Reivindicarán na rúa os tres "piares básicos" do sistema sanitario público galego: a atención primaria, a atención hospitalaria e a sanidade pública

SOS Sanidade Pública volve convocar unha manifestación en Santiago de Compostela para este domingo, 6 de abril, que sairá ás 12h da Alameda para rematar na Praza do Obradoiro, na que participarán as diferentes plataformas locais e comarcais activas no país, así como os sindicatos e os principais partidos da oposición. A mobilización conta co apoio expreso das xuntas de persoal das áreas sanitarias de Vigo e A Coruña, así como co respaldo de colectivos cidadáns como o Movemento Galego da Saúde Mental. 

Con esta manifestación queren reivindicar na rúa os tres "piares básicos" do sistema sanitario público galego: a atención primaria, que debera ser o eixo do sistema; a atención hospitalaria, garante da atención aos problemas máis graves; e a sanidade pública, como conxunto de recursos para garantir o dereito á saúde da poboación. Por iso, reclaman á Xunta "máis calidade" para a sanidade pública.

A plataforma SOS Sanidade lembra que miles de persoas en Galicia non teñen un profesional da Medicina de Familia de referencia no centro de saúde que lles corresponde, da mesma maneira que milleiros de crianzas carecen de pediatra. 

Apostan por centros de saúde e PAC dotados de persoal suficiente de todas as categorías; ben equipados; accesibles en 24-48 horas máximo; con consultas presenciais a solicitude do paciente; e reorientar a atención primaria á "promoción, prevención, traballo comunitario e a participación social". 

SOS Sanidade lembra que miles de persoas en Galicia non teñen un profesional da Medicina de Familia de referencia, da mesma maneira que milleiros de crianzas carecen de pediatra

Ademais, queren que a Consellería de Sanidade garanta o modelo da atención primaria con especialistas de Pediatría nos centros de saúde, e reforzar a capacidade da primaria de dar resposta aos problemas de saúde mental coa presenza de profesionais da Psicoloxía clínica.

En canto á atención hospitalaria, continúan a pedir unha utilización plena dos recursos instalados nos hospitais de mañá e de tarde e recuperar os recortes nos hospitais comarcais. SOS Sanidade quere que a Xunta poña fin á política de concertación coa privada e restitúa todos os servizos privatizados ao sistema público.  

Así mesmo, incide na necesidade de contar con plans para reducir listas de espera, sobre as que tamén pide que cese a "ocultación" dos datos reais. Aposte por reforzar as unidades de saúde mental, tanto de adultos como infanto-xuvenís; e insta a Xunta a acabar coa precariedade laboral do persoal, ao que considera que se lle debe esixir a dedicación exclusiva (no caso do persoal médico). 

En definitiva, SOS Sanidade considera preciso incrementar o orzamento sanitario público e elaborar un Plan Galego de Saúde que adapte os recursos ás necesidades actuais da poboación; recuperar os servizos privatizados e as áreas sanitarias pechadas; e potenciar a saúde pública para combater os riscos e as epidemias.

O lema + Atención Primaria, + Atención Hospitalaria, + Sanidade Pública "ten especial sentido na Área Sanitaria de Vigo que é a Zona 0 das políticas de privatización da Xunta do Partido Popular, que mantén a asistencia de parte da poboación da área sanitaria en Povisa e que culminou coa construción do Hospital Álvaro Cunqueiro con financiamento e intereses privados que supuxeron un recorte en superficie e prestación respecto o proxecto inicial", manifesta a  Xunta de persoal da área sanitaria de Vigo

"A sanidade pública foi recortada en persoal e orzamento e aínda estamos por debaixo dos recursos anteriores a pandemia"

Pola súa banda, a Xunta de persoal da área sanitaria da Coruña-Cee acudirá á manifestación do domingo cunha faixa co lema stop agresións, xa que critican que a xerencia "segue sen tomar medidas a respecto da seguridade das e dos profesionais da área". "A seguridade das e dos profesionais é a seguridade dos e das doentes, porque é necesario unha atención de calidade e para iso ten que se dar un ambiente seguro", inciden.

"A política sanitaria do Sergas é descaradamente privatizadora, está facendo que progresivamente a sanidade pública galega quede fundamentalmente para problemas médicos complexos e para o manexo de enfermidades que precisen intervencións ou fármacos de custo elevado, problemas que a sanidade privada evita atender e dirixe cara a sanidade pública. O resto de problemas xa os están orientando a calquera punto do sistema, sexa público ou privado, sen distinción", debullan desde a plataforma de SOS Sanidade da Coruña. 

SOS Sanidade critica que, "contrariamente" á súa promesa, a Xunta non está a reforzar o sistema sanitario público tras a experiencia da pandemia: "A sanidade pública foi recortada en persoal e orzamento e aínda estamos por debaixo dos recursos anteriores a pandemia", advirten.