A anterior lei de medios públicos obrigaba á Xunta a lanzala en setembro de 2012, pero 12 anos despois aquela norma é substituída por outra que ademais de deixar en mans do PP a dirección da CRTVG tamén obvia a súa supervisión independente
A normativa europea en materia de comunicación audiovisual establece que "os Estados membros deben asegurarse de que as súas autoridades ou organismos reguladores sexan xuridicamente distintos do goberno". Así o preveu xa hai máis dunha década a Lei dos medios públicos de Galicia, de 2011, que estableceu a obriga de que o Goberno galego enviase ao Parlamento "un proxecto de lei que regule ou encomende as funcións da autoridade audiovisual" antes de setembro de 2012.
Iso nunca sucedeu e agora a nova lei de medios públicos que vén de presentar a Xunta non só contempla a posibilidade de que o PP nomee en solitario a dirección destes medios senón que elimina calquera referencia á creación dunha autoridade audiovisual independente, polo que esas funcións de control seguirán recaendo na Secretaría Xeral de Medios do Goberno galego.
A normativa europea prevé que os medios de comunicación audiovisuais, tanto públicos como privados, sexan supervisados por autoridades independentes dos gobernos para "garantir o respecto dos obxectivos de pluralismo dos medios de comunicación, diversidade cultural, protección dos consumidores, correcto funcionamento do mercado interior e fomento dunha competencia leal". Porén, os gobernos resístense a cumprir e en España, como repasou infoLibre hai pouco, só hai autoridades audiovisuais independentes en Catalunya, Andalucía e Comunitat Valenciana, mentres que Navarra e Madrid tíñanas e suprimíronas.
En Galicia a lei de medios públicos de 2011 estableceu, na súa disposición derradeira quinta, que a Xunta "remitiralle ao Parlamento de Galicia, no prazo de nove meses desde a entrada en vigor desta lei, un proxecto de lei que regule ou encomende as funcións da autoridade audiovisual. Mentres non se aprobe a norma de referencia terá a consideración de autoridade audiovisual quen viñese exercendo tales funcións".
Eses nove meses remataron en setembro de 2012. E 12 anos despois segue sen existir unha autoridade audiovisual independente; as súas funcións seguen sendo exercidas pola Secretaría Xeral de Medios, dependente directamente da Presidencia da Xunta.
Aquela lei de 2011 vai ser agora substituída por unha nova Lei de servizos dos medios de comunicación audiovisual de Galicia a sociedade dixital. Unha norma na que o PP resérvase a posibilidade de nomear en solitario, se non hai acordo con outro grupo parlamentario, a dirección da CRTVG, que agora pasará a chamarse Corporación de Servizos Audiovisuais de Galicia.
A exposición de motivos da nova lei incide en que o control externo dos medios será "a través dos mecanismos que xa se viñan aplicando", isto é, pola Secretaría Xeral de Medios da Xunta
Tanto a lei de 2011 como a agora proposta pola Xunta remitían a supervisión externa da CRTVG ao Parlamento de Galicia e á "autoridade audiovisual". Pero se a de 2011 remitía á inmediata creación dunha autoridade independente, a nova norma, que derroga a anterior, obvia por completo calquera referencia a esa creación. É máis, a exposición de motivos da nova lei incide en que ese control externo por parte da autoridade audiovisual será "a través dos mecanismos que xa se viñan aplicando". Isto é, o control tanto da CRTVG como dos medios audiovisuais cuxas licenzas dependen da Xunta seguirá en mans da Secretaría Xeral de Medios.
A esa supervisión externa a nova norma só engade que en materia financeira será o Consello de Contas o encargado do "control periódico do financiamento público que reciba a Corporación de Servizos Audiovisuais de Galicia".
Na lei de 2011 o Consello Asesor da CRTVG dependía da autoridade audiovisual independente nunca creada, pero na nova lei estará integrado na propia corporación e a maioría dos seus integrantes serán nomeados polo partido que sustente a Xunta
Por outra banda, a lei de 2011 facía depender da autoridade audiovisual independente o Consello Asesor da propia CRTVG. Ese precepto levou nestes anos o persoal do ente a reclamar de xeito insistente a súa constitución no marco das súas reiteradas protestas polo control gobernamental dos medios públicos.
Pola contra, na nova norma ese Consello Asesor está integrado na propia corporación e o seu nomeamento será controlado fundamentalmente polo partido que sustente a Xunta. Terá 15 membros: 9 serán elixidos polo Parlamento por maioría de dous terzos ou de tres quintos en segunda votación, 3 serán designados pola Xunta, 2 serán representantes do persoal dos medios públicos e o derradeiro será o director xeral da propia corporación.
