O Sergas fixou o 18 de novembro como o primeiro día de traballo da nova empresa, elixida por ser máis barata que a que viña contratando de emerxencia ata agora

Máis de 20 meses despois da detección do primeiro caso de COVID-19 en Galicia o Sergas vén de fixar no 18 de novembro a data de inicio do traballo da empresa á que adxudicou o primeiro contrato estable de rastrexo de casos da pandemia. O rastrexo de casos viña sendo contratado ata agora por vía de emerxencia coa teleoperadora Universal Support, pero agora pasará a mans de Extel Contact Center, que gañou o concurso público convocado para facer o servizo estable grazas a unha oferta máis barata pero de peor calidade técnica que a que presentou a súa predecesora. 

O Goberno galego non decidiu convocar un concurso para dispoñer dun servizo estable de rastrexo da COVID-19 ata que “a situación se complicou” o pasado Nadal e non foi ata finais de xullo que rematou de valorar as ofertas que recibiu e se decantou pola empresa Extel Contact Center, cun historial de conflitos laborais. Universal recorreu a adxudicación e en setembro o tribunal de contratos público ratificou o proceso, pero non foi ata a pasada semana que o Sergas propuxo adxudicar o primeiro dos sucesivos contratos mensuais coa nova operadora, que abarcará o período entre o 18 de novembro e o 17 de decembro. 

O sergas estimou en 13,8 millóns de euros ao ano o custo do servizo, pero pagará en función do número de casos realmente atendidos cada mes

A Xunta deseñou o concurso como un contrato marco cunha estimación de custo total de 13,8 millóns de euros ao ano, pero pagará en función do número de servizos efectivamente prestados cada mes a partir dunhas tarifas máximas de partida. O sistema contempla tres grandes tipos de actuacións ou sublotes por parte da empresa que se cuantifican en tempos medios de atención que á súa vez se traducen a custo en euros segundo os convenios do sector das empresas teleoperadoras [aquí o detalle dos servizos]. 

No primeiro contrato mensual coa nova empresa, e atendendo á situación actual da pandemia, a Xunta prevé que teña que atender un máximo de 12.000 “casos sen complexidade”, 3.600 “casos complexos” así cualificados por producirse por exemplo en centros como os educativos, e 900 casos froito de “programas especiais de control de gromos, viaxeiros e similares”. 

Con ese máximo de casos e aplicando os custos ofrecidos pola empresa, o Sergas estima en 444.000 euros o que terá que pagar á empresa polo seu primeiro mes de traballo. Pero como xa se prevía no deseño do concurso, matiza que “dada a variabilidade do servizo e os incrementos de actividade que se poden producir, no caso de que o número máximo de casos estimados se acade antes da finalización do prazo de execución do contrato, e este feito se documente de forma xustificada, tramitarase un novo contrato e se o número de casos dos tres sublotes é inferior ao estimado neste contrato aboaranse só os casos realmente presentados”. 

O importe agora estimado polo Sergas para o primeiro mes do servizo suporía en todo un ano preto de 5,5 millóns de euros, algo menos da metade da estimación realizada nos pregos de condicións do concurso, pero as cifras reais a pagar variarán cada mes en función da evolución da pandemia.

A Xunta esixe á empresa que sexa quen de atender o volume de chamadas que lle poida encargar, e deixa en mans dela se ten que contratar ou despedir persoal, ao que non require coñecementos sanitarios

Agora será a empresa adxudicataria a que decida como é quen de organizarse internamente para acadar esas tarifas e prestar un servizo que ata agora viña sendo desenvolvido por teleoperadores que teñen como contrato máis habitual o temporal por 900 euros brutos por 30 horas á semana, segundo a documentación facilitada pola Xunta durante o concurso. A inestabilidade dun persoal ao que a Xunta non require coñecementos sanitarios seguirá manténdose no novo contrato xa que a Xunta esixe á empresa que sexa quen de atender o volume de chamadas que lle poida encargar, e deixa en mans dela se ten que contratar ou despedir persoal e como.