Feijóo esgrime o bloqueo estatal na estrea parlamentaria de Caballero, que o insta a "gobernar o ano que lle queda"

Gonzalo Caballero e Alberto Núñez Feijóo, nos intres previos á primeira sesión de control do novo período de sesións, este 11 de setembro CC-BY-SA PSdeG | David Cabezón/Xunta de Galicia

Hemeroteca

Alberto Núñez Feijóo tivo practicamente unha vintena de interlocutores entre líderes orgánicos e parlamentarios nos dez anos e cinco meses que acumula na presidencia da Xunta. Esa intensa rotación nas diversas forzas da esquerda galega na última década é unha das dúas ideas forza coa que o PP recibiu o secretario xeral do PSdeG, Gonzalo Caballero, na súa estrea parlamentaria como líder da formación maioritaria da oposición. A outra, o bloqueo na formación dun novo Goberno den España e o seu impacto no atraso dos fondos do financiamento autonómico, que Feijóo esgrimiu contra un Caballero que o insta a "gobernar no ano que lle queda" na Presidencia da Xunta.

Gonzalo Caballero: "Leva xestionados máis de 100.000 millóns de euros cun balance fondamente negativo"

"Leva dez anos á fronte da Xunta, leva xestionados máis de 100.000 millóns de euros" cun balance "fondamente negativo" nunha Galicia "máis cativa, con menos poboación ocupada, con menos traballo, co medio rural máis abandonado e baleiro" e unha lexislatura convertida "nunha especulación sobre os seus intereses persoais", comezou o líder socialista. Estes, xulgou, son só algúns dos elementos que propiciaron a "nova maioría social do país" reflectida nas eleccións da primavera pasada: "en abril o 55% das galegas e galegos apoiaron as forzas de progreso", resumiu en referencia ás xerais do 28A.

Un intre da sesión de control deste 11 de setembro CC-BY-SA David Cabezón / Xunta de Galicia

O líder do PSdeG advirte a Feijóo da "maioría social de progreso" reflectida nas eleccións da primavera e o presidente retruca mofándose del: "Nos divertimos moito, estivo simpático"

No que semellou unha aposta por procurar unha combinación do ton de oposición co institucional Caballero retou a Feijóo a "decidir" se "quere gobernar no ano que lle queda". Ou se, pola contra, prefire "seguir na confrontación, na política de teatriño que lle mandan dende Madrid". 

A resposta do titular da Xunta foi polo vieiro que xa anticipara nos debates previos con Antón Sánchez (Común da Esquerda) e Ana Pontón (BNG): reprochar que o Goberno de España aínda non transferise os 700 millóns pendentes do financiamento autonómico previsto para Galicia neste 2019. "Cando fala de teatrillo refírese aos 700 millóns?", preguntouse antes de afirmar que tan certo é que está a gobernar que xa deseña "a Galicia do ano 2030".

"Vostede xa se pon na oposición", ironizou Caballero antes de lanzar a Feijóo un reproche que todos os líderes da esquerda, sen excepción, lanzaron ao presidente popular nesta década. "Esta non é a sesión de control a Gonzalo Caballero nin ao PSOE, é a sesión de control a un presidente que ten gobernar", evidenciou. 

Na quenda final, sen marxe de retruque para a oposición, Feijóo anunciou o envío dunha carta a Pedro Sánchez cunha "proposta de Real Decreto" que, di, permitiría transferir os fondos pendentes ás autonomías co Goberno de España en funcións

"Deixe a confrontación e póñase a gobernar", insistiu o socialista. "Queremos que no ano que lle queda goberne para os galegos e non sexa manexado pola confrontación dunha dereita botada á ultradereita", di. Pero tamén que sexa consciente de que a "maioría social" xa non apoia o PPdeG, dixo mentres na bancada da dereita o secretario xeral dos populares e outros cargos rían abertamente da súa intervención.

