O Ministerio para a Transición Ecolóxica afea a insuficiente documentación coa que pretendía obter a autorización ambiental un porto con condenas no pasado por obviar o impacto das súas actuacións
O Ministerio para a Transición Ecolóxica vén de frear este martes no Boletín Oficial del Estado (BOE) o proxecto da Autoridade Portuaria de Marín de facer un recheo duns 10.000 metros cadrados. Con el prevía ampliar o seu denominado "novo peirao comercial" para captar máis tráficos de cruceiros, de material eólico ou de produtos siderúrxicos.
A "indefinición do proxecto", que "carece dunha adecuada identificación, análise e valoración de todos os potenciais impactos", leva a que o ministerio non sexa quen de facer a súa avaliación ambiental e dea por rematada a súa tramitación. Un erro de xestión por parte da Autoridade Portuaria que se suma a anteriores condenas polos impactos doutros proxectos previos no mesmo porto.
Hai anos que o presidente desde 2009 da Autoridade Portuaria de Marín, o popular José Benito Suárez, marido da ex-ministra de Fomento Ana Pastor, aposta por captar máis tráfico de cruceiros, ata agora testemuñal -un cruceiro con 765 pasaxeiros en 2024 e dous con 143 pasaxeiros en 2017, segundo o IGE- fronte aos outros catro portos galegos de interese xeral do Estado que tamén reciben ese tipo de barcos. Para ese obxectivo, xunto co de mellorar a operación dos barcos con pezas eólicas ou siderúrxicas, quere ampliar a liña de atraque do peirao comercial, agora de 180 metros e que se estendería outros 147 metros cun recheo duns 10.000 metros cadrados e unha dragaxe de 46.000 metros cúbicos.
A xestión incorrecta da Autoridade Portuaria frea o testemuñal sector dos cruceiros e o desenvolvemento da industria eólica
O proxecto foi remitido para a súa avaliación ambiental en marzo do pasado ano ao Ministerio para a Transición Ecolóxica, que agora resolve dar por rematado o procedemento indicando que "non é posible ditar unha resolución fundada ao non contar con elementos de xuízo suficientes sobre os posibles efectos adversos". A resolución sinala que "o documento ambiental presentado carece dunha adecuada identificación, análise e valoración de todos os potenciais impactos derivados das actuacións, así como dunha proposta proporcionada de medidas para previr, corrixir e/ou compensar os impactos".
A resolución do ministerio revela que a Dirección Xeral de Patrimonio Natural da Xunta si considerou o proxecto viable, pero a Dirección Xeral de Desenvolvemento Pesqueiro advertiu de "deficiencias na caracterización das zonas de pesca existentes e polo tanto os impactos sobre as mesmas".
Tamén a Xunta advertiu "deficiencias na caracterización das zonas de pesca existentes e polo tanto os impactos sobre as mesmas"
O freo ambiental á ampliación do peirao comercial chega despois de que outros proxectos no mesmo porto de Marín recibisen diversas condenas xudiciais nos últimos anos polos seus impactos. En 2016 o Tribunal Supremo anulou o plan de usos da Autoridade Portuaria que recollía outros recheos previos porque se aprobara sen sometelo a avaliación ambiental. Tamén o Supremo considerou en 2007 que o acceso ferroviario ao porto construído en 2002 a través da praza do núcleo urbano dos Praceres se executara ilegalmente. Nos dous casos as resolucións xudiciais chegaron cando as actuacións cuestionadas polo seu impacto xa estaban executadas.
