"Paso atrás", "tapadeira", "paripé": BNG e PSdeG ven o PP lonxe da procura dun pacto polo galego

Alberto Pazos (PP), Mercedes Queixas (BNG) e Silvia Longueira (PSdeG) e capa da proposta de novo Plan Xeral de Normalización CC-BY-SA Xunta | PP | BNG | PSdeG

Hemeroteca

A proposta de novo Plan Xeral de Normalización da Lingua Galega vén de chegar ao Parlamento. Tras unha primeira análise do documento que levaban reclamando e mesmo meses, os grupos da actual oposición, BNG e PSdeG, aseguran ver o Goberno galego do PP lonxe dunha vontade real de lograr un pacto a prol da lingua se a base é un documento no que observan grandes doses de "paso atrás", "tapadeira" ou "paripé".

Xa pouco despois da presentación do plan a portavoz nacional do BNG, Ana Pontón, advertiu da que considera unha das principais eivas do plan: "Mantén o decreto da vergoña", en referencia á. norma que rexe no ensino dende 2010. Ao seu xuízo, é o primeiro e principal sinal de que o PP "non quere un pacto polo galego", senón só "un acto de propaganda de Rueda para tapar 17 anos de goberno en contra do galego".

Mercedes Queixas, voceira de Lingua do BNG, en conferencia de prensa sobre a proposta de Plan Xeral CC-BY-NC-SA BNG

Tras unha lectura máis demorada, o Bloque ofrecía este xoves unha interpretación máis ampla do documento a través da súa voceira de Lingua, a deputada Mercedes Queixas. A proposta de actualización do PXNLG, advirte, pode acabar sendo "un paso atrás para o galego" porque, considera, mesmo "reduce a protección para a lingua que existe no plan vixente",  o aprobado por unanimidade en 2004 e que, por exemplo, "fixa un 50% como mínimo de ensino en galego", "protección" que o novo documento "elimina".

Queixas (BNG): "Mesmo reduce a protección para a lingua que existe no plan vixente"

Afirma Queixas que o BNG ten constancia de que, en ámbitos coma o escolar, "gran parte das medidas propostas polas persoas expertas nas comisións de traballo non lograron pasar o filtro de San Caetano". E iso levou a que a proposta acabe conducindo ao que o "único que ofrece Rueda" sexa "un pacto do PP co PP.

Alén das aulas, Queixas ve "confirmada" unha "estratexia de acoso de derruba ao galego" por aspectos como que o plan non ten "medidas concretas, planificación nin orzamentos" nun contexto no que, advirte, cómpre lembrar que foi o PP o que "rompeu unilateralmente todos os consensos" que xa existían sobre o idioma, dende o Plan de 2004 ao decreto do enisno. "Quenten que volver ao consenso é o PP" e por iso "pedimos a Rueda que, dunha vez por todas, saia de detrás da pancarta en contra do galego".

Silvia Longueira, voceira de Lingua do PSdeG CC-BY-NC-SA PSdeG

Tamén o PSdeG recea das intencións do Goberno co plan. A voceira de Lingua e Cultura dos socialistas no Parlamento, Silvia Longueira, observa de entrada un "intento" de usar como "tapadeira das súas políticas contra o galego" a proposta de novo Plan Xeral, que "non vai combater a lenta morte da lingua" e cuxo contido a Xunta "nin sequera tivo a decencia de envialo aos grupos parlamentarios antes de presentalo".

Longueira (PSdeG): "Como podemos seguir tratando unha lingua minorizada en igualdade de condicións con outra que non o é?"

A proposta, cre Longueira, non conten moito máis ca "medidas desnutridas que nin se parecen a liñas estratéxicas para frear a caída de falantes"e resulta, ao seu xuízo, especialmente "demoledor" no ensino. "Hai enunciados tan demoledores como ‘promover unha presenza equilibrada das dúas linguas oficiais na educación infantil", advirte antes de preguntarse "como podemos seguir tratando unha lingua minorizada en igualdade de condicións con outra que non o é?".

A Xunta di estar "en condicións" de "moverse" da súa posición para chegar a un acordo político sobre o galego

O mesmo sucede, advirte, mesmo con outras accións que poden ser "importantes", como "a incorporación do galego ás actividades de socialización no ámbito educativo", ao formulalas dende unha chamada ao "equilibrio" que "non se corresponde coa realidade". Ao tempo, lamenta, "cuestións aínda máis relevantes para a transmisión do galego "déixanse ao azar" nun contexto no que o PP "demostra que atallar a situación de crise que padece o galego non está entre as súas prioridades, máis ben ao contrario".

Desde a Xunta, pola súa banda, o conselleiro de Cultura, Lingua e Xuventude, José López Campos, cre que o documento "acredita" que o Goberno galego está "en condicións de moverse da súa posición para intentar chegar a unha negociación e ao acordo que nos demanda a sociedade galega". Así o asegurou tras a entrega do novo PXNLG ao presidente da Real Academia Galega, Henrique Monteagudo. 

Despece

  • A Mesa exixe a dimisión do conselleiro de Cultura e do secretario xeral da Lingua

    Celia Armas e Marcos Maceira, d'A Mesa CC-BY-SA A Mesa

    A Mesa pola Normalización Lingüística exixe a dimisión do conselleiro de Cultura, José López Campos, e do secretario xeral da Lingua, Valentín García, despois de montar “un show” para “tapar a súa incapacidade de gobernar a favor do galego” co novo Plan Xeral de Normalización da Lingua Galega (PXNLG).

