Feijóo volve desdeñar a reforma do Estatuto que reclama o PSdeG e esixe que o BNG "abandone o soberanismo"

Feijóo, nun intre da sesión de control deste 24 de novembro CC-BY-SA David Cabezón / Xunta

Hemeroteca

Alberto Núñez Feijóo chegou á presidencia da Xunta no ano 2009 coa promesa de "presentar desde o Goberno unha completa iniciativa de reforma do Estatuto de Autonomía de Galicia" que retomase a que fracasara en 2007, cando o propio Feijóo se desmarcara do proceso iniciado a por iniciativa do Executivo da época (PSdeG-BNG) alegando desacordo na definición nacional de Galicia no preámbulo do texto. En 2012 volveu incluír a promesa no seu programa electoral, aínda que con máis vaguidade, e en 2016 e 2020 xa a suprimiu.

O PSdeG reclama retomar a reforma estatutaria aparcada para "abrir unha nova páxina na historia da autonomía" tras a pandemia

Durante este ano, ao fío do cuadraxésimo aniversario do actual Estatuto, o presidente da Xunta esgrimiu a situación política de Catalunya como argumento para manter aparcada a reforma que el mesmo prometera. Este mércores, no marco da sesión de control do Parlamento, Feijóo tamén apelou a Catalunya para desdeñar a reforma estatutaria que reclamou o PSdeG por boca de Gonzalo Caballero. Para abordala eventualmente, agregou, sería tamén preciso que "o BNG abandone o independentismo e o soberanismo".

Gonzalo Caballero diríxese a Feijóo durante a sesión de control deste 24 de novembro © Parlamento de Galicia

"Así que pasen as peores páxinas da pandemia", sinalou o voceiro socialista, cómpre "abrir unha páxina" nova "na historia da autonomía" mediante a "actualización e reforma do Estatuto" para, por exemplo, incorporar unha carta de dereitos sociais, aspectos sanitarios ou tecnolóxicos, exemplificou. Na súa resposta, Feijóo aludiu a unha enquisa publicada nas últimas semanas polo xornal La Voz de Galicia para concluír que esa reforma "non forma parte dos problemas dos galegos".

Antes "se conformaban con ser unha nación, agora se plantexan ser unha república", caricaturizou Feijóo ao BNG, cuxa portavoz nacional, Ana Pontón, ve o presidente da Xunta inmerso "no Matrix de Monte Pío, que lle impide escoitar"

A xuízo do xefe de filas do PP en Galicia, "a reforma do Estatuto non significa inevitablemente mellorar a calidade de vida dos galegos" e Catalunya é a mostra. Ademais, acusa, a anterior reforma fracasou porque para o BNG "o problema" era que Galicia debía ser definida como "unha nazón ou unha nación"; "daquela se conformaban con ser unha nación, agora se plantexan ser unha república, a república da Galiza", asegurou, antes de proclamar que iso implicaría "considerar España a unidade de repúblicas soviéticas" e "iso era a URSS".

Os reproches ao Bloque por "independentista e soberanista" repetíronse na resposta de Feijóo a Ana Pontón, quen debuxou o presidente inmerso no "Matrix de Monte Pío, que lle impide escoitar" protestas como a da recente folga na Mariña ou a manifestación en defensa da sanidade pública que se desenvolveu este mesmo mes. "Ofrecémoslle propostas", expuxo Pontón antes de sinalar algunhas como un "plan industrial para A Mariña" ou o "reforzo da Atención Primaria" do Sergas con 200 millóns adicionais en 2022.

Ana Pontón diríxese a Feijóo durante a sesión de control deste 24 de novembro © Parlamento de Galicia

"A palabra Matrix é moi propia do país", ironizou o presidente da Xunta para responder á líder do BNG, formación á que diagnostica o "problema" de "non escoitar ao pobo" mentres "os galegos que saben votar nunca xamais lle deron a Xunta ao BNG" e por iso Pontón "nisto da presidencia, toca de ouvido". "Se pensa que por gañar as eleccións ten a razón, está moi trabucado", repuxo Pontón.

Despece

  • Feijóo atribúe a posible saída de Ence da ría a unha "decisión partidista, ideolóxica e sectaria" malia ser froito de tres sentenzas xudiciais

    Vista do pleno do Parlamento durante a sesión de control do 24 de novembro de 2021 CC-BY-SA David Cabezón / Xunta

    D.L.

    O presidente da Xunta volveu defender este mércores a permanencia da fábrica de Ence en terreos de dominio público á beira da ría de Pontevedra e a atribuír a súa eventual marcha ao que denomina como "decisión partidista, ideolóxica e sectaria". Faino mentres a pasteira está pendente do pronunciamento definitivo do Tribunal Supremo, ao que recorreu para tentar reverter as tres sentenzas da Audiencia Nacional que, en resposta aos recursos de Greenpeace, a APDR e o Concello de Pontevedra, consideran ilegal a prórroga outorgada á empresa polo Goberno de Mariano Rajoy en funcións para permanecer na ría ata 2073.

    Pontón: "As sentenzas din que concederon unha prórroga ilegal e agora queren saltalas; a única alternativa viable é o traslado, póñase a traballar e deixe de enganar"

    Tras esgrimir ese argumento en resposta á pregunta do PSdeG a respecto dunha eventual reforma do Estatuto, Feijó regresou sobre el para contestar a Ana Pontón, portavoz nacional do BNG, que o inquiriu sobre os seus plans para paliar a crise industrial na Mariña. "As leis e as sentenzas din que vostedes concederon unha prórroga ilegal e que agora queren saltar unha sentenza para seguir beneficiando o consello de administración de Ence", reprochou a nacionalista, aínda que iso implique "poñer en risco aos traballadores".

    "A única alternativa viable é o traslado; póñase a traballar e deixe de enganar", reclamou Pontón. Feijóo retrucou que "ao consello de administración de ENCE lle importa tres o que o corra cos montes galegos, coas familias ou cos traballadores" porque "van seguir tendo traballo", mentres que "a nós nos importan os traballadores"

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza