Os dous primeiros centros, en Santiago e Lugo, foron adxudicados a unha fundación privada e os de Pontevedra e A Coruña, recibidos en outubro e agora respectivamente, aínda están en concurso con varias empresas aspirantes
O presidente do Goberno galego, Alfonso Rueda, recibiu este mércores a cuarta das residencias de maiores que a Fundación Amancio Ortega está a executar nas sete cidades galegas para doalas á Xunta, centros que Feijóo prometera en 2017. A residencia, con 150 prazas, aínda tardará en entrar en funcionamento xa que o Goberno galego está a demorar os procedementos para subcontratar a xestión de cada centro, tras renunciar a asumila directamente con recursos da Xunta, como fai con outras residencias máis antigas. O argumento para subcontratalas é, en todos os casos, que a Xunta ten cartos pero non quere dotarse de máis persoal propio.
No caso das dúas primeiras residencias doadas por Amancio Ortega, en Santiago e Lugo, a Xunta decidiu restrinxir os concursos públicos para a súa xestión a entidades sen ánimo de lucro, o que rematou cos dous centros subcontratados á polémica Fundación Fesan grazas a que rebaixou un 12% o custo das prazas. Ademais, a primeira residencia, en Santiago, tardou un ano en estar "a pleno rendemento" ao non lanzar a Xunta os concursos públicos desa e da de Lugo ata recibilas formalmente.
As dúas seguintes residencias xa rematadas foron a de Pontevedra, recibida o pasado 30 de outubro, e a da Coruña, recibida este mércores. Para elas dúas a Xunta mudou de procedemento de subcontratación e deixou de restrinxilo a fundacións de xeito son varias as empresas do sector da xeriatría que aspiran a facerse cos contratos. Nos dous casos os concursos públicos están aínda na fase de valoración de ofertas.
Ademais, a Xunta está disposta a pagar medio millón máis ao ano ás empresas que xestionen as residencias da Coruña e Pontevedra que á fundación á que entregou as de Lugo e Santiago.
Malia que o 30 de outubro, ao recibir a residencia de Pontevedra, Rueda avanzou que comezaría a recibir residentes "no primeiro semestre de 2025", este mércores o presidente volveu demorar a data e dixo que "comezará a funcionar ao longo do mes que vén", oito meses despois de recibir o centro.
A Valedora do Pobo lamentou en setembro que cando estean abertas as sete residencias e Amancio Ortega "aínda serán insuficientes"
O pasado setembro, no seu informe anual, a Valedora do Pobo volveu criticar a demora de "anos" para que unha persoa con dependencia e co dereito recoñecido a unha praza nunha residencia pública ou concertada acabe ocupando efectivamente esa praza. A Xunta replicoulle que xa está a traballar para ampliar a oferta grazas ás residencias doadas por Amancio Ortega, pero a Valedora retrucou que "cando estean en funcionamento esas prazas aínda serán insuficientes para atender ás persoas con gran dependencia".