    Marcos Maceira, presidente da Mesa, foi moi crítico co “espectáculo” co que o goberno galego presentou a súa “proposta de actualización do plan xeral de normalización”, para “impulsar o uso da lingua galega en toda a sociedade”.

    A Mesa acusa a López Campos e Valentín García de montar "un show" para “tapar a súa incapacidade de gobernar a favor do galego”

    “Sería cómico se a situación non fose tan dramática”, lamentou Maceira. “A proposta da Xunta para afrontar a emerxencia lingüística que sufrimos en 2026 é rebaixar os acordos unánimes do PXNLG de 2004”, denuncia. E aclara que a proposta da Xunta elimina o carácter prescritivo das medidas. 

    “Onde o acordo de 2004 falaba de facer”, explica Maceira, “a revisión actual do PP emprega verbos como fomentar, impulsar, promover, sensibilizar, favorecer ou fórmulas como “cando proceda” ou “na medida en que o permita o ordenamento xurídico”, como se a Xunta non tivese capacidade de actuación de mudar as normas que exclúen o galego ou como se non fose, directamente, a responsable da súa creación e aprobación”. “Aluden a fomentar o galego dentro dun marco normativo creado por eles mesmos no que o galego nin se nomea”, lamenta.

    De feito, A Mesa recorda que a proposta da Xunta nin sequera se propón garantir o cumprimento da lexislación en ámbitos nos que se está a incumprir “escandalosamente”, como en notarías ou seguros. Tampouco recolle “medidas claras e contundentes para asegurar a oferta positiva en todos os servizos”, nin o “compromiso de presenza do galego nos programas informáticos das administracións públicas” ou “a súa prioridade nas páxinas web e interfaces públicas”. 

    Rolda de prensa d'A Mesa CC-BY-SA A Mesa

    En ámbitos como o ensino, Maceira lamenta que o goberno autonómico “chantaxea” a sociedade galega, mobilizada en defensa da nosa lingua, “con manter o desastre actual se non se aceptan as súas condicións”, igualmente contrarias ao que indica a Carta europea das linguas, xa que, nelas, “o galego debe permanecer limitado a un máximo de docencia”. 

    A Mesa cre que a Xunta "chantaxea" a sociedade mobilizada polo galego "con manter o desastre actual se non se aceptan as súas condicións"

    “A Xunta debe garantir o galego en todos os ámbitos e para todos os usos” recorda Maceira. “É a súa responsabilidade e elúdena en aras dun suposto consenso”, lamenta. “O único consenso que promoven é o de silenciar a reivindicación do galego”, remata Maceira, “pero non o conseguiron". A Mesa di que, xunto a centos de entidades sociais, seguen "dispostas a asumir a responsabilidade da que desertaron". "Fixémolo co Protocolo Lingua Vital e farémolo agora cunha Iniciativa Lexislativa. Temos a seguridade de que coa acción colectiva é posíbel reverter a situación do galego”, explicou.

    Neste sentido, a secretaria xeral da Mesa, Celia Armas, asegurou que “o conselleiro de Cultura e o secretario xeral de Lingua incumpriron a súa palabra, excluíndo da participación directa no proceso máis de 50 entidades sociais relevantes de todos os ámbitos propostas pola Mesa”. Recordou que foi por esa exclusión “que A Mesa se negou a participar no espectáculo groseiro que estaba a armar a Xunta” e afirmou que “o resultado acabou por nos dar a razón”. “A Xunta só pretendía enredar e gañar tempo para seguir actuando contra o galego”, rematou Armas, “só fixeron anuncios cada vez que a plataforma Queremos Galego daba novos pasos: inicio do proceso social Lingua Vital, elaboración e presentación do Protocolo Lingua Vital, mobilización masivas e recentemente o anuncio dunha Iniciativa lexislativa Popular". 

  • Os populares dan por acadado "na rúa" un consenso sobre o idioma que só pode "crebar" por "intereses políticos"

    Alberto Pazos, voceiro parlamentario do PP, cun exemplar da proposta de novo Plan Xeral de Normalización CC-BY-SA PP

    Tras a presentación da proposta de Plan Xeral de Normalización e ante as primeiras críticas por parte dos grupos da actual oposición o PP puxo os marcos da posible negociación a través do seu voceiro parlamentario. O acordo está "acadado con naturalidade na rúa" e se "creba" no Parlamento será por "intereses políticos".

    O voceiro parlamentario do PP avanza unha rolda de "reunións de traballo" co resto de grupos para "enriquecer o documento" e ve no acto de presentación do plan "evidencia" de que "o noso idioma non é unha arma de confrontación"

    Asegura Alberto Pazos que nos vindeiros días o grupo que sustenta o Goberno vai tentar "pechar unha serie de reunións de traballo" co resto de formacións para "enriquecer o documento, deixando a un lado as diferenzas partidistas". Trátase, ao seu xuízo, de aproveitaren unha "oportunidade magnífica" de "trasladar de forma idéntica a gran sintonía social ao ámbito político"

    Sostén Pazos que o PP non persegue outra cousa ca un "gran pacto de país" e nese sentido, asegura, o evento de presentación do pacto organizado polo Executivo "evidenciou" que "o noso idioma non é unha arma de confrontación, senón un espazo para o encontro" en torno a un plan que "adapta ás novas realidades de Galicia un documento que levaba máis de dúas décadas agardando por una actualización

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza