toda a información duns percorridos que van pechar unha temporada de "interese crecente pola navegación como vía de interpretación da paisaxe". Porque as rutas dos catamaráns, indican, combinan a "posta en valor dos recursos naturais e patrimoniais" e o propio turismo.
As rutas en catamarán son "un dos programas turísticos máis asentados" da Deputación de Lugo e así o acreditan, indican, o incremento das reservas ao longo da temporada que agora remata. "Este comportamento sitúa o servizo como un referente de promoción territorial, contribuíndo á difusión e recoñecemento da Ribeira Sacra como paisaxe cultural de alto valor".
