O ministerio argumentou en 2016 dificultades legais para pedir unha nova análise do sinistro á Comisión de Investigación de Accidentes Ferroviarios cinco días antes de que así o establecese un informe da Avogacía do Estado
En 2016, despois de que a Axencia Ferroviaria da Unión Europea dixese que a análise técnica do accidente de Angrois que realizara a Comisión de Investigación de Accidentes Ferroviarios (CIAF) de Fomento poñendo o foco no maquinista do tren Alvia non fora independente, o ministerio argumentou dificultades legais para pedir unha nova investigación porque a CIAF xa si era independente. Tras avanzala Feijóo, Fomento esgrimiu esa argumentación o 14 de xullo, antes de que así llo certificase a Avogacía do Estado cinco días máis tarde, o 19 de xullo.
Tras o accidente de Angrois do 24 de xullo de 2013, en 2014 a CIAF emitiu o informe da súa investigación, no que puxo o foco no despiste do maquinista, que non freou antes da curva e descarrilou. Ese informe técnico influíu na investigación xudicial ata o punto de que un perito designado pola Xunta plaxiou varios parágrafos, pero foi desmontado dous anos despois pola Axencia Ferroviaria da Unión Europea.
As "dificultades legais" foron reveladas por Feijóo e confirmadas polo ministerio antes de que o avogado do Estado asinase o informe
O 7 de xullo de 2016 varios medios, entre eles Praza.gal, revelaron un informe remitido pola axencia ferroviaria comunitaria ao xulgado no que se di que a investigación da CIAF non fora independente e incidira no maquinista sen analizar outros factores que puideron contribuír ao accidente. Aquela crítica europea provocou que o PP galego, que ata daquela incidira na responsabilidade do maquinista propuxese unha declaración institucional reclamando unha nova investigación técnica.
Preguntado por aquel movemento na rolda de prensa posterior ao Consello da Xunta do 14 de xullo, o presidente Feijóo revelou que ademais de enviarlle a reclamación dunha nova investigación falara persoalmente coa daquela ministra de Fomento, a popular Ana Pastor, que lle trasladara “dificultades legais” que lle impedían reclamar á CIAF unha nova investigación. O propio ministerio confirmou aquel mesmo día a Praza.gal e outros medios o revelado por Feijóo, que a CIAF fora reformada desde que emitira o seu informe sobre Angrois para mellorar a súa independencia, polo que xa non podía pedirlle que volvese a investigar o accidente porque suporía atentar contra a súa independencia.
Porén, aquelas “dificultades legais” reveladas por Feijóo e confirmadas por Fomento non serían certificadas formalmente pola Avogacía do Estado ao ministerio ata cinco días máis tarde. O 19 de xullo de 2016 é a data na que o avogado do Estado xefe do ministerio asina o informe, solicitado polo ministerio, no que conclúe que a CIAF “ten ‘independencia funcional plena’ respecto do Ministerio de Fomento” e por iso o ministerio “non pode legalmente ordenarlle que deixe sen efecto dito informe e elabore outro novo”.
A UE vén reclamando desde hai cinco anos unha nova investigación, pero o ministerio argumenta que xa non llo pode pedir á CIAF porque agora é independente e esta négase
Ese argumento de que a CIAF xa é independente e o ministerio non pode pedirlle unha nova investigación vén sendo esgrimido desde aquela polos sucesivos ministros, mentres sucesivas comisarias de Transporte da UE veñen reiterando que España segue sen cumprir a súa obriga de facer unha investigación técnica independente do sinistro como esixe a normativa comunitaria. Pola súa banda, a propia CIAF insiste en negarse a cumprir coa petición da UE.
Ante este bloqueo da investigación técnica, a plataforma de vítimas do accidente iniciou unha causa contencioso-administrativa contra o Estado para tentar que a xustiza o obrigue a realizar a nova análise. Mentres, a instrución da causa penal vén de darse por rematada e xunto co maquinista será xulgado tamén un ex-cargo de Adif por non avaliar o risco do previsible despiste do condutor e habilitar medidas que o paliasen, medidas que o informe da CIAF non tivo en conta.
