Tras máis dun ano de pandemia a Xunta adxudica a Extel o primeiro sistema estable de seguimento de contactos pola sua rebaixa económica malia que a proposta técnica foi peor que a da empresa que veu contratando de emerxencia

Case ano e medio despois da chegada da pandemia da COVID-19 a Galicia a Xunta adxudica agora o seu primeiro concurso público para dispoñer dun sistema estable de seguimento de casos positivos e contactos. Tras meses contratando ese servizo por vía de emerxencia coa empresa Universal Support, que tamén se presentou ao concurso agora resolto, a Consellería de Sanidade vén de resolver o proceso adxudicando o contrato a Extel Contact Center porque a súa mellor oferta económica permitiulle superar a mellor puntuación técnica que obtivo a competidora que viña prestando o servizo.

O rastrexo da COVID, que vén recibindo críticas tanto da cidadanía como do persoal que o presta pola súa precariedade, pasará agora a estar baseado fundamentalmente nos servizos dunha empresa, Extel, con numerosos conflitos laborais no seu pasado recente. Por outra banda, esta mesma semana Praza.gal revelou que Universal Support, que viña prestando ata agora o servizo, tivo que reforzalo con teleoperadores de Madrid tras non ser quen de cubrir as vacantes que ofertou.

Non foi ata que “a situación se complicou” no pasado Nadal, como ela mesma admitiu, que a Xunta decidiu sacar a concurso un sistema estable de rastrexo da COVID que substitúa os actuais contratos de emerxencia con Universal Support. O concurso foi convocado a finais de marzo e durante este tempo Sanidade estivo analizando as ofertas presentadas, inicialmente tres: Extel, Universal e Bosch Service Solutions. A terceira empresa foi excluída a finais de maio por incumprir as condicións do concurso, e a partir dese momento valoráronse as ofertas das outras dúas aspirantes. 

O concurso valorou co mesmo peso sobre o total os criterios técnicos e os económicos, o que fixo que a rebaixa de tarifas ofrecida por Extel lle permitise levar o contrato

O concurso deseñouse cunha valoración máxima idéntica de 50 puntos para os criterios técnicos e 50 para os económicos. Segundo os documentos feitos públicos pola Xunta este xoves xunto coa resolución de adxudicación do contrato, que aínda deberá ser formalizado, Universal Support, que xa viña prestando o servizo, acadou na vertente técnica 44,60 puntos, fronte aos 31,40 puntos de Extel, pero no apartado económico deu a volta e a empresa finalmente adxudicataria acadou 42,74 puntos fronte aos 24,93 da súa competidora. O resultado final foi a adxudicación do contrato a Extel por 74,14 puntos fronte aos 69,53 de Universal. 

A mellor oferta económica de Extel é froito da rebaixa de tarifas que ofertou. A Xunta deseñou o concurso como un contrato marco cunha estimación de custo total de 13,8 millóns de euros ao ano, pero pagará posteriormente en función do número de servizos efectivamente prestados a partir dunhas tarifas máximas de partida que fixou en 25,79 euros pola xestión de casos sen complexidade, 29,12 euros por caso con complexidade e 3,05 euros por casos especiais. Sobre esas tarifas máximas a rebaixa ofrecida por Extel foi moi superior á de Universal, de xeito que reduciu nuns tres euros os casos sen complexidade, uns tres euros e medio os complexos e case medio euro os especiais.

A Xunta esixe á empresa que sexa quen de atender o volume de chamadas que lle poida encargar, e deixa en mans dela se ten que contratar ou despedir persoal, ao que non require coñecementos sanitarios 

Agora será a empresa adxudicataria a que decida como é quen de organizarse internamente para acadar esas tarifas e prestar un servizo que ata agora viña sendo desenvolvido por teleoperadores que teñen como contrato máis habitual o temporal por 900 euros brutos por 30 horas á semana, segundo a documentación facilitada pola Xunta durante o concurso. A inestabilidade dun persoal ao que a Xunta non require coñecementos sanitarios seguirá manténdose no novo contrato xa que a Xunta esixe á empresa que sexa quen de atender o volume de chamadas que lle poida encargar, e deixa en mans dela se ten que contratar ou despedir persoal e como.

Nos últimos anos, Extel --ata hai pouco pertencente ao Grupo Adecco e que fai traballos para compañías como Movistar-- foi protagonista de varios conflitos laborais. Un dos máis relevantes foi o que levou o seu persoal a unha folga contra os despidos "por enfermar", que baleirou as súas instalacións. 

Extel: varios propietarios en poucos meses

Extel foi protagonista de diversos conflitos laborais nos últimos anos

En 2019, o aval do Tribunal Constitucional ao despedimento obxectivo por faltar un número determinado de días ao traballo, aínda que fose por unha enfermidade e de forma xustificada, cebouse co sector do telemárketing e Extel tirara desta posibilidade que lexitimara a Xustiza para despedir varias persoas nunha semana, tres delas no mesmo día. A decisión fora considerada polo comité de empresa unha "estratexia" da compañía para prescindir de persoal "sen necesidade de ERE e maior conflito".

Coa derrogación do artigo do Estatuto dos Traballadores que permitira esas prácticas, a empresa acabou por dar marcha atrás tras as protestas dos traballadores. 

Desde hai só uns meses, Extel é propiedade de Abai Group, que foi acusado polo persoal da planta da Coruña de "roubarlles" vacacións ao obrigalos a recuperar horas. Abai nace da fusión de Rainbow Comunicaciones e Extel CRM, cun volume de negcio de máis de 80 millóns de euros. Xurdiu catro meses despois de que Adecco vendese Extel a Analytics Business Solution. 

Abai Group ten centros de traballo en Madrid, Barcelona, Málaga, León, Zaragoza, A Coruña e Colombia e conta cuns 3.700 traballadores, 600 deles en Galicia.