"Nos divertimos moito, estivo realmente simpático", descualificou Feijóo na súa quenda de peche antes de mofarse de Caballero porque, ao seu xuízo, "fala como presidente da Xunta" aínda que "nunca gañou as eleccións" e non é máis ca un "franciscano socialista" a dar "un mitin" no Parlamento. "Non sé dá conta vostede de que non é o señor Sánchez?", cuestionou antes de lanzar un anuncio cando xa non existía quenda de retruque para ningún voceiro da oposición: escribirá a Pedro Sánchez unha carta reclamando o financiamento pendente e anexará á misiva "unha proposta de Real Decreto" que, asegura, permitiría transferir os fondos ás autonomías mesmo co Goberno central en funcións.

Despece

  • O presidente culpa os concellos dos escasos resultados do plan de vivenda baleira da Xunta

    Antón Sánchez pregunta a Feijóo na sesión de control deste 11 de setembro CC-BY-NC-SA Común da Esquerda

    A primeira sesión de control do novo curso político trouxo consigo tamén unha reestrea, a de Antón Sánchez nos labores de voceiro. Sánchez, que xa exercera este labor en AGE no treito final da pasada lexislatura, asumiu a portavocía de Común da Esquerda tras a ruptura do antigo grupo de En Marea. As circunstancias internas da creación do novo grupo foron aproveitadas por Alberto Núñez Feijóo na resposta ás preguntas de Sánchez a respecto da política de vivenda do Goberno galego e, nomeadamente, dos escasos resultados do seu plan de vivendas baleiras, que no pasado ano admitiu o propio Instituto Galego de Vivenda e Solo.

    O IGVS xa admitira hai un ano que o plan de vivendas baleiras da Xunta apenas lograra xestionar uns poucos pisos

    O "programa estrela de vivendas baleiras" non foi máis ca "propaganda", acusou Antón Sánchez, xa que "en 2017 houbo catro axudas recibidas para propietarios" que incluíron os seus pisos no proxecto e "neste 2018 este programa estrela deu dúas axudas en todo o país". Segundo Feijóo ese program non funcionou porque foi "boicoteado de forma constante" polos concellos urbanos gobernados polas mareas ata o pasado xuño -A Coruña, Ferrol en Santiago-. E malia isto, proclama, Galicia é xa "un referente na política de vivenda para desfavorecidos e rendas baixas.

    Descualificación ao BNG como "tonto útil"

    Ana Pontón diríxese a Feijóo na sesión de control deste 11 de setembro CC-BY-NC-SA BNG

    Este mércores o Parlamento acolleu tamén o primeiro debate do novo período de sesións entre o presidente da Xunta e a portavoz nacional do BNG, Ana Pontón, que instou a Feijóo a facer balance da súa xestión á fronte do que considera "un goberno de palla" cun "presidente que oculta o seu fracaso con toneladas de manipulación". "Antes era o recadeiro de Rajoy e agora, o recadeiro de Casado, que xa lle dixo que hai que utilizar a Galiza para desgastar a Sánchez", reprochou a líder nacionalista.

    Ana Pontón: "Antes era o recadeiro de Rajoy e agora, o recadeiro de Casado"

    A xuízo de Pontón, Feijóo "mente cando diq eu se debe máis aos galegos que ao PP" porque se así fose, exemplificou, ademais de criticar a Pedro Sánchez por non desbloquear o financiamento pendente "presentaría recurso xudicial para defender o que lle corresponde a Galiza" e "abandonaría o seguidismo do centralismo madrileño" apostando por un modelo de financiamento que, para o Bloque, debera basearse no concerto económico. 

    Feijóo atribuíu esa "manipulación" ao propio Bloque que, asegura actúa como "tonto útil dos gobernos" do PSOE. "Quen veu e quen está vendo ao BNG", ironizou o presidente. "Non hai nada máis tonto que dicir unha cousa e a contraria na mesma intervención", retrucou Pontón, quen advertiu que dende o BNG actúan con "máis respecto" como para "vir a este Parlamento a faltar", o cal "é o seu estilo cando non ten argumentos".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza