Os apartados dedicados á conservación da natureza do documento remitido polo Goberno de España á UE din apostar por “garantir o uso público” do mar e a costa pero non din nada de recuperar concesións

O Plan de Recuperación que o Goberno de España vén de presentar á UE para recibir os fondos comunitarios extraordinarios habilitados pola pandemia da COVID ten como fío central a dixitalización e transición verde da economía. Organiza as actuacións nunha trintena de áreas ou “compoñentes” que van desde as reformas tributarias ou a posibilidade de introducir un “pago por uso” nas autovías á mellora da sanidade, con medidas como a promesa de reducir a temporalidade do seu persoal. Entre eses trinta “compoñentes”, e máis alá dos que se centran na descarbonización da enerxía, hai dous dedicados expresamente á conservación dos valores naturais. 

No apartado dedicado a “conservación e restauración de ecosistemas marinos e terrestres e a súa biodiversidade” [aquí ese capítulo en PDF] o documento aposta por unha mellora das masas forestais para facilitar a súa “adaptación e resiliencia” ao cambio climático. Para iso, di, apostarase polas especies autóctonas “con compromisos de mantemento a longo prazo”. E engade que “cumprir con este obxectivo require evitar a utilización expresa de especies produtoras formando monocultivos (Eucalyptus sspp)”. Noutro punto o documento sinala tamén que a medida que propón de xestión forestal sostible “evitará e excluirá explicitamente o apoio ás plantacións de monocultivos, especialmente de eucalipto, para minimizar o estrés hídrico e os riscos de incendio”. [Viveiros de eucalipto confirman o auxe nas plantacións a un mes da 'moratoria' da Xunta, criticada polo seu "efecto chamada"]

O plan propón para as BRIF, como a que ten base en Laza, “tarefas diferentes á extinción e prevención de incendios forestais, como poden ser a erradicación de especies exóticas invasoras”

Para a loita contra eses incendios, o plan di querer modernizar “renovando e ampliando as súas bases” as brigadas estatais de reforzo na loita contra os lumes forestais, as coñecidas como BRIF, dez en todo o Estado das que unha ten base en Laza (as outras dúas máis próximas a Galicia son a asturiana de Tineo e a leonesa de Tabuyo). Ademais de renovar a flota de avións estatais de loita contra os incendios e de axudar ás comunidades autónomas a renovar o seu parque de vehículos terrestres, o plan di querer “ampliar o ámbito de actuación” das BRIF “a un dispositivo integral de protección do patrimonio natural” con “tarefas diferentes á extinción e prevención de incendios forestais, como poden ser a erradicación de especies exóticas invasoras”. 

Canto ao capítulo dedicado á “preservación do espazo litoral e os recursos hídricos” [aquí en PDF], o plan fala de xeito xenérico de “garantir o uso público do mar, da súa ribeira e do resto do dominio público marítimo-terrestre, sen máis excepcións que as derivadas de razóns de interese público debidamente xustificadas”. En plena polémica pola reforma da Lei de Costas a través da Lei de Cambio Climático, na que o Senado vén de establecer que non revogará concesións costeiras xa en vigor, o plan agora enviado a Bruxelas nada di de xeito expreso de recuperar concesións máis alá desa referencia a que o uso non público do litoral debe ser unha excepción xustificada por interese público. 

O documento tamén prevé actuacións de control dos recursos hídricos terrestres e de mellora dos encoros, pero tampouco nada di de recuperar concesións nese eido